Taakkakaa Moyanjuwwiinkaa Maxaafa7
Solomoon Ifika Mootummatika Mine Ijareexxa
1Solomoon ifika mootetika mine ijaare muuxate'e tommenna sase wogga bire.2Libaanoosike gongoma hiyyemaaka mootummatika mine ijaare; qeerinni dhibba ciliqe godobi onde tomme ciqile, ejuma sase tomme ciqile kadaa wodda, shoole dala'ni uure'eek birbirisiinki utuphuwwi iima heellicho biribirisiinke haqichixxe afe'emman3Konne utuphuwwi hana sase dala'n shiixxaramma tomenna onde onde kutuwwa duuchiinxi mitteba shoole tommenna onde kutuwwa hexxexxe kadaa wodda iimiin'n heellichcho biribirisiinxe haqqenni kaphendeemman.4Isexxi masikootuwwanna qephphi assende giissendeexxi sase dala'ninna wele affa'emmaxxemman.5Huluwwa duuchcha shoole kasika mikikilanjuwwa affeexxenna sase dala'n fuula mitte'n he'nemman.6Solomoon, «Heddo utuphika lumoka mine» hiyyemaaka mine ijaare; konne miniki qeerrinni onde tomme ciqile, godobi sase tomme ciqilemman; edi darree'ni heddo utuphuwwi kiphateemaxxi heelichcho giissineemmak mammaremaaxxi soro hexxemman.7Hayyoomma uudaaxxi moote hexxeexxa kuta jaare; tininna murtetixxe ba'laxxe kuta hiyyendeexxen; iseenna buttii'ni heellichoti qico'n birbirisiinke beconni buqe.8Giddii'n ba'laxxe kuta udumi darre'ni hedheeke ba'lina'ni mootummatika mine ifi'a ijaare; Solomoon aadheexxe Feri'oonixxe belto'a konne'e mootummatika mine labbaaxxa ba'laxxa kuta jaare.9Kunni tenne mitte baxxe'n hedheek minuwwi buttii'n dinidimaateti qico'n hedheeke minik ijaarsi duuchchi boceme giddi gadhii'n weli qixxe qunqumeme seesemeeke fiixeeke kinjinni ijaaremeekemman.10Booso isixxinna tomme yookaan saddeeta ciqile qeerrinne afe'eeke elolla lumolamma kinon ijaaremeekemman.11Tenne lumolamma kino iima yo'oshsha elolla qunqumendeexxi kinonna birbirisiink beco hexxemman.12Dada duuchchik Duuchchi Woddike Goottike galmik giddi darrek ba'lin mammaremaammake soronni welti lumoke ba'linnishanni seesende bocendeexxe sase dalixxe kinoninna qunqumemeeke mitte dalike birbirisiinke beconni golleme'ekemman.Galimi Giddika Mi'uwwa
13Moyanji Solomooninna erganjo ergeexxi Huraami hiyyemaaka manjichcho Xiroosi'ni dagaashsha asse.14Kaamixxi ama Nefitaalemixxe gosaxxe manjo kadda wodda, isenna aro'o affemmabaaxxe hiyyeetemman; isiki anninna Xiroosike bogike manjo kadaa wodda, sageettotika sibiljo baqisatixxe ogeke manjomman; Kiraami sageetto baqisatixxa heene hujeka beekkuma, dande'anna ege'na afe'eemmake manjomman; isinna moyanjo Solomoonibaa dageexxi isi'a uwwendeexxa huje duuchcha huje bire.Sageettoti Giissemeeka Lame Utupha
15Kiraami mitti mittingi ejuma tommenna saddeeta ciqile, dowwetinna tommenna lame ciqile kadeeka lame sageettotike sibiljika utupha giise.16Iittanni utuphuwwiinxe guuto'ni uggendaaxxa lame bokko baqinseexxe sageetton giisse; Mitte mitte bokkoxxi ejuma onde qicilemman.17Utuphuwwiinxe guuto'ni hana hexxeexxe bokkuwwake seesa kaddaashsha mitte mittende'e torbaane marabetika haachchaba giisse.18Iittanni Utuphake'ni hana hexxeexxa bokkuwwa seesate'e mitte mittende marabexxe dowwe'n dooteexxa Roomanuwwa lame dala'ni giisse; lamiinxe bokkuwwa'n asseexxi yaane weli fakkaattaaxxemman.19Barandake'n hedhemmake utuphuwwixxe guuto'n hexxeexxi bokkuwwaxxi ejjuma shoole ciqile kadda wodda, suufetike daraarixxe misilekemman.20Mitte mittinge lame utuphuwwixxe marabetixxe bokkuwwaxxe dowwe duuchcha'ni lame lame dhibba roomaanuwwa dalake'n hexxemman.21Utuphuwwakanna galmiinke baranda'n uurrise; middi darree'ni uurseeka utupha Yakin, bita'i darreka Boo'ezi hiyye summa fulche22Guutote'n hexxemmaxxi bokkuwwa suufetike daraarixxe misilemman; Utuphuwiinxi huje konne qicinni muuxende.Sageettoti Hujemeeka Gonga
