EBELEO11
Kiminu
1Kiminu, ni mu kwikila mu bima bi tukwe siilanga kivuvu na mu tambula byo bi tukwe lembolo yenanga.2Mu dyambu di kiminu kyawu, zinkuluntu zi ntangu yintama zitambula kimbangi kimbote ku Nzambi.3Mu kiminu tukwe zabilanga ti, mu Mpova yi Nzambi nza yihidimina, mpe bima bikwe yenikanga, mu bima bikwe lembolo yenikanga bahidikila byo.4Mu kiminu, Abeli wuhaana ku Nzambi munkayulu wuvudidi wumbote na wu Kayini. Mu kiminu kyandi, Nzambi wumutumisina muntu wulunungu. Mu dyambu ti, Nzambi wuyangalala bima byandi bi kahaana. Mpeleko wufwa, kansi mu kiminu kyandi, Abeli wuna tatamana dyaka mu zonza.5Mu kiminu, Nzambi wunata Henoki ku mazulu mwanki kalembolo fwa. Kuu na muntu wubwesa muyena ko, mu dyambu ti Nzambi wumuzangula. Tekila nzangudulu andi, wutambula kimbangi ti, Nzambi wumuyangalala.6Kansi, kuu muntu ko wulendi yangidika Nzambi wulembolo ba na kiminu. Mu dyambu ti, yondowo kwe finamanga ku Nzambi, fweti kwikila ti Nzambi wudi na kwe sendanga yobobo bana musosa.7Mu kiminu, Nowa bamulwengisa ku Nzambi mu misamu mi balembolo teka yena. Wuba na kivumi kikinene, mpe wutunga nzaza mu vuukisa kanda dyandi. Mu kiminu bekyokyo wubedisa nza, mpe Nzambi ni kamubongila bonso muntu wulunungu.8Mu kiminu, Abalahami wutumimina Nzambi bu kamutumisa mu kwenda ku nsi yi kaamuhaana bonso fwa. Wuyenda wulembolo zaba ku kedi kwendisa.9Mu kiminu, wuzakala bonso nzenza ku nsi yi musila Nzambi nsilulu. Mu nzo yi kikapu kedi banga bonso Isaaki na Yakobi Nzambi bakasila nsilulu yimosi.10Mu dyambu ti, Abalahami wedi kingilanga mbanza yii na lufulu lungolo, lolo Nzambi lu kadi yandi bende Kihidiki na Kitungi.11Mu kiminu, Salayi yandi bende wuba kisita, mpe Nzambi wumuhaana lulendo lwe ba na nkuna, mpeleko wuba kinunu. Mu dyambu wuba na kivuvu kikwikama ti Nzambi waalungisa nsilulu zandi.12Ni hahoho, mu muntu wumosi, Abalahami wuba lukufi mu fwa, mubutuka nkuna yiyinene, yifunana bonso mbwetete ku yulu na bonso munyenge wuu ha kumu di mubu.13Mu kiminu bantu bebobo bamvimba bafwila, wulembolo tambula bima bi basila Nzambi nsilulu, kansi kukula bayenina byo na bayangalala byo. Babakula ti, zinzenza na mimpyoka nzila baba ha luse lu butoto.14Yobobo bana zonzila bobo, bana lonka ti nsi yi yawu bende bana kwe sosi.15Tala ti banyonga bu babambuka moyo mu nsi yi bafuma, nganunu babaka ntangu ye vutuka koko.16Kansi, baba na nsatu ye baka nsi yivudidi yimbote, mpila mosi ti nsi yii ku mazulu. Ni hahoho, Nzambi kana yena nsoni ko bamutumisina ti Nzambi awu, mu dyambu ti wubakubikila mbanza.17Mu kiminu, Abalahami wuhaana Isaaki bonso munkayulu mu ntangu Nzambi yi kamutonta. Wukubama mu haana mwana andi wumosi kaka bonso munkayulu, mpeleko Nzambi wumusila nsilulu.18Nzambi wumuteela ti: «Mu Isaaki waabakila nkuna yi nakusila nsilulu.»19Kansi, Abalahami wubanza ti Nzambi wuba na lulendo mu fulukisa Isaaki mu bafwa. Ni hahoho Nzambi kamuvutudila mwana andi, kyokyokyo kingana kwandi kidi.20Mu kiminu, Isaaki wusakumuna Yakobi na Esawu mu misamu mina kwiza kuntwala.21Mu kiminu, Yakobi tekila kafwa, wusakumuna kadi mwana wu Yosefi, mpe wusikimina mu nsongi yi muhangu andi na wusambila Nzambi.22Mu kiminu, Yosefi ku nsukunu yi luzingu lwandi, wuzonzila nduukulu yi baala ba Isaeli ku nsi yi Ngipiti na wuhaana ntumunu mu dyambu ditadidi bihisi byandi.23Mu kiminu, ku manima ma mbutukulu yi Mose, tata andi na ngudi andi bamusweka ngonda zitatu, mu dyambu bayena ti mwana awu wuba wuluhu na bayena bunkuta ko mu ntumunu zi ntinu.24Mu kiminu, Mose bu kakula, wubisa bamutumisina mwana wubakala wu mwana wu mukento wu Falao.25Wusoola bamukwamisa ha kimosi na mukangu wu Nzambi, kansi ka mu yangalala mu mwa ntangu mu byese bi masumu ko.26Wubanza ti, mu yena mvwezolo bonso Klisto, buvudidi mfunu na bimvwama bi nsi yi Ngipiti, mu dyambu ti wusikika meso mandi mu musendo wuna kwiza kuntwala.27Mu kiminu, Mose wusisa nsi yi Ngipiti, wulembolo yena bunkuta bu mankesi ma ntinu. Wutelama nakekete bonso muntu wuna yena Nzambi yikwe lembolo yenikanga.28Mu kiminu, wukembila mukembo wu Pake na wumwaka menga, mwanki mbazi yibatambika mu haana lufwa, yilembolo honda baala bantete babakala ba-Isaeli.29Mu kiminu, baala ba Isaeli basabuka mubu wumbwaki bonso ha yulu butoto buyuma. Kansi bisi-Ngipiti batonta mu sabuka, babadyamisa.30Mu kiminu, bibaka bi mbanza yi Yeliko bibwa, mu ntangu baala ba-Isaeli bu bazungidila yo mu bilumbu nsambwadi.31Mu kiminu, nsuza Lahabi kafwa ha kimosi na bantu banangumuka ko, mu dyambu ti wutambula minketi mu kiyenge.32Nki nalendi bwesa ta dyaka e? Naabaka dyaka ntangu ko ye zonzila Ngidoni, Balaki, Samisoni, Yefeti, Davidi, Samueli, mpe na mimbikudi.33Mu dyambu di kiminu babedisa bintinu, basadila lunungu mpe babaka byo Nzambi bi kabasila nsilulu. Bakanga minwa mi bankosi,34bazima tiya tungolo, bavuuka mu mbele yi mvita, baba na bimbevo, kansi babaka dyaka ngolo, balonka ngolo zawu ku mvita, mpe babedisa binwani bi zinsi zi nzenza.35Bakento bayena bantu bawu bafwa bafuluka mu bafwa, bahiika babayenisa mpasi zi lufwa bu babisa babakuula, mwanki bafuluka mu bafwa mpe batambula luzingu luvudidi lumbote.36Bahiika dyaka babayodila, babazuba bikoti, bababindika misinga na babatuula mu boloko.37Mwa bantu bahonda mu matadi, bahiika babazenga mu bibuku byole mu dingwengwe hoti babahondila mu mbele yi mvita. Bahiika dyaka, bayenda mu ndambu ka ndambu, baba balwata mikanda mi mameme hoti mi nkombo, baba zimputu, babafyetikisa na babakwamisa.38Mu yawu nza yiba yilunga ko! Ni bedi kwe dyengidingi ku nsi zinkatu na mu milandu, mu nsye zintadi na mu mabenga.39Bamvimba babateela kimbangi mu dyambu di kiminu kyawu, kansi batambula nsilulu zi basila Nzambi ko.40Mu dyambu ti Nzambi wutukubikila kima kivudidi mfunu. Buna Yandi katya ko ti ba balungisa wulembolo ba neto.Wycliffe Bible Translators, Inc.