ESTHER 1を読んでください。

ESTHER1

Siapharan Ahasuerus nynh Vashti A Dee

¹Ahasuerus she lya, India ram kyate Ethiopia ram cia, za kheit ram kuin lae sari a uktu Ahasuerus she lyakhe e hynh acyihkuh.²Siapharan Ahasuerus tuh khualungrua koihkuhpaw Susa khua umpaw a siapharan tungkhung kya haung zah,³ram a uknaw kum thumnaw kum khe a kuihkaw e bawi hae te ryalahtu hae balyn hanlan loohdangnaw poi a tua. Persia te Media rhawkaw hae, ram cciakhaetu hae te uktu bawi hae tuh oun thua hae,⁴a peenaw kya-e sisua patae, a lesaenaw te a huhan a phu-enaw kha khaw cia, nin za kheit sung tarya lungkhu a muihsah hae.

⁵E nin hae he athang te, Susa khuapi kya um hae paw adih ale balyn hanlan siapharan nynh siapharan inn khokhu voidu lungkhu khe nin sari lungkhu loohdangnaw poi a tuapya hae.⁶Ngun kuihpu atahkuhpaw lung rawpaw tung hae kyakhe sephaphuhpaw boei arui te a raw hae paw zokhawpaw boei arawpaw te apiazong hae a um hae. Aphaekuhpaw lung azong phuinccing, lung sepaw, lung rawpaw, lung manpaw te lung hinpaw vawlan khe sui tungkhung te ngun tungkhung hae a um hae.⁷Siapharan tuh patae a hoipaw athua thyhawte sui banang aphuinphuin te misutui patae kha a nia hae.⁸Misutui kha kheeku leite a nia hae; pawccecize mimaw lungry thyhte a cyi nawlan hae, siapharan nynh siapharan inn e ryalahtu balyn kha kaw a pya hae.⁹Tuhpiaze, Siapharannung Vashti nynh Siapharan Ahasuerus inn kyakhe nopi hae hanlan loohdangnaw poi a tuapya hae.

¹⁰Nin sarinaw nin khe siapharan tuh misutui nynh a lungpawsah zah, amaw a do-oihtu tinriapaw ccungccaw hae lu sari Mehuman, Biztha, Harbona, Bigtha, Abagtha, Zethar te Karkas kha kawpya hae zah,¹¹Siapharannung Vashti a puithyanaw kha ccungccaw hae te bawi hae dosah khylan siapharan bawilukhung khungkute siapharan malang yn pou sah, a cipya hae.¹²Thuasalama tinriapaw ccungccaw hae nynh siapharan kawpyapaw a hopya hae paw kha Siapharannung Vashti nynh phe ei zah pou khyh. E keiccuze siapharan tuh a thinria zah a thin-unaw tuh a lungkhu kya maee lang arua.

¹³Tetuh siapharan nynh phungbya a nyh hae paw mihaw hae kha tuanaw ngia hae zah (pawccecize siapharan nynh phungbya te phunglang a nyhthya hae paw balyn kha tuhcite tuanaw leih a ngia hae,¹⁴tuh-e hae tuh siapharan he a zui hae paw Persia te Media bawi hae lu sari, siapharan mitmae a muihmae hae paw te a peenaw kya alehua hae paw Karshena, Shethar, Admatha, Tarshish, Meres, Marsena te Memukan nynh thua hae):¹⁵“Tinriapaw ccungccaw hae nynh siapharan kawbya a hopya hae paw kha Siapharannung Vashti nynh a cyi khyh keiccuze aphung thyhte a tungvaw pawtemou cyi lan,” cite a hopya hae.¹⁶Tetuh Memukan nynh siapharan te bawi hae malang khe, “Siapharannung Vashti nynh siapharan tungvaw kyalya sei khyh, Siapharan Ahasuerus ram pynpi kya a umpaw bawi balyn te ccungccaw balyn tungvaw kya mah a sei.¹⁷Pawccecize siapharannung nynh e a cyipaw hynh nopi balyn nynh a thae cih hae zah, ‘Siapharan Ahasuerus nynh Siapharannung Vashti kha amaw malang pou lan kawpya zah pou khyh,’ cite a ho cih hae zah mih vawpaw hae kha pawlangria vae lan khyh hae.¹⁸Atunin ccaccei maw hin, siapharannung a cyisahnaw a thae hae paw Persia te Media ram e bawi hae zu hae nynh siapharan kuihkaw e bawi hae kha a rawse cih hae zah, theihryanaw te thinrianaw tuh thang kho vae lan khyh!¹⁹Siapharan nynh na ry zetuh, Vashti hynh Siapharan Ahasuerus malang pou boi nan vae sah, cite namaw kyate kawtho lah, rulae kho athua khyh nawlan Persia te Media phungbya hae kya zei thua sah; te siapharan nynh Vashti laeze ahoy huapaw ccangpaw nopi kha siapharannung lang hoikuh sah.²⁰Te siapharan nynh myarya kopaw a ram pynpi kya thaesahnaw he a rae te, nopi balyn nynh mih vawpaw hae kha a lesaepaw thuasah, a nyaapaw thuasah phe lokuh lang sawtuanaw a pya cih hae,” a ci.

