2 Odotikaa Maxaafa17
Yihudiinka Moyanjo Iyyosaafixii'i
1Iyyosafixxi ifike annixxe Aasaxxe bakka'n moye; Isira'eel lolo'a ifi jabeessedhe.2Isinna kinjiinke dalla'inni ijaaremeeke Yihudiinke qachchuwwi duuchchi giddo loliinka manna ugge; iittanni Yihudiinke boga'ninna ann isiki Aasa lole ifitti hiisedhemmake Efireemike qachchuwwa'n heqqaaka manna ugge.3Oosumandenaa'n ann isiki Daawwiti me'emmaka eloka ora me'emmaxxee Duuchchi Woddik Gootti Iyyosafixxinni welt hedhemman; isinna Ba'aali hiyyemaaka magenuwwa magenoofatebaan.4Yanne kinn Iyyosaafixi ifike annike Magenika ajajuwwa heqqedhe; Isira'eeli hujjammaxxa fuggoxxa huje hujebaan.5Duuchchi Woddiki Gootti motumma isixxa jabeesse; Yihudiinki ardi duuchchi Iyyosafixxi'a gargar gargar hexxeexxa uwwa iyyedage; tennenaa'n kexxeexxa yo'oshsha duroome ulfeeseme.6Isinna mitte godobinni Duuchchi Woddike Goottike ora'n me'e; iittanni magenoofachchotika tullichchuwwanna Ashera hiyyemaake magenixxa soodduwwa Yihudiinke boganaa'n fugusse.7Iyyosafixxi moyeexxe sakkaxxe wogga'n Yihudiinke qachchuwwi giddo barachchiinso'a ja'laabuwwa ifika Beenihayili, Abidiyaasinii, Zakaariyaasii, Naatina'eelinna Mikayya erge.8Insa'nenni welti Leewwito hexxemman; summi insa'nekinna Shamaya, Nataniya, Zebadiya, Asaheeli, Samiramoti, Yoonataani, Adooniya, Xoobiyanna Xoobadoniyatemman. Qeesenna kinn Elishaama'inna Iyyoramitemman.9Insa'nenna Duuchchi Woddike Goottika seeriinka Maxaafa adhdhine me'ineexxi Yihudiinke boga'n hedheeke ardi duuchchi'a barachchiinse; Yihudiinke qachchuwwa duuchcha'n mammaremma'n arda barachchiinse.10Duuchchi Woddik Gootti Yihudiinke bogi qarqara'n hedheeki moyanjuwwi duuchchi soda'a wocci asseemmaxxee Iyyosafixxii'i lolebaan.11Filisixeemike mannanaa'n mitti mitti birretika sibiljonnaa wele uwwa moyanjo Iyyosafixxi'a iyyedange; Arabikinna torbaane tomme kumanna torbaane tomme dhibba gedhebiinxa korbeeyyenna torbaane tomme kumanna torbaane dhibba re'etixxa korbeeyye isi'a iyyedange.12Iyyosafixxinna hunna lephpha'n dage; Yihudi giddonna kolluwwatanna miyiinxe massecaka qachchuwa ijaare.13Yihudiinke qachchuwwa'n yo'oxxi gala'uwwa heddo loliinki miyuwwi hedhemman. Higgeenni adhe muuxeeka loliinka manna Iyyerusaalemi ugge.14Insa'nenna ifi ifike mini mini hadi borreessemee qici konneechchi butta hedheeshshate; Yihudiinxxe horitexxe gosanaa'n filemeeke kuma loliinka manna ajajammak Adina hiyyemaak loliink ajajal hedhemman; isi sase dhibba kuma loliinka manna ajajaamman.15Iso'n itti aaneeki ajajjalli Yehohanaani ifike lame dhibbanna saddeeta tomme kuma loliinka manninn welt,16ookko'n itti aaneexxi Duuchchi Woddike Gootti'a ifi uwweeke Zikiriki belti Amaasiyaasi ifike lame dhibba kuma loliinke manninni welt,17Biniyamixxe gosanaa'n filemeeke loliinke manni'a umoke kadeeki ajajjalli Eliyaadaa'i hiyyemaaki janna loliinke manjommani; isinni welti wontetanna mogido abixxeemmak lami dhibbi kumi loliinke manninni welt,18isinaa'n itti aaneexxi Zabaati hiyyemaaki loliinke mannki ajajjalli lolake qophphefateeke mitte dhibbanna saddeeta tomme kumi loliink manninni welt hedhemman.19Kunni duuchchi Yihudiinke boga duuchcha'n kinjiinke dalla'inni ijaaremeeke qachchuwwa'n moyanjokee ergatemaammake mannamman.The Word for the World International