23Mitte kasakenaa'ni mitte kasii qico'n godoba tomme ciqile, ejjumia onde ciqile kade'eekanna isixxe wirto sase tomme ciqile kade'eka kuku'michcha gonga baqisemeeke sageettotike sibilijin giisse;24Gongiinke afo'i buttidarre, mitte mitte ciqileke'n qoonjishsha hexxeexxi tomme misiluwwa qarro gongiinxe'n lame dalin dalde'een; kunnichchuwwinna gongik welit mitte biso kadeexxi lame dala'ni giissine'emmaken.25Gongi kinna, sasi middi darree'n, sasi dhidhimi darree'n, sasi bita'i darree'n sasi boroti darree'n alba wirri hiteexxe tommenna lame korommexxe misile hana ofo'le'eeke kadaa wodda, gongi tenne koromme hana hedheekei kadda wodda duuchchiingixxi udumi darreki gong hundii'n giddi darre'n gata'emman.26Gongiinki furdinni saddeeta sentimetre qico kadaa wodda, isike afo'ik irgi kinni daraariinxe misileshsha hedheexxi afo'iinba siinetike afo'o fakkaata'emman; isinna shoole tommenna lame kuma leetiro wode'e abida'emmakemman.27Iittanni mitte boonchonaa'n wele boobchiba'a me'aaka moletika tomme miyiinka offo'lisanjuwwa sageettotike sibiljika giisse; mitti mittingiki qeerrinni shoole ciqile, godobi shoole ciqile, ejjuma sase ciqileman.28Miyink offo'lisanjuwwi giisseme'emma qici: kunni offo'lisanji shoole kasike kadeexxi shoole lekkuwwa afe'emman; kunni shooling gami gamike kasuwwi welt bexxichcha sageettotike sibiluwwi abidememman.29Gama gamake'n hexxeexxe lekkuwwaxxe oddo'ni hedheeke sageettotike bexxichcha sibiluwwa'n neenquwwiinxa, laliinxe kormoolexxanna Kurubeeletixxa misile giisse; tenne neenquwwinna laliinxe kormoole iimi darre'ninna butti darre daraariinke seesike luuphisa fakkataaxxi tumende giissendeemmaxxe misiluwwa hexxemman.30Mitti mittingi miyiink offo'lisanji shoole sageettotike sibiljixxa molenna moluwwa itti wirri wirri hitaaka sageettotika sibiljuwwika wirwisama afe'emman; iittanni mitte mitteng ansheccatike gongik shooliini darree'ni abidisemeemmaxxe dhaaddo afe'emman; tenne dhaadduwwa'n darariinke seesika luuphisa misilenni seeseme'emman.31Anshe'namake gongik afo'ik ba'linni tommenna saddeetta ciqileman; isinna kukubbichcha afo'ikemman; qeerinkinna shoole tomme ciqilman; afo'iinbanna ququbichchake kadeexxi gonga dunkamaalchinna bexxichchake malee'e gubiinkemmabaan.32Shoollnixxi moluwwa, sageetotike sibiljika miyiinka bexxichcha ofo'lisanji hundidarre'n gattaaxxe kadda wodda moluwwatike wirsamuwwi kinni miyinke ofo'lisanjuwwinni mitteba abidisemeekemman; mitte mittende molek godobinna mittenna gamisa ciqilemman.33Moluwwa, fadhadiinxe gaarexxa moluwwa fakkaattaxxe kadda wodda, isek wirsamuwwi, iseki irguwwinna isexxi bobuwwa iittanni kinni wirwirsamuwwi giddo e'yaak baanbuwwi duuchchi baqisemeeke sibiljikemman.34Mitti mitting miyink offo'lisanji shooliinge kasa'n shoole abixxatika fannichcho afe'emman; fannichchuwwikinna miyiinke ofo'lisanjo'n abidiseme giisseme'ekemman.35Miyiinke ofo'lisajixxe guutoxxe dowwe'n gamisa ciqile kaddaaxxi kuku'mitte misile hexxemman; ofo'lisanjo isikixxi lekkuwwanna isik bexxichchi sageettotike sibiljuwwi ofo'lisanjixxe guutonni welti abidiseme'emakemman.36Isinna tenne lekkuwwa'n hananna tenne sageettotike bexxichchi sibiluwwi hana hexxeexxe duuchcha bakkaxxe dowwe'n daraariinke seesixxa luuphisa kurubeelinna meexxetike haqichchixxa misiluwwa giisse.37Tommiinge miyinki ofo'lisanjuwwi giissemeeki konne qici'nitemman; duuchchiingechchi mitte dhagga'n baqiseme'e fulechcho kadeemmaxxe'e jifo insa'neexxinna seesi weli qixxe kaddeemmaxxe'e duuchiingi mitte kutamman.38Isi ookkoneechchi uduma mitte mittenge miyike offo'lisanji'a dhibbanna saddeeta tomme liitire abidaaka tomme sageettotike sibiljika ansheccatika gonga giisse; mitti mittingiki godobi shoole ciqilemman.39Onde miyika offo'lisanjuwwa galmakenaa'n bita'i darre'n ugge; onde middi darre'ni, anshecatika gonganna galmakenaa'n bita'i darrexxe borroke kasa'n bita'i darre'n ugge.Woyyichcha Galmike Miyuwwika Laakkoossa
40Iittanni odowwa, akkaffuwwakanna distuwwa giisse.Huuram konneqicinni moyanjo Solomooni'a ijaareeka dada duuchchik Duuchchi Woddike Goottike Galmixxa huje konneechchinni butti'a hexxeeshsha muuxe:41Lami utuphuwwi, utuphuwwiinxe guuto'n hana giissendeexxi lame kuku'mitte bokkuwwa, utuphuwwiinxe guuto'n hana giissendeexxi lame kuku'mitte bokkuwwa danchositeexxi lame marabuwwa;42Utuphuwwiinxe guuto hana hexxeexa lame bokkuwwa buqaashsha, mitte mitte marabe'a lame lame dala asseexxi lame marabe'a shoole dhibba roomaanuwwa;43
Tomme miyinka offo'lisanjuwwa konne offo'lsanjuwwa'n hana hedhemmaka tomme ansheccatika gonguwwa44
wode'e camatika gandanna hundi darre'n tommenna lame korommuwwaxxa misiluwwa;45
distuwwa, akkaffuwwakanna hubbuqqichcha sahinuwwa.Huraami dada duuchchik Duuchchi Woddike Goottike galmixxe huje'a kadaashsha konne mi'uwwa duuchcha moyanjo Solomooni'a giisseek ganganeme'e calacala hiyya'neeke sageetotike sibiljinniten.46Moyanji Solomooni konne sageettotike sibiljika miyuwwa sageettotika sibiljo baqise'e faariinke miyixxa bifa afaashsha faarinke miyi giddo duneme'ek Sukootixxenna Tsartaanixxe oddo'n hexxeexxe Yordaanoosixxe dhooqa'niten.47Solomoon konne mi'uwwa a'urekenaa'n kexxeexxa kiilemaashsha asseba'a; tennexxee sageettotike sibiljik a'urri hitteeke kade'emmaxxa ege'neme'emmaba'a.48Solomoon dada duuchchik Duuchchi Woddike Goottike galmi giddo hedhemmaka konneechchinni butti'a hedheeka miyuwwa duuchcha giisse:Worqetika tolchi booncho, Magenoke shiqqaaxxe indaachcho hana hexxaaka worqetika beera;49Woyyo woyyitte edidarreOnde middidarre'n, onde bita'i darre'n hedhaaka ca'itte worqeka torbaane dhankoka xassa,worqetika daraaruwwa, worqetike xassike ofo'lisanjuwwanna worqetika giirati tunqisanjuwwa.50Ca'itte worqexxa qoruwwa, xassa xolsamalchuwwa, distuwwa, hixaana shiqnishachchuwwa, mooqquwwa, giira ha'ilshinaachuwwa, giddixxe kuta'a woyyitte woyyoke cufanuwwi'anna iittanni galmikke cufanuwwi'a kadaakia maxaafuwwa giisse.51Moyanji Solomoon, dada duuchchik Duuchchi Woddike Gootike galmixxa huje duuchcha muuxeechi uduma anni isik Daawwiti gargar foyeemmaka birretika sibilonna worqe, iittanni wele miyuwwa duuchcha aadhe iyyedageexxi dada duuchchik Duuchchi Woddike Goottike galmi giddo ugge.
The Word for the World International