²¹Tuh-e tuanaw pyapaw bya tuh siapharan te bawi hae nynh mih lungrythua zah, Memukan nynh a hopaw bya thyhte siapharan nynh a cyi;²²pise miakaw tuh a innbyn kya kawhoitu athua cih, cite siapharan nynh a ram pynpi kalan, ram takyh kalan khe mimaw ccaw raveihte, minphuin takyh kalan khe mimaw bya raveihte ccaw a ky hae. Esther tuh Siapharannung lang A Tang

¹Tukoute Siapharan Ahasuerus tuh a thinrianaw he adae te, Vashti te aning nynh a la cyipaw te a tungvaw kya kawtho a la thuapaw kha a liathui.²Te siapharan a do-oih hae paw a ryalahtu hae nynh, “Siapharan hanlan apuithyapaw liaccady kha ccungpah oh sih.³Apuithyapaw liaccady balyn kha Susa khuapi, nopi hae umnaw khaan kya suelua khylan, siapharan nynh a ram lungkhu e pee balyn kyakhe bawi kha nung sah, tuh-e nopi hae khaan tuh siapharan kya-e tinriapaw ccungccaw Hegai, nopi hae a uktunung kuihkaw kya a umpaw nynh thua; minmin kha mynkhuhpaw pya thua hae sah.⁴Te siapharan lungry a tungpaw liaccady tuh Vashti ccelang siapharannung lang tang sah,” a ci hae. Tuh-e bya tuh siapharan nynh a lungrythua zah tuhcite a cyi.

⁵Susa khuapi lungkhu khe Judah ccungccaw, a min Mordekai cikuhpaw a um; aning tuh Jair ccapaw, Jair tuh Shimei ccapaw, Shimei tuh Benjamin phin Kish ccapaw nynh thua.⁶Mordekai tuh Babilon siapharan Nebukhadnezzar nynh Judah siapharan Jekoniah ryte kyng hae zah Jerusalem kyate a cciakhae hae paw kya a um buapaw nynh thua.⁷Mordekai nynh a paaw unopaw ccanung Hadassah cikuhpaw Esther kha a kuaku, pawccecize Esther tuh nungpaaw hoi vae khyh; aning tuh sungsah lan um zah myarya a puithya; a nung te a paaw he a chih hae te, Mordekai nynh amaw a ccanung hawte a kuaku.⁸Tukeiccuze siapharan nynh kaw a pyapaw te kaw a thopaw kha thaesah hae zah liaccaw hae patae kha Susa khuapi kya Hegai kuihkaw kya he a pum hae te, Esther kha mah siapharan inn lang teekhae hae zah nopi hae a do-oihtu Hegai kuihkaw khe a nung hae.⁹Esther nynh Hegai lungry kha tung zah a malang maehoynaw a mue, Hegai nynh mynkhuhpaw te a ccou lanpaw looh kha arangte a pya; siapharan inn e popaw ryalahtu nopi hae lu sari kha mah pya zah aning te a ryalahtu nopi hae kha nopi hae umnaw khaan kya ahoy huanaw khe a umsah hae.¹⁰Esther nynh a minphuin te a puizia kha a langsaku khyh nawlan, Mordekai nynh a hopya keiccuze aning nynh langsakuh khyh.¹¹Esther tuh pawtemou a um cipaw te a tungvaw pawtemou a cyi hae cipaw kha ny khylan Mordekai tuh nopi hae khaan voidu malang khe nin takyh a cceih bungthung.

¹²Tuh-e nopi hae hanlan raepaw phung thyhte sawpaw sah haw lae ning he accing te, liaccaw hae tuh lu kheit ccite Siapharan Ahasuerus kalan a tee hae; sawpaw sah taruh tuh mura chitui te, sah taruh tuh mynkhuhpaw te sii phuin khate a dy hae.¹³Liaccaw lu kheit nynh siapharan kalan he a tee vae ze, nopi hae khaan kyate siapharan inn lang ccyngku khylan a rypaw miakaw kha ngiakuh hae zah a pya hae.¹⁴Aning tuh zete khe tee zah awkhua khe siapharan ccungccaw tinriapaw Shaashgaz, lovaenung hae a uktu nynh a do-oihpaw nopi hae khaan ccangningnaw kalan a ki; siapharan nynh ry zah a min te bua a ko lei vae hae paw kha tuh siapharan kalan bua tee vae khyh.

¹⁵Amaw a ccanung hawte a kuakuhpaw Mordekai a paaw uno Abihail ccanung Esther nynh siapharan kalan a teenaw ccyh he athua tuh, siapharan ccungccaw tinriapaw Hegai, nopi hae a do-oihtu nynh tuanaw a pyapaw laelan, Esther nynh pawpaw mah ngiakuh khyh. Esther tuh a muihpaw miakaw nynh a sungsah hae.¹⁶Siapharan Ahasuerus nynh ram a uknaw kum sarinaw, sawpaw sah hawnaw, Tebeth saw khe Esther kha siapharan inn kya he a teekhae hae tuh,¹⁷siapharan nynh Esther kha ccangpaw nopi balyn laeze a sungsahua; liaccady hae balyn laeze siapharan kya-e sungsahnaw te maehoynaw kha a mue, tukeiccuze a lu vawlan siapharan lukhung khungsah zah Vashti ccelang siapharannung lang a khang.¹⁸Tetuh siapharan nynh a kuihkaw e bawi hae te ryalahtu hae balyn hanlan “Esther loohdangnaw poi” cite loohdangnaw poi pi kha a tuapya hae. A kuihkaw e pee hae kha ryalaw haeung nin pya hae zah, siapharan sisua te angaekuhpaw lasung kha a pya hae. Mordekai nynh Siapharan Hiinnaw A Khum

¹⁹Liaccady hae kha vae ningnaw he a pum hae tuh, Mordekai tuh siapharan sakoih kya a haung.²⁰Mordekai nynh a hopya thyhte Esther nynh a minphuin te a puizia kha langsakuh khyh; pawccecize Esther nynh Mordekai bya kha langmaw a la kuaku lya a ngae hawte po a ngae.²¹Tuh ccyh lya, Mordekai nynh siapharan sakoih kya a haung lyakhe siapharan kya-e tinriapaw ccungccaw hae lu ning Bigthana te Teresh, thuakaw ngawtu hae tuh mih thinria zah Siapharan Ahasuerus kha chia lan a paccynku hae.²²Tuh-e tuh Mordekai nynh nyh zah Siapharannung Esther kha a hopya, Esther nynh siapharan kha Mordekai nynh a ho cite a hopya.²³Tuh-e uccaw tuh akaw-aleih khiatua hae zah athua ccaccing cipaw he a muih hae tuh, tuh-e pise hae tuh parouh mawte ccungccaw chianaw thing kya a sae hae. Tuh-e tuh siapharan malang khe phungpaw ccauh kya a zei hae. Haman nynh Judah hae kha A Ro Ry hae

