阅读PHUNGHOTU 1

PHUNGHOTU1

Hiinnaw hynh Accakaepaw

¹Jerusalem a umpaw siapharan, David ccapaw phunghotu bya:²Accakaepaw, accakaepaw!Atyn-are hynh accakaepaw nynh thua citePhunghotu nynh a ho.³Ccungccaw nynh khuaninso kaw kyathawte rya a lawpaw balyn hynhpaw thanenaw mou a mue?⁴She kheit thang zah,she kheit yn thua, thuasalamalaephi tuh zungzae atyn.⁵Khuanin tuh yn thua zah a ccah,te yn thuanaw hmin langkhe palou a ki.⁶Khisan tuh alia langkhe zawbung zah,palung langkhe bua azawthung;zaw bungthung zah bua a ki.

⁷Vaw miakaw tuhrili lungkhu lang a lua hae,thuasalama rili tuhabeih cite umlae khyh;vaw hae tuh oun luanaw haetuinaw langkhe kithui hae zah,tuin kyate bua a lua hae.⁸Atyn-are hynh lungriathaelanpaw cci nynh thua;hotae lanpaw thua khyh;mit nynh muih zah dokhin khyh,nakaring nynh thae zahazaw ci um khyh.⁹A la um vae paw khayn um ung cih paw thua zah,cyi kou vae paw khacyi lan ungpaw nynh thua;khuanin kaw kya athawpawpaw sanmah um khyh.¹⁰“Dotua, e hynh athawpaw nynh thua,”cite ho lanpaw uccaw a um tou?Tuh-e tuh aening mawze langmawlyaphe a la um vae paw nynh thua.¹¹Langmawlya e ccungccaw hae khaning athua vae hae, oun um cih pawccungccaw hae kha mah tuh-e hae kouteoun um hae paw nynhnyh vae lan khyh hae.Hawnaw Ccung Thane Leinaw

¹²Phunghotu kae nynh Jerusalem kya Israel siapharan lang he ka tang tuh,¹³vaawlui zakaw kya cyi a la thuapaw balyn kha hawnaw te ccung lan zah akaw-aleih ny lan cite ka tuaku; Pachia nynh ccungccaw hanlan yn la pyapaw ryakunaw hynh lungtuakhaeku lanpaw thua khyh.¹⁴Khuanin kaw kya cyipaw cyisahnaw balyn kha ka muih; abalyn mawte accakaepaw thua zah, khisan nulang deekupaw nynh thua cipaw ka ny.¹⁵Akoupaw kha lawbabin lanrae kho thua khyh,a um leipaw kha ria kho thua khyh.

¹⁶Kamaw te kamaw kha, “Kae tuh kae ka mawze Jerusalem a la ukpaw balyn laeze myaryamaw ka hawhua; ka thinlung nynh hawnaw te nynaw kha ccaerarih lan a ny,” ka ciku.¹⁷Te ka thinlung tuh hawnaw kha thuasah, lungkyh leinaw te ngaeenaw kha thuasah nythya nawlan ka mang. E hynh mah khisan nulang deekupaw nynh athua cipaw ka ny.¹⁸Pawccecize hawnaw alung zelungriathaenaw houh alung,nynaw alungpaw ccungccaw tuhngaethyanaw alung.Hoysahnaw hynh Accakaepaw

¹Kamaw te kamaw kha, “Rangtua, hoysahnaw kha ka cyibua tua cih; namaw te namaw kha na lungtuasaku tua,” ka ciku. Thuasalama hynh-e hynh mah accakaepaw nynh thua.²Nuinpaw hynh ngaeenaw nynh thua. Hoysahnaw hynh pawmou a ccungkia?³Ccungccaw nynh vaawlui zakaw kya sosoh a hiin lyahin, ccungccaw hanlan ahoypaw cyi lanpaw kha ka muih kho mawlaezung, ka thinlung nynh hawnaw a ry keiccuze, ka pyn kha misutui te pawtemou lungtuasah lan cipaw te ngaeenaw kya pawtemou ciaku lan cipaw kha ka ccungku.⁴Myarya lepaw ryalaw kha ka law; inn hae kha ka sakkuh zah misu khokhu hae kha ka raeku;⁵Haetapaw khokhu te thingku ccounaw khokhu hae kha ka raekuh zah, tuin kyakhe thingthae ku aphuinphuin kha ka ccouku.⁶Alethungpaw thingku hae aponaw loram kha tui bu nawlan cite tuili hae kha ka raeku.⁷Seenung te seepaw hae kha ka rekuh hae zah, ka inn kya a puipaw see hae kha mah ka hoi hae; kae ka mawze Jerusalem a la umpaw lukhakheit nynh a hoipaw laeze alung lante, vaetua phu hae te tuuphu hae kha mah patae ka hoi.⁸Siapharan hae te ka ukpaw ram hae kya-e sui te ngun te sisua hae kha ka sueluaku hae; hlawsahthya hae paw nopi pise ka hoi hae, ccungccaw nynh rythyapaw zu patae ka hoi.

⁹Tuhcite kae ka mawze Jerusalem a la umpaw balyn laeze, a hoirum huapaw lang ka tang; ka hawnaw mah ka kya atyn.¹⁰Ka mit nynh a rypaw miakaw kha ka mue; ka thinlung nynh a rypaw hoysahnaw miakaw kha ka sungkuh khyh, reihkute rya ka lawpaw balyn kya thinlung hoysahnaw ka mue zah, tuh-e tuh reihkute rya ka law mee lasung nynh thua.¹¹Tetuh ka kuih nynh a la cyipaw te reihkute rya ka la lawpaw balyn kha ka tuatua zah, abalyn mawte accakaepaw te khisan nulang deekupaw nynh thua, vaawlui zakaw kya mue lanpaw pawpaw mah um khyh.

¹²Tetuh hawnaw, lungkyh leinaw te ngaeenaw kha ka tuathui; siapharan nynh amaw maw e siapharan laeze pawmou a cyi kho? Amaw maw e siapharan nynh a la cyi vae paw rou kha nynh a cyi kho.¹³Awnaw tuh mohnaw laeze ahoyhua hawte, hawnaw tuh ngaeenaw laeze ahoyhua.¹⁴A hawpaw tuh a lu kya mit a hoi,thuasalama a ngaeepaw tuhmohnaw kya a cceih.Tuhzemah mih lu ning mawte phe lokuhpaw kha a tung kalang hae cipaw ka ny.¹⁵“A ngaeepaw tungvaw acyihkuhpaw kha kae ka tungvaw mah yn cyihkuh cih; tukeiccuze myarya ka hawpaw hynh pawmou athane?” cite kamaw te kamaw ka ciku. Te hynh-e hynh mah accakaepaw nynh thua, ka ciku.¹⁶A hawpaw kha thuasah, a ngaeepaw kha thuasah zungzae syntaw kho thua khyh, malang ccyh kya tuh abalyn mawte ning athua cih. A ngaeepaw hawte a hawpaw mah a chih.¹⁷Tukeiccuze hiinnaw hynh ka hua, pawccecize vaawlui zakaw kya cyipaw miakaw hynh kae ka hanlan ngaethya lan umpaw nynh thua, abalyn mawte accakaepaw thua zah khisan nulang deekupaw nynh thua.

¹⁸Khuanin kaw kya reihkute rya ka la lawpaw balyn hynh ka hua, e hae hynh ka nukhu e ccungccaw hanlan ka cciatawsya hahe cih,¹⁹tuh-e ccungccaw tuh a haw lanpaw te a ngaee lanpaw kha hummou a nyh? Pawpawte athua zemah khuanin kaw kya reihkute rya ka lawpaw te ka hawnaw ka mangpaw balyn tungvaw kya aning tuh bawi a la thua cih. E hynh zemah accakaepaw nynh thua.²⁰Tukeiccuze khuanin kaw kya reihkute rya ka la lawpaw balyn te asekuh lante ngaehoinaw um leite ka lungthawthang,²¹pawccecize vaekhakheit tuh hawnaw, nynaw te thyanaw khate reihkute rya a lahtupaw nynh, tuh-e hanlan reihkute rya a lah leipaw mingccangpaw kha abalyn mawte a cciatawpah hahe cih. E hynh zemah accakaepaw te myarya hoyleinaw nynh thua.²²Ccungccaw nynh khuanin kaw kya reihkute rya a lawpaw te a thawthuapaw balyn kyate pawmou a mue?²³Pawccecize tuh-e ccungccapaw a ccyh balyn tuh ngaethyanaw te phe beih zah, a ryalaw tuh lungriathaenaw nynh thua; khuazi ccyh heize a lungdae khyh. E hynh mah accakaepaw nynh thua.

²⁴Ccungccaw hanlan tuh ae te nia, te reihkute ryalawpaw kya lungpawnaw muepaw laeze ahoy huapaw um vae khyh. E hynh zemah Pachia kuih kyate nynh yn thua cipaw ka ny;²⁵pawccecize Pachia kyate holeite hummou ae kho zah, hummou a lungtua kho?²⁶Pachia lungry a tungpaw kha Pachia nynh hawnaw, nynaw te lungpawnaw a pya; thuasalama misei kha tuh ccakhungpaw te pumpaw ryalaw kha a lawsah hae; tuh-e tuh Pachia lungry a tungtupaw kyalya pya lanpaw nynh thua. E hynh zemah accakaepaw thua zah, khisan nulang deekupaw nynh thua.
Atyn-are nynh Ccyh A Hoi

¹Atyn-are hanlan kumvaelori a um, vaawlui zakaw e uccaw miakaw hanlan accyh a um:²pui ccyh um zah chi ccyh a um;ccou ccyh um zah ccoupaw khakhaee ccyh a um;³chia ccyh um zah dansah ccyh a um;phou ccyh um zah sak ccyh a um;⁴raw ccyh um zah nuin ccyh a um;ngaethya ccyh um zah law ccyh a um;

⁵lung hae kha ccaring vua ccyh um zahpynkheihlan suelua ccyh a um;pomku ccyh um zahpomku khyh ccyh a um;⁶ccung ccyh um zah zosah ccyh a um;ccy ccyh um zah vua ccyh a um;⁷seii ccyh um zah, hui ccyh a um;zya dae ccyh um zah byaho ccyh a um;⁸sungsaku ccyh um zah huaku ccyh a um;rhawtukku ccyh um zah adae ccyh a um;Pachia nynh Nawpaw Rya

⁹Ryalahtu hae nynh thawte reihkute rya a law hae paw kyate pawmou a mue hae?¹⁰Pachia nynh ccungccaw miakaw oun pyapaw ryakunaw kha ka ny vae.¹¹Pachia nynh atyn-are kha amaw ccyh te angaekuh lante a rae vae; tuhpiaze nulang ccyh te malang ccyh a um cipaw kha ccungccaw thinlung kya a nysah; tuhzemah Pachia nynh atakaw te athangnaw cia pawtemou a rae cipaw kha ccungccaw nynh nyh kho khyh.¹²Ccungccaw nynh a hiin lungkhu kya, lungtua lungpawte a um lanpaw laeze amaw hanlan ahoy huapaw pawpaw mah um vae khyh;¹³tuhpiaze ccungccaw miakaw nynh a ae lanpaw, a nia lanpaw te reihkute rya a lawpaw miakaw kya a lungtuakhaeku lanpaw hynh Pachia lasung nynh thua.¹⁴Pachia nynh a cyipaw miakaw tuh zungzae atyn cipaw ka ny; biachih khopaw pawpaw mah um khyh zah lawbang khopaw pawpaw mah um khyh; ccungccaw hae nynh amaw malang rawrinaw a hoi ccaw hae cite, Pachia nynh tuhcite a cyi.¹⁵Atu a umpaw hynh a la um vae paw nynh thua; malang yn um cih paw mah a la um vae paw nynh thua; Pachia nynh a la um vae paw kha bua a umsah thui. Laephi vawlan Dingleinaw

¹⁶Tuhpiaze khuanin kaw kyahin byading a umnaw kya hoyleinaw a um, dingnaw a umnaw kya hoyleinaw mah a um cipaw ka ny.¹⁷Pachia nynh miding te mihoy leipaw kha bya a pia cih hae, pawccecize uccaw miakaw hanlan te ryalaw miakaw hanlan accyh a khya vae, cite ka thinlung kya ka tuaku.¹⁸Ccungccaw hynh sarangpaw hawte nynