2 Odotikaa Maxaafa18
Mikayya Aki'abi'n Raaga Haaso'e
1Iyyosafixxi lumoxxa karranna ulfinna alfeexxa yanna Isira'eelike moyanjinni Aki'aabinni welti balloome.2Shiixxoxxe wogguwwa uduma Iyyosaafixi Aki'abi'i uudo'a Semaariya'a dirre. Aki'aabinna isi'anna isinni welti hedhemmake ardi'a heddo gedhebonna lalo dule; ookkoneechchi uduma Gele'adi Raamotika qachcha lole miidhaashsha Iyyosaafixii'i malche.3Isira'eeliki moyanji Aki'aabinna Yihudiinka moyanjo Iyyosafixxi'i «Raamoti'i Gele'adika lolatee anini welti dulidato?» hiyye qore.Iyyosafixxinna iso'n «Atete hiyya anten, arda anke hiyya atike ardan; bagedo weltinni duullannon» hiyye hiisse haaso'e.4Yaane kinni Iyyosafixxi Isira'eelika moyanjo, «Edissetexxi kinn Duuchchi Woddike Goottixxa fedhi laqedhi» hiyye.5Tennexxee Isira'eelik moyanji shoole dhibba wabeeko mitteba bukki asseexxi «Raamoti Gele'adi lolatee maranno mo'o waalanno?» hiyye insa'nee qore.
Insa'nenna «Mageni atee moyanjiinxe anga'n sa'isse uwwamaxxee marte loli» hine hiissine haasonne.6Iyyosafixxinna kinn «Weli qodhdhinnannoki Duuchchi Woddike Goottiki wabeek kaba hedhebaa?» hiyye.7Isira'eeliki moyanji Iyyosafixxii'n, «Duuchchi Woddike Goottixxa fedhi qodhdhinannoki mitti wabeeki ta'a kaba hedheeni; yaane kinni duuchchi wodda isi ani'a elobaaka malee eloka raaga ani'a haaso'ammabaaxxee isoo gibannon; isinna Yimilake belto Mikayaasiten» hiyye hiisse haaso'e.
Iyyosafxixinna isoo «Ati moyanji iitta hiyya hasissabaan» hiyye.8Isira'eeliki moyanjinna ja'laabuwwakenaa'n mitte ye'exxi «Martetexxi Yimilaka belto Mikayaasii rakke aaxxe iyyedagi» hiyye.9Eettene yanna lamiingi moyanjuwwi ifi ifixxa motummatixxa seemma odo'weexxi Semaariyake dalla'ixxe hula bira gadhi darree'n hexxeexxe aldu'me hana ifi ifixxe moote'ni ofollee'naa iitti wabeeko duuchchi insa'ne edo raaga haassotaamman.10Kene'anaaki belti Sedeqiyaasinna sibiljiinka gaafuwwa giissexxi Aki'abi'n, «Duuchchi Woddiki Gootti hiyya'nee qici, ‹Sooriyaka manna ati konne gafuwwinni otta'n birtatoni› hiyya'neni» hiyye.11Wele wabeeko duuchchi «Duuchchi Woddiki Gootti Raamoti Gele'adii anga atixxe'n sa'ise uwwammaxxee martetexxi loli» hita'n weli fakkataaka raaga raanga'nemman.12Mikayaasii ye'o'a maremmaki erganji; «Kunse wele wabeeko mitte afo'o kaddee moyanjio Aki'abi lole injifataaxxa kulaaka raaga haasote'een atinna insa'ne hineeshshanni hiyyi; moyanjo gammachchisaaka haaso'a haaso'i» hiyye.13Mikiyaas kinn «Hadaak Mageni ege'neexxa! Duuchchi Woddiki Gootti hiyyeexxa calla haaso'annon» hiyye kakate.14Mikiyaasinna ookko geyeexxa yanna moyanji isoo, «Koo Mikiyaas, Raamoti Gele'adi'i maree lolanno moo waalano?» hiyye qore.
Isinna «Maritine lolle injifatinaani; insa'ne anga ha'nooxxe'n sa'isemmee uwwemmaani» hiyye hiisse haaso'e.15Moyanji Aki'abinna iso'o, «Dhugaa malee mittechchonna Duuchchi Woddike Goottike summinni ane'n haasotabexxoshsha me'e yanna atee kakachchiisa'n hedhano?» hiyye.16Ookkoneechchi uduma Mikiyaasi «Isira'eeli duuchchi allalisanjo afebaake gedhebishsha koobuwwate'n xexxeerendee'naa uudenneni; Duuchchi Woddiki Goottinna ‹Kunni mann akeekisanjo afebaan; mitti mittingi ifi ifike minibaa nage'iki higowwaali› hiyyeeni» hiyye hiisse haaso'e.17Isira'eeliki moyanji Aki'abinna Iyyosafixxii'i, «Isi ani'a fuggoxxa malee eloka raaga haaso'abaaxxa ate'n haaso'enabaa?» hiyye.18Mikiyaasinna lebe hiyyee qici, «Yooni Duuchchi Woddiki Gootti hiyya'nee qico laqi; Duuchchi Woddiki Gootti moote ifixxe'n ofo'le'naa iimatiki sannachchuwwi duuchchi isike midda'nina bita'ake'n uurree'naa uudennen.19Duuchchi Woddiki Goottinna hiyyee qici, ‹Isira'eeliki moyanji Aki'aab Raamoti Gele'adi'ni duuleexxi ookkoo reyashsha ayyete isoo dedhisaaki?› hiyye.
