Taakkakaa Moyanjuwwiinkaa Maxaafa6
Solomoon Galma Ijaarsa Safe
1Isira'eel Gibtsee'n fuldeexxe shoole dhibbanna saddeeta tomme wogga'n, Solomooni Isire'eel'n moyeexxe sholgaxxe wogga'n, Ziifi hiyyemaake langeessoke agenjo'n Solomoon dada duuchchik Duuchchi Woddike Goottika galma ijaara safe.2Moyanji Solomoon dada duuchchik Duuchchi Woddike Gootti'a ijaareek galmi, qeernni jaane tomme ciqile; godobi lame tomme ciqilenna ejuma sase tomme ciqilemman.3Galmiinxe lumoxxe kuta edi darre hedheeke soroti ba'linni galmiinke godobishanni lame tomme ciqile kadaa wodda, tomme ciqile gadhi'a fule'ekemman.4Galmakee giddi darre'ni ba'late'e, gadhi darree'n cu'maxxa masikootuwwa giisse.5Galmiinxe lumoxxe kutaxxe gimo'ninna ookkonee galmixxe woyyo woyyite kutaxxe gimotike qarqara'n sumendeexxa kutuwwa ijaare.6Galmiinxi hundi darrexxe fooqexxe kutak godobi onde ciqile; oddotixxik jaane ciqile; sakkaxxik torbaane ciqilemman; ookkone galmiinixe gimo giddi'a hoboqqi hitabaashsha, hundidarrexxi galmiinixxi gimo oddotixxenaa'n, oddotixxinna xungotixxenaa'n furdattaashsha asse ijaare.7Galmi ijaaremeek ookkone kino qotende fuldemmake booncho'ni qophpheessendeexxe kinonnite kaddemmaxxe'e burrisiink, kino xabbatixxa faase, yookaan wele sibilinke miyixxi qa'weette galmiinkea qarqara laqende'emmabaan.8Hundi darrexxe fooqexxi hula fulde'eke galmiinke bita'a'ni kadda wodda oddotixxe fooqeba'a, ookko'ninna iimixxe fooqeba'a da'misaak riqi hedhemman.9Tennexxe galmakanna konne qicinni ijaare bire; isixxa heellichchonna giddi darre'n birbirsiinke dagalisanjinninna birbisiinke xaawulinni buqe.10Galmiinke sasiinge gama'n ejjuma mitte mittenge fooqeki qeerrinni onde onde ciqile kadeexxa eettene kuttuwwa giisse; tenne kuttuwwanna galmake'n birbirisiinxe haqqeke dagalisanjinni abidise.11Dada duuchchik Duuchchi Woddike Goottik hiyyichchi Solomooni'n dageexxi,12«Konne ijaartaatteke galmixxe'e, aada anxa hordoffottole, murte anxanna muuxxottole, ajaja anka heqqexxe iso'n galdottole, anna atike Daawwiti'a uwwennexxa addachchiisa ate'n muuxannoni.13Isira'eelike ardixxe oddo'n hedhannoni; arda anka Isra'eelinna waalabe'noni» hiyye.14Tennexxe Solomoon galma ijaare bire.Woyyichchi Galmika Ijaarsa
15Galmiinxa gimo giddi darree'n buttii'n heellichchoti qico'n biribirisiinke beconni buqe; galminke giddike ba'lina'ninna hi'neessiinka beco faye.16Galmi giddo udumi darre'n lame tomme ciqile woyyitte woyyo kuta kaddaashsha buttii'n heellichchoti qico'n biribirsiinke becoti golo gole.17Woyyottixxe woyyo edi darre hexxeexxi lumoxxe kutak qeeriini shoole tomme ciqilemmani.18Galmiink giddi darri duuchchi biribirisiinxe haqqenni buqemeeke kadaa wodda, kunninna qoonjiinsha hexxeexxe miselek daraaruwwi xabbeme seeseme'ekemman; duuchchiingi biribirisa malee'e leela'nemmaki