¹Tukoute Siapharan Ahasuerus nynh Agag ccungccaw Hamedatha ccapaw Haman kha a ryalaw kaesah zah, amaw kya um hae paw bawi hae balyn laeze ahangnaw kya a nung.²Te siapharan sakoih kya um hae paw siapharan a ryalahtu hae balyn nynh Haman kha bakhungpah hae zah sawtuanaw a pya hae; pawccecize tuhcite cyi lan siapharan nynh kaw a pya hae. Thuasalama Mordekai nynh tuh bakhungpah khyh zah sawtuanaw mah pya khyh.³Tetuh siapharan sakoih kya um hae paw siapharan a ryalahtu hae nynh Mordekai kha, “Pawccemou siapharan kaw kha na ei?” a cipya hae.⁴Minmin nynh nin takyh hopah hae zah mih bya a ngae khyh keiccuze Mordekai bya hynh atyn tou tyn khyh tou cipaw ny nawlan Haman kha a hopya hae; pawccecize Mordekai nynh minmin kha, kae tuh Judah ccungccaw nynh ka thua, a cipya hae.⁵Mordekai nynh a bakhungpya khyhpaw te sawtuanaw a pya khyhpaw kha Haman nynh he a muih tuh, myarya a thinria.⁶Thuasalama Mordekai kyalya kha chia lanze zaw khyh cite a tua. Te Mordekai a ccungccaw hae tuh paw minphuin nynh athua hae cipaw kha Haman kya a hopya vae hae keiccuze Haman nynh Ahasuerus a ram pynpi kya um hae paw Mordekai ccungccaw hae, Judah hae balyn kha ro lan a paccyn.

⁷Siapharan Ahasuerus nynh siapharan lang a tangnaw kum haw lae ningnaw kum, masaty sawpaw athuapaw Nisan saw khe Haman nynh a paccynnaw kha ccingsah khylan angaekuhpaw anin te asaw kha po khylan Pur cikuhpaw ccungthydungnaw kha Haman malang khe rae hae zah, sawpaw sah haw lae ningnaw Adar saw, nin haw lae thum nin khe accan.⁸Te Haman nynh Siapharan Ahasuerus kha, “Na ram lungkhu e pee hae balyn kya po lekuh lan apazaekuhpaw minphuin phuin kheit a um; mih phunglang tuh ccangpaw minphuin hae phunglang te lae zah, siapharan kawbya kha zui khyh hae, tukeiccuze siapharan nynh mih tungvaw kya ngaesangnaw na hoi lan ccan khyh.⁹Siapharan nynh na nawccaw ze, minmin kha ro lan kawbya thotua, siapharan rya a uktu hae nynh siapharan sisuakhaan lungkhu lang nung lanpaw ngun talent thong haw kha kae nynh ka pya cih hae,” a cipya.¹⁰Tukeiccuze siapharan nynh a kuihdung kya-e tazeih kuihpu kha lah zah, Agag ccungccaw Hammedatha ccapaw Haman, Judah hae rhawpaw kha a pya.¹¹Siapharan nynh Haman kha, “Tuh-e phua tuh nang kha kae pya, tuh-e ccungccaw hae tuh ahoy na ci hawte cyih hae,” a cipya.

¹²Tetuh masaty sawpaw, nin haw lae thum nin khe siapharan ccaw a zeitu hae kha ko hae zah, Haman nynh kaw a pya hae paw balyn thyhte siapharan kuihkaw e bawi hae, pee miakaw kya-e uktu hae te ccungccaw balyn a uktu bawi hae kalan khe, pee takyh kalan mimaw ccaw raveihte, minphuin takyh kalan mimaw bya raveihte kawthopaw ccaw kha Siapharan Ahasuerus min te zei hae zah siapharan kya-e tazeih kuihpu khate tazeih a khia hae.¹³Sawpaw sah haw lae ningnaw Adar saw, nin haw lae thum nin khe Judah ccungccaw balyn, adihpaw te alepaw, nopi hae te imua hae kha nin kheit lungkhu kya maemih lan, chia lan, ro lan te mih uccaw hae kha luade lan kawpyapaw ccaw kha ccaw phutu hae nynh siapharan kya-e pee takyh kalan a cciakhae hae.¹⁴Ccungccaw balyn tuh tuin nin khe paccynkute a um nawlan hae, tuh-e kawpyanawpaw ccaw khawpi tuh pee takyh kalan kawbya lan thaesah lanpaw nynh a um vae.¹⁵Siapharan kawpyapaw thyhte ccaw phutu hae tuh arangte cceih hae zah Susa khuapi kyakhe tuh-e kawbya tuh a tho hae. Siapharan te Haman tuh misutui nia lan a haung hae; thuasalama Susa khuapi tuh pong anuakhaekuh. Judah hae Bawm lan Esther A Nawccah

¹A cyi hae paw balyn kha Mordekai nynh he a thae te, a boeining kha seii zah buriboei kha lawkuh zah buhhaw a phingku, te khualae lungkhu lang cceih zah roi accae lante thawte a rah;²buriboei lawkute humhung mah siapharan sakoih kalan tee phung athua khyh keiccuze siapharan sakoih teenaw kyacia rou nynh a cciathung.³Siapharan kawbya te byapaenaw a thuanaw pee miakaw kyakhe Judah hae laku kya myarya ccihpaw rawkhuinaw, looh-aesungnaw, rawnaw te ngaethyanaw um zah, ccungccaw alunghua tuh buriboei lawkute buhhaw kya a toukuh hae.

⁴Esther a ryalahtu nopi hae te tinriapaw a ccungccaw hae nynh Esther kha he a hopah hae tuh, siapharannung tuh myaryamaw a lungriathae; Mordekai nynh a buriboei kha khahkuh sah lah, a lawku ccaw cite Esther nynh boeining kha a ky; thuasalama Mordekai nynh lawkuh ry khyh.⁵Tetuh Esther nynh siapharan kya-e tinriapaw ccungccapaw, amaw a do-oihtu lang khang athuapaw Hathak kha ko zah, pawmou acyihkuh cipaw te pawccemou acyiku cipaw kha khiatua khylan Mordekai kalan ccia lan kaw a pya.⁶Hathak tuh siapharan sakoih malang, khualae ngaelung umpaw Mordekai kalan cceih zah,⁷Mordekai nynh a tungvaw acyihkuhpaw balyn kha thuasah, Judah hae ro khylan siapharan sisuakhaan kya Haman nynh nung lan bya a kinkupaw phua abalyn kong kha thuasah a hopya.⁸Judah hae ro nawlan Susa khua kya kaw a tho hae paw ccaw khawpi kha Esther dosah khylan te asuilan hopya khylan Mordekai nynh Hathak tuh a pya, te Esther nynh siapharan kalan la cceih sah lah, a minphuin hae hanlan la ngia sah, cite bya a taw.

⁹Hathak nynh cceih zah Mordekai a hopaw bya kha Esther kya a hopya.¹⁰Tetuh Mordekai kya hopya lanpaw bya tuh Esther nynh Hathak kha taw zah,¹¹“Pise thuasah, nopi thuasah siapharan nynh a ko leite, humhung zemah alungkhu lang e voidu lungkhu lang, siapharan kalan a tee zetuh, chia athua cih cipaw phung ccangkheit rou nynh a um. Siapharan nynh a sui ccoi kha a pyalang ze rou nynh tuh-e ccungccaw tuh a hiin cih cipaw kha siapharan a ryalahtu hae te siapharan a pee lungkhu e ccungccaw balyn nynh a ny hae. Kae hynh nin sung thum lungkhu siapharan kalan tee lan ko ka thua vae khyh,” a cipya.¹²Esther nynh a hopaw bya kha Mordekai kya he a hopah hae tuh,¹³Mordekai nynh Esther kalan khungru lanpaw bya kha minmin kya hopah hae zah, “Siapharan inn kya ka um keiccuze ccangpaw Judah hae balyn laeze ka luehua cih cite tuakuh nan.¹⁴Pawccecize atu ccyh lyahin daebabi lan na um zetuh, Judah hae hanlan khynnaw te luenaw tuh ccangpaw hmin kyate yn langkuh cih, thuasalama nang te na paaw innbyn hae tuh na chih cih oh. Nang nynh siapharannung lang na la tangpaw hynh hynhcihawpaw ccyh hanlan mah athua kho, hummou a nyh?” a cipya.¹⁵Tetuh Esther nynh Mordekai kalan byataw zah,¹⁶“La cceih lah, Susa khua kya um hae paw Judah hae balyn kha la pum hae, kamaw ccelang looh-ae la sung oh lah, khuazi khuadae nin thum lungkhu ae mah la ae nan oh, nia mah la neih nan oh. Kae te ka ryalahtu nopi hae nynh mah nanning hawte looh-ae kae la sung cih. Tukoute phung te arawseku zemah siapharan kalan ka la cceih cih; ka chi ze ka chih,” a cipya.¹⁷Te Mordekai tuh cceih zah Esther nynh kaw a pya thyhte marya a cyi. Esther nynh A Raepaw Loohdangnaw Poi

¹Nin thumnaw nin khe Esther nynh amaw kya-e siapharannung boeining kha lawkuh zah siapharan inn alungkhu lang e voidu kya, siapharan khaan te ahawiliakunaw khe a thadyn. Siapharan tuh siapharan inn teenaw te ahawiliakunaw, siapharan inn lungkhu e a bawitungkhung kya a haung.²Siapharan nynh voidu lungkhu a thadynpaw Siapharannung Esther kha he a muih takaw te, Esther tuh maehoynaw mue zah siapharan nynh a kuih kya umpaw sui ccoi kha a pyalang. Tetuh Esther nynh naenuakuh zah ccoi adung kha a hae.³Siapharan nynh, “Siapharannung Esther, pawmou na peki? Pawmou ngia nae ry? Ka peenaw angankuh kha heize kae pya cih,” a cipya.⁴Te Esther nynh, “Siapharan nynh na ry zetuh, siapharan elang ka paccynpaw loohdangnaw poi kalan Haman ryte atunin beih oun thua oh,” a cipya.⁵Tetuh siapharan nynh, “Esther nynh a ry hawte kae cyipya ccaw, Haman kha arangte oun thuakhae oh,” a ci. Tukeiccuze siapharan te Haman tuh Esther nynh a paccynpaw loohdangnaw kalan a cceih hae.⁶Misutui a nia lya hae khe siapharan nynh Esther kha, “Pawmou na ry? Kae pya cih. Pawmou ngiaku nae ry? Ka peenaw angankuh cia heize kae pya cih,” a cipya.⁷Te Esther nynh, “Ka rypaw te kae ngiaku rypaw tuh:⁸Siapharan malang maehoynaw ka mue zah ka rypaw te kae ngiakupaw kha siapharan nynh nae pya ry zetuh, kae paccynpah cih oh paw loohdangnaw poi kalan siapharan te Haman tuh awkhualan beih oun thua oh, te siapharan nynh na ho hawte ka rypaw kha kae hopah cih,” a cipya. Haman nynh Mordekai Chia lan A Paccyn

⁹Tuin nin khe Haman tuh lungtua thawmuinte a pou. Thuasalama Haman tuh Mordekai nynh siapharan sakoih kya sawtuate thadynpya leite, thyngku leite a umpaw kha he a muih tuh, Mordekai tungvaw myarya a thinria;¹⁰tuhzemah Haman nynh synkuh zah a inn lang a cceih. Te a ruiban hae te a zu Zeresh kha a kosah hae,¹¹Haman nynh a hoirumnaw phu-enaw, ccapaw patae a saahkunaw, siapharan nynh sawtuanaw pya zah rya a kaesahnaw balyn te siapharan kuihkaw e bawi hae te ryalahtu hae luki a nungpaw kha a hopya hae.¹²Haman nynh bua hochih zah, “Siapharannung Esther nynh heize amaw a paccynpaw loohdangnaw poi kalan khe kamaw laelan humhung mah siapharan ryte teesah khyh. Awkhualan mah siapharan ryte bua oun kokheih.¹³Thuasalama siapharan sakoih kya a haungpaw Judah ccungccaw Mordekai kha ka muih lungkhu balyn tuh, e ka hopaw balyn hynh ka hanlan thanenaw um khyh,” a cipya hae.¹⁴Tetuh a zu Zeresh te a ruiban hae balyn nynh, “Ccungccaw saenawpaw tung dong sung pangaw ahangpaw kha rae thua sah lah, tuin kyakhe Mordekai kha sae thua sah cite awkhualan awkhua khe siapharan kha hopah; tetuh siapharan ryte lungpawte loohdangnaw poi kalan cceih oh,” a cipya hae. Haman nynh tuh-e tuanaw pyapaw bya tuh a lungrythua zah ccungccaw saenawpaw tung kha a raesah hae. Siapharan nynh Mordekai Sawtuanaw A Pya

¹Tuin khuazi khe siapharan tuh ih kho khyh, te bya ccynawpaw ccauh, phungpaw ccauh hae kha oun lah oh cite kawpya hae zah siapharan kha a riapya hae.²Siapharan Ahasuerus kha chia lan a paccyn hae paw, siapharan kya-e tinriapaw ccungccaw hae, thuakaw ngawtu hae Bigthana te Teresh konglang Mordekai nynh a hopaw a la zei hae paw kha a muih.³Tetuh siapharan nynh, “E konglang te Mordekai kha sawtuanaw thuasah, minhoynaw thuasah pawmou pya athua?” cite a khia hae. Siapharan a do-oihpaw ryalahtu hae nynh, “Amaw hanlan pawpaw mah cyipyapaw um khyh,” cite a hopya hae.⁴Siapharan nynh, “Voidu lungkhu hummou a um?” a ci. Tuh lyatuin Haman tuh Mordekai sae nawlan a raepaw ccungccaw saenawpaw tung kyakhe Mordekai kha sae khylan siapharan kha hopya khylan siapharan inn atolang e voidu kya he a tee takaw lya nynh thua.⁵Tetuh siapharan a ryalahtu hae nynh, “Khuing kya Haman mang um, voidu kya phang thadyn,” a cipya hae. Siapharan nynh, “Alungkhu lang yn tee sah,” a ci.⁶Tukeiccuze Haman tuh yn tee zah siapharan nynh amaw kha, “Siapharan nynh sawtuanaw a pya rypaw ccungccapaw kha pawmou cyipya lan?” cite a khia. Haman nynh, “Kae laeze hum kha vema siapharan nynh sawtuanaw a pya ryhua?” cite a thinlung kya a tua.⁷Tukeiccuze Haman nynh siapharan kyakhe, “Siapharan nynh sawtuanaw na pya rypaw ccungccapaw hanlan,⁸siapharan nynh na lawkupaw siapharan boeining, siapharan nynh na ccikupaw marang te na khungkupaw bawilukhung kha oun lah hae sah.⁹Tuh-e boeining te marang tuh siapharan kuihkaw e bawi hae lakuze a le huaccepaw bawi kha pya hae sah; tuh-e bawi tuh nynh siapharan nynh sawtuanaw a pya rypaw ccungccapaw kha tuh-e boeining tuh lawsakuh sah, te marang kha ccisakuh sah lah, khualae lungkhu cciakhae sah lah, a malang khe, ‘Siapharan nynh sawtuanaw a pya rypaw ccungccapaw kha hynhte cyipya athua cih,’ cite sia sah,” a cipya.¹⁰Tetuh siapharan nynh Haman kha, “Na ho hawte rangsakuh lah, boeining te marang kha la lah hae, te siapharan sakoih kya a haungpaw Judah ccungccaw Mordekai kha tuhcite la cyipah. Na hopaw kha ccangkheit sanmah la me nan,” a cipya.¹¹Tukeiccuze Haman nynh siapharan boeining te marang kha lah zah Mordekai kha marang ccisakuh zah khualae lungkhu cciakhae zah, “Siapharan nynh sawtuanaw a pya rypaw ccungccapaw kha hynhte cyipya athua cih,” cite a sia.

¹²Te Mordekai tuh siapharan sakoih kalan a ki, thuasalama Haman tuh rah zah a lu kha phang bongkuh zah a inn lang arangte a cceih.¹³Haman nynh a tungvaw acyihkuhpaw miakaw kha a zu Zeresh te a ruiban hae balyn kha a hopya hae. A zu Zeresh te tuanaw a pyatu hae nynh, “Amaw malang na khuliapyaku takawpaw Mordekai tuh Judah ccungccaw athua zetuh, amaw kha na tae lan khyh, a malang khe na shung ccaccing cih,” a cipya hae. Haman Ccawbungnaw te Mordekai Hangkunaw

¹⁴Tuhcite minmin nynh bya a hoku cciamang lya hae khe, siapharan kya-e tinriapaw ccungccaw hae tuh oun thua hae zah Esther nynh a paccynpaw loohdangnaw poi kalan khe Haman kha arangte a cciakhae hae.

¹Tuhcite siapharan te Haman tuh Siapharannung Esther ryte loohdangkunaw lungkhu lang a tee hae.²Nin ningnaw kya, misutui a nia lya hae khe siapharan nynh Esther kha bua hopah zah, “Siapharannung Esther, pawmou na ry? Kae pya cih. Pawmou ngiaku nae ry? Ka peenaw angankuh cia heize kae pya cih,” a cipya.³Te Esther nynh, “Pou siapharan, siapharan malang maehoynaw ka mue ze thuasah, siapharan nynh na lungrythua ze thuasah ka rypaw tuh ka hiinnaw hynh beih yn haang—kae ngiaku rypaw tuh ka minphuin hae hiinnaw hynh beih haang hae.⁴Pawccecize kaening, kamaw te ka minphuin hae tuh ro khylan, chia khylan te kae ciimi khylan zua kae thua vae. Kaening tuh nopi pise te see lang zua kae la thua ze, daebabi lan ka um cih; thuasalama siapharan nynh na shungpaw kha rhaw nynh ae rung kho lan khyh,” a cipya.⁵Tetuh Siapharan Ahasuerus nynh Siapharannung Esther kha, “Hummou athua? Teimou a um? E cyi lan a tuakuhpaw tuh hummou?” cite a khia.⁶Esther nynh, “Rawsetupaw te rhaw tuh hynh-e ccungccaw hoyleipaw Haman nynh thua!” a cipya. Tetuh Haman tuh siapharan te siapharannung malang khe myarya a rih.⁷Siapharan tuh thinriate loohdangnaw kyate thokuh zah siapharan khokhu lang a cceih, thuasalama Haman tuh siapharan nynh kae hynh chia lan yn tuaku vae cipaw a ny keiccuze a hiinnaw hanlan Siapharannung Esther kha ngiaku khylan a umhy.⁸Siapharan tuh siapharan inn khokhu kyate loohdangnaw khaan lang he yn thua tuh, Esther a haungnawpaw tungkhung vawlan a bakhungpaw Haman kha a muih; te siapharan nynh, “Kamaw ka inn toulou kya, ka muihnaw hin aning nynh siapharannung kha heize a kyngde cih tou?” cite siapharan nynh ccahe a cih tuh Haman mae kha a bong hae.⁹Te siapharan a do-oihtupaw tinriapaw Harbona nynh, “A bya te siapharan a khumpaw Mordekai kha sae nawlan Haman nynh a inn kyakhe ccungccaw saenawpaw tung, dong sung pangaw ahangpaw kha a bing,” a ci. Te siapharan nynh, “Tuh-e tung kyakhe amaw kha sae oh,” a ci.¹⁰Tukeiccuze Haman tuh Mordekai hanlan a la raepaw ccungccaw saenawpaw tung kyakhe a sae hae. Tetuh siapharan a thinrianaw tuh adae vae. Esther nynh Judah hae A Khum hae

¹Tuin nin khe Siapharan Ahasuerus nynh Judah hae rhawpaw Haman inn tuh Siapharannung Esther kha a pya; Esther nynh Mordekai te a kyngkunaw hae kong kha a hopya vae keiccuze Mordekai tuh siapharan malang yn thua.²Te siapharan nynh Haman kya-e a lawpaw a tazeih kuihpu kha khahkuh zah Mordekai kha a pya. Te Esther nynh Mordekai kha Haman inn a do-oihtu lang a nung.

³Te Esther nynh siapharan kha bua a hopya; siapharan a cculeihpaw khe bakhung zah, Agag ccungccaw Haman nynh Judah hae tungvaw ahoy leipaw a tuakunaw te Judah hae a pheenaw hae paw a paccynkunaw kha ro khylan rawkhuite a ngia.⁴Siapharan nynh Esther tuh sui ccoi kha a pyalang,⁵te Esther tuh thokuh zah siapharan malang thadyn zah, “Siapharan nynh na ry zah na malang maehoynaw ka mue ze thuasah, e uccaw hynh namaw malang ahmepaw thua zah na kya-e nawccawnaw kha ka mue ze thuasah siapharan peenaw balyn kya um hae paw Judah hae kha ro nawlan Agag ccungccaw Hammedatha ccapaw Haman nynh a la zeipaw ccaw ronaw lanpaw kawpyanaw ccaw kha beih zeitua.⁶Pawccecize ka minphuin hae tungvaw accahpaw vawsawnaw kha pawtemou ka teing kho cih? Ka vaeccaw hae nynh a teing hae paw ronaw kha pawtemou ka teing kho cih?” a ci.⁷Tetuh Siapharan Ahasuerus nynh Siapharannung Esther te Judah ccungccaw Mordekai kha, “Dotua oh, Haman inn kha Esther ka pya vae, Judah hae kha chia lan a paccyn keiccuze amaw kha ccungccaw saenawpaw tung kya a sae vae hae.⁸Judah hae te asekuh lante siapharan min te na ry hawte ccaw na zei cih oh zah, siapharan kuihpu khate tazeih na khia cih oh; pawccecize siapharan min te zei thua zah siapharan kuihpu te tazeih khiapaw kawthopaw ccaw tuh ro kho thua vae khyh,” a cipya hae.

⁹Sawpaw sah thumnaw, Sivan saw, nin kuin lae thum nin khe siapharan kya-e ccawzeitu hae kha ko hae zah, India ram kyate Ethiopia ram kyacia, za kheit ram kuin lae sari kya um hae paw Judah hae, bawi hae, uktu hae te ccaccangpaw bawi hae kalan khe Mordekai nynh kaw a pya hae paw balyn thyhte kawthopaw ccaw kha zei hae zah, pee takyh kalan khe mimaw ccaw raveihte, minphuin takyh kalan mimaw bya raveihte a ky hae, Judah hae kalan mah mimaw ccaw te mimaw bya te a ky hae.¹⁰Mordekai nynh Siapharan Ahasuerus min te ccaw kha zei zah, siapharan kuihpu te tazeih a khia koute, siapharan a sahiin phu kya-e marang, lann, kalauh te lann dihpaw a ccikuh hae paw ccaw phutu hae nynh a cciakhae hae.¹¹Tuh-e ccaw tuhte siapharan nynh khua takyh kya um hae paw Judah hae kha sueluate mih hiinnaw thungkhawkute, minmin kha zunghe te a doutu hae pawpaw minphuin athua zemah, pawpaw ram athua zemah mih imua hae te mih nopi hae rymawte tuk lan, chia lan, mih ciimi lan te mih uccaw lua lan kaw a ua hae;¹²tuh-e tuh Siapharan Ahasuerus a ram lungkhu balyn kya, sawpaw sah haw lae ningnaw, Adar sawpaw, nin haw lae thum nin, nin kheit lungkhu kya cyi lanpaw nynh thua.¹³Kawthopaw ccaw khawpi tuh kawbya ccangkheit lante pee takyh kalan, minphuin balyn kalan thaesah khylan nee athua, te Judah hae tuh tuin nin khe mih rhaw hae kha phulaw lan paccynkute a um hae.¹⁴Tukeiccuze siapharan kawbya thyhte, ccaw phutu hae tuh siapharan marang hae kha ccikuh hae zah arangte a ccue hae. Susa khuapi kya kawbya tuh a thaesah hae.

¹⁵Susa khuapi kya lungpawte a sia lya hae khe, Mordekai tuh siapharan boeining apiazong te arawpaw zong kha lawkute sui lukhung kha khungkuh zah laaw te kuakuhpaw sephaphuhpaw angkiccua kha kikuh zah siapharan kyate a cceih.¹⁶Pawccecize Judah hae hanlan awnaw te lungtuanaw, lungpawnaw te sawtua ccounaw a um.¹⁷Pee takyh kya te khua takyh kya, siapharan kawpyapaw te kawthopaw ccaw a thuanaw miakaw kyakhe Judah hae kya lungtuanaw te lungpawnaw um zah poi tuakute haeung nin lang a mang hae. Tuhpiaze, Judah hae kha a ri hae keiccuze ram lungkhu e ccungccaw patae tuh Judah ccungccaw nynh kae thua a ciku hae. Judah hae nynh Mih Rhaw hae Ronaw

¹Siapharan nynh kaw a pyapaw te kaw a thopaw kha ccingsahnaw ccyh nae zah Judah hae kha mih rhawpaw hae nynh kae uk vae cih cite a ngaehoi hae nin, thuasalama tuh-e mih ngaehoinaw tuh phe paleihkuh zah Judah hae nynh mih rhawpaw hae kha a uk hae nin, sawpaw sah haw lae ningnaw, Adar saw, nin haw lae thum nin khe,²Siapharan Ahasuerus a peenaw balyn kya-e mih khua hae raveih khe Judah hae tuh minmin ro lan a paccynkuh hae paw kha tuk khylan a pumkuh hae; ccungccaw balyn tungvaw khe Judah hae rawrinaw nynh a thuanua hae keiccuze humhung nynh mah minmin kha thadynnua ngan khyh hae.³Pee lungkhu e bawi hae balyn, uktu hae, ccangpaw bawi hae te siapharan kuihkaw e bawi hae nynh Mordekai raw a ri hae keiccuze Judah hae kha a bawm hae.⁴Pawccecize Mordekai tuh siapharan inn kya huhan a hoi, a minthaannaw tuh pee takyh kya zeihkuh zah Mordekai tuh huhan houhouh a hoi.⁵Tukeiccuze Judah hae nynh mih rhawpaw hae balyn kha thaloi te bae hae zah theih hae zah a ro hae, te minmin a huatu hae kha mih rythyte a cyi hae.⁶Judah hae nynh Susa khuapi kya ccungccaw za pangaw a chia hae.⁷Parshandatha, Dalfon, Aspatha,⁸Poratha, Adalia, Aridatha,⁹Parmashta, Arisai, Aridai te Vaizatha kha a chia hae,¹⁰minmin tuh Judah hae rhawpaw Hammedatha ccapaw Haman a ccapaw hae lu haw nynh thua hae; thuasalama mih uccaw hae kha tuh luade khyh hae.

¹¹Tuin nin ccaccei khe Susa khuapi kya a chia hae paw ccazing kha siapharan kalan a thaesah hae.¹²Siapharan nynh Siapharannung Esther kha, “Judah hae nynh Susa khuapi kya ccungccaw za pangaw te Haman ccapaw hae lu haw kha a chia vae hae. Tuhlaepaw siapharan pee hae kya pawtevema a cyi hae? Atu pawmou na ry ung? Kae pya cih. Tuhlaepaw pawmou nae ngiakuh ung cih? Kae pya cih,” a cipya.¹³Esther nynh, “Siapharan nynh na ry zetuh, Susa khuapi kya um hae paw Judah hae nynh atunin e kawthopaw thyhte awkhualan mah cyih hae sah lah, Haman ccapaw hae lu haw kha mah ccungccaw saenawpaw tung kya sae hae sah,” a cipya.¹⁴Tukeiccuze tuh-e tuh cyi lan siapharan nynh kaw a pya hae; Susa khua kya kawtho hae zah, Haman ccapaw hae lu haw kha a sae hae.¹⁵Susa khua kya um hae paw Judah hae tuh Adar sawpaw nin haw lae pali nin khe mah pumkuh hae zah Susa khua kya ccungccaw za thum a chia hae; thuasalama mih uccaw kha tuh lawkuh khyh hae.

¹⁶Siapharan pee lungkhu um hae paw ccangpaw Judah hae nynh mah mih hiinnaw thungkhawku khylan a pumkuh hae, te mih rhaw hae kuih kyate khynnaw mue hae zah minmin a huatu hae thong sung sari thong pangaw kha a chia hae; thuasalama mih uccaw kha tuh luade khyh hae.¹⁷Tuh-e nin tuh Adar saw nin haw lae thum nin nynh thua, nin haw lae pali nin tuh haeung hae zah poi nin te lungtua nin lang a mang hae. Purim Poi

¹⁸Thuasalama Susa khua kya um hae paw Judah hae tuh nin haw lae thum nin te lae pali nin khe a pumkuh hae, nin haw lae pangaw nin khe haeung hae zah, tuin nin tuh poi nin te lungtua nin lang a mang hae.¹⁹Tukeiccuze khua taraw hae kya um hae paw, koih leipaw khua kya um hae paw Judah hae nynh Adar sawpaw nin haw lae pali nin kha lungtua nin, poi tua nin, lu kheit te lu kheit aepaw lasung kykute haeung nin lang a mang hae.

²⁰E hae balyn hynh Mordekai nynh ccaw kya zei zah, Siapharan Ahasuerus pee balyn, anaenaw te asawnaw kya um hae paw Judah hae balyn kalan a ky hae,²¹kum takyhte Adar sawpaw nin haw lae pali nin te nin haw lae pangaw nin kha haeung nin lang mang lan a thaesah hae,²²Judah hae nynh mih rhaw hae kuih kyate khynnaw a mue nin hae, ngaethyanaw kha lungtuanaw lang thuasah, rawkhuinaw kha haeungnaw lang thuasah rulaepaw sawpaw lang a mang hae; tuh-e nin hae tuh poi tua nin te lungtua nin, lu kheit te lu kheit aepaw lasung kyku nin te ryachi hae kha lasung pya nin lang mang lan a thaesah hae.²³Tukeiccuze Judah hae nynh phung ccangkheit lante lawkuh takaw hae zah, Mordekai nynh minmin kalan ccaw a la ky hae thyhte a cyi hae.

²⁴Agag ccungccaw Hammedatha ccapaw Haman, Judah hae rhawpaw nynh Judah hae kha ro lan paccynkuh zah minmin maemih khylan te ro khylan Pur cikuhpaw ccungthydungnaw kha a la rae vae;²⁵thuasalama Esther tuh siapharan malang he a thua te, Haman nynh Judah hae a la pheenaw hae paw ahoy leipaw paccynkunaw kha amaw lu vawlan ccawsah te, amaw te a ccapaw hae kha ccungccaw saenawpaw tung kya sae thua hae sah, cite ccaw zeite kaw a tho.²⁶Tukeiccuze e nin hae hynh Pur cikuhpaw bya kha lah hae zah Purim a ci hae. Tuh-e ccaw kya zei athuapaw te e kong kya minmin nynh a tung hae paw balyn te mih tungvaw kya acyihkuhpaw balyn keiccuze,²⁷Judah hae nynh mimaw te mih ciihan hae te minmin kya a kyngkuh bua hae paw ryte ccaw kya azeiku thyhte khyapaw accyh kyakhe tuh-e nin ning tuh kum takyhte apaekuh lei lan po sung lan phung ccangkheit lante mih nawccah zah a tynsah hae.²⁸E nin hae hynh she takyh kya innbyn takyh, pee takyhte khua takyh kya liathui athua cih; e Purim nin hae hynh Judah hae laku kya zosah leite, e nin hae liathuinawpaw poi hynh mih ciihan hae kya dae lan khyh.

²⁹Te Abihail ccanung Siapharannung Esther te Judah ccungccaw Mordekai nynh Purim kong hynh-e ccangningnaw ccaw hynh tynsah khylan ccaw zeinaw kawhoinaw te a zei hae.³⁰Ahasuerus a peenaw lungkhu e ram za kheit ccangkuin lae sari kalan khe, Judah hae balyn daenaw te khynnaw ccaw kha ky hae zah,³¹Judah ccungccaw Mordekai te Siapharannung Esther nynh Judah hae kha kaw a pya hae thyhte, te mih looh-aesungnaw te mih ngaethyanaw te asekuh lante mimaw te mih ciihan hae hanlan phung a hoi hae thyhte, Purim nin hae hynh accyh a khya nin hae kya sung lan kaw a pya hae.³²Siapharannung Esther kawpyanaw nynh Purim poituanaw phung kha tynsah zah, tuh-e tuh ccaw kya zeite a ccy hae.

¹Siapharan Ahasuerus nynh ram kya te rili kya umpaw tuikoih hae kyakhe ngunto a khoisah hae.²A huhan, a thungnaw te Mordekai tungvaw ahangpaw sawtuanaw a pyapaw kong balyn kha Persia te Media ram siapharan hae phungpaw ccauh kya a zei hae.³Judah ccungccaw Mordekai tuh kawhoinaw kya Siapharan Ahasuerus he a zuitu thua zah, Judah hae laku kya huhan hoi zah, a uno hae patae nynh a sungsah hae, pawccecize a minphuin hae hoynaw kha ccungpah hae zah a ccungccaw hae balyn kya daenaw bya kha a ho.

Bible Society of Myanmar

https://app.library.bible/content/1a340f5ae072b2f4