«Mitti mitte yaada shiqishe; weliknna wele yaada shiqishe.20Udumi giddii'n mitti haafuuri edi dagati Duuchchi Woddike Gootti edo uurreexxi ‹Ani isoo dedhisannoni› hiyye.
«Duuchchi Woddiki Goottinna ‹Hitta assitee dedhisaatto?› hiyye isoo qore.21«Iikki hafuurinna, ‹Ani marennexxi Aki'abixxi wabeeko duuchchi dhara haasottaashsha assannon› hiyye.
«Duuchchi Woddiki Goottinna ‹Yooni martetexxi isoo dedhisi ati'a qajeldaan› hiyye.22«Tennexxee ta'anna tennee wabeekoke afo'o'ni Duuchchi Woddiki Gootti dharichcha hafuura uggeeni; Duuchchi Woddike Gootti ba'ne ate'n geltaashsha ajajeedheen.»23Ookkoneechchi uduma Kene'anaki belti Sedeqiyaasi, biri'a shikki hiyye Mikiyaasii'i kabalati, «Haanichchinni kayyi'aate Duuchchi Woddike Goottiki hafuuri ane'naa'n sa'eexxi ate'n haaso'eek?» hiyye.24Mikiyaasinna, «Goli giddi'a e'yite sho'ondattoxxa eettene barra affatoni» hiyye hiisse haaso'e.25Ookkoneechchi uduma Isira'eeliki moyanji hiyyeexxi ajajee qici, «Mikiyaasii'i abidineexxi ookkene qachchika galchallo, Amoninbaanna moyanjink belto Iyyo'aasibaa ille iimma hiissitine erge.26Insa'neenna, ‹Moyanji, konne manjichcho usuriinke mine'n e'yishe; ani duulokenaa'n nage'iki ille iima higanno qico'n bagoka budeenanna wode'e malee mittechchonna isi'a uutinoqqe'e hiyye'eeni› hiyye.»27Mikiyaasina, «Ati duulokenaa'n nage'iki ille iima higotole Duuchchi Woddiki Gootti ane'n haaso'ebaani hiyyateni!» hiyye. Higgeenni «Ha'no Kaba hexxineeki ardi duuchchi hiyyennexxa laqqe» hiyye.
Aki'abixxa Reyo
28Tennexxee Isira'eeliki moyanjinna Yihudiinki moyanji Iyyosafixxi Raamoti Gele'adi'a qabante.29Isira'eeliki moyanjina moyanjo Iyyosafixxii'n, «Ani wele seemma jijjiidhennexxi loli giddi'a e'yannon; ati kinni mootummatixxa seemma oddo'wi» hiyye.Tennexxee Isira'eeliki moyanji wele seemma jijjiidhe wele manjo fakkaateexxi bagediinbaa e'ye.30Eettene yanna'n Sooriyaki moyanji ifike sarageella ajajamakaara, «Isira'eelika moyanjo calla malee shiixxokanna kadi lumoka wele ayyeenna loldinoqqe'e» hiyye insa'nee ajaje.31Iikki sarageella ajajammakiirinna Iyyosafixxii'i uunde wodda, «Isira'eeliki moyanji konneten» hineexxi hende; isoonna shinno'a elqe kayyii'n bunqe; Iyyosaafixi kinni raare; Duuchchi Woddiki Goottinna isoo gargaare; Magenikinna isonaa'n insa'ne udumi'a hiisse.32Iikki sarageella ajajammakiirinna isi Isira'eelike moyanjo kadebaaxxa egenneexxi isoo shorra waalle ile iima hinge.33Kaddo malee mitti Sooriyaki loliink manji dedhanga mogido daribeexxi qomatixxi sibiljiinxi seemma welti gence hitexxe bakkanaa'n Isira'eelika moyanjo ote. Moyanjikinna ookkone sargeella oofaammaka «Ani mado'eenneni sarageella udumi'a hiissite loli giddii'n anee fulchi» hiyye.34Barra duuchcha jabateeke lola hedhemman; Isira'eeliki moyanji Aki'aabi, Sooriyake manni ifike sarageella hana galgal qico'n irkateemman, isinna arishsho e'yitee wodda reye.
The Word for the World International