kinji hedhemmabaan.19Galminxe giddonna dada duuchchik Duuchchi Woddike Goottik kakotik Taabooti hedho'a eettene woyyittixxe woyyoxxa kuta qophpheesse.20Woyyitte woyyoxxi kutaki qeerinninna lame tomme ciqile, godobi isek lame tomme ciqile, ejjuma isexxinna lame tomme ciqilemman; giddirrenna ca'itte worqenni buqe; biribirisiinke haqichchika tolchimalchonna worqeti buqe.21Solomooni galma giddi darree'n ca'itte worqenni buqe; worqeti buqendeexxe woyyitte woyyoxxe kuta edi darre worqetika haachabuwwa dagale leenxise.22Tennexxe galmi giddi darre duuchcha worqeti buqe; woyyitte woyyo kuta giddo hedheeka tolchimalchonna iittanni worqeti buqe.23Woyyitte woyyo giddonna mitti mittiniingiki ejjumi tomme tomme ciqile kadeexxa lame ejersiinke haqichiinxa Kirubeeletixxa fakke giisse.24Taakkaxxe kirubeelek mitte keelik qeerrinni onde ciqile kadaa wodda langak keelinna iittanni onde ciqilemani; kunninna mitte keelike kasanaa'n langake keelike kasi qico'n tomme ciqile hiyyotemman.25Langaxxe kirubeelek keelinna iittanni tomme ciqileman; lamiinxi kirubeele gelta qicinna affeexxi bifa mittetemani.26Mitte mittende kurubeelexxi ejjumaa tomme ciqilemman.27Keeluwwa bandeeshshanni eettene lame kirubeele aadheexxi woyyitte woyyo kuta giddo ugge; mitte kurubeelek keeli mitte darrexxa gimo tuqa wodda langaxxe kurubeelek keeli wele darrexxa gimo tuqa'emman; lamiinxe kurubeelek weli keeluwwi woyyitte woyyoxxe oddo'n weli weli kise'emman.28Tennee kurubeeluwwanna worqeti buqe.29Galminxe gimo duuchcha giddixxenna gadhixxe kuttuwwa'n kurubeelixxa, meexxetike haqichchixxanna pha'a hiyye daraareeke daraaruwwa fakke xabbe giisse.30Iittanni galmi giddixxe fawoxxa giddixxanna gadhixxa kutuwwa worqeti buqe.31Woyyitte kuta'a ejersiinke haqichchinni hulatika cufanuwwa giisse; iikki cufanuwwinna onde kaassikemman.32Lamiinge ejersike haqqichchike cufani hana kurubeeli'i, meexxetika haqichonna daraare pha'a hiyyeeka daraaruwwa fakke xabbe giisseexxi worqetinna buqe.33Iittanni Lumoxxe kutaxxe hulake cufani'a shoole kasika ejersiinxe haqqeka mikikkilanjo giisse.34Lamiinxi hula mitte mittendi hi'neessinke haqichchiinke maaxafinni welti abidemeeke lame lame cufanuwwa afeeka lame cufana giisse.35Konne cufanini hananna kurubeeli'i, meexxetixxa haqqenna daraare'e pha'a hiyyeeka daraaruwwiinxa fakke xabbe giisseexxi worqet buqe.36Galmiinke giddi darreka ba'linna bocendeexxe kinonni sase dalanna mitte dala birbirisiinke beconni giisse.37Dada duuchchik Duuchchi Woddike Goottike galmixxi huje sholgaxxe wogga'ni Ziiphi hiyyemaake agenjo'ni safende.38Tommenna mittixxe wogga'ni Buli hiyyemaake saddeetike agenjo'ni mitte mittendi galmiinxi huje hedendemmashanni muuxende; Solomooni hujetanna huje bireek torbaane wogga'nitemman.The Word for the World International