NZABUKUSU YI YOANE10
Mbazi na buuku didikeke
1Mboki nayena mbazi yihiika yilulendo yifuma ku mazulu yedi kulumuka, yifuku ku tuti dimosi na mukyama wuzungidila mutu andi. Kiini kyandi kiba bonso ntangu na malu mandi bonso makunzi ma tiya.2Wusimba ha kooko kwandi buuku dimosi didikeke diba dimwasi. Wutuula kuulu kulubakala mu mubu na kuulu kulumoso ha butoto.3Wulooka mu ngolo bonso nkosi yina duma. Mu mulooko wandi, mimbamina nsambwadi miyuwikisa ndinga zawu.4Bu mimanisa mu zonza, natya mu sonika misamu bemyomyo mizonza mimbamina nsambwadi, kansi nina yuwa ndinga yimosi mu mazulu yita ti: «Keba mansweki ma misamu bemyomyo miteedi mimbamina nsambwadi, kusonikandi myo.»5Buna, mbazi yi nayena yitelama ha yulu mubu mpe ha butoto, yinanguna kooko ku lubakala ku yulu.6Na yidya ndefi mu nkumbu yondowo wuna zinga mimvu ka mimvu, wuhidika yulu na bima bii koko, butoto na bima bii ha butoto, mubu na bima bii momo. Mbazi yita ti: «Ntangu ye kingila yisidi dyaka ko!7Kansi mu bilumbu byaasika mbazi yinsambwadi kulumenta, mansweki ma Nzambi maalunga bonso bu nata Musamu Wumbote wukasamuna ku mimbikudi, bisadi byandi.»8Ndinga yi nayuwa, yifuma ku yulu, yizonza dyaka naani. Yinteela ti: «Yenda wubonga buuku didikeke dimwasi, dii mu kooko ku mbazi, yitelamani ha yulu mubu na ha butoto.»9Bu nafinama ha bela mbazi, namubombidila kampaana buuku didikeke. Wunteela ti: «Bonga dyo na dya dyo. Dyaakitula moyo aku ndudi, kansi dyaaba mu munwa aku nanzekinzeki bonso nyosi.»10Ni nabonga buuku didikeke diba mu kooko ku mbazi, ni nadya dyo. Diba nanzekinzeki mu munwa ani bonso nyosi, kansi bu namina dyo, ni dikitula moyo ani ndudi.11Ni hahoho banteela ti: «Fweti bikula dyaka ku bantu babingi, ku zinsi, ku zindinga na ku zintinu.»Wycliffe Bible Translators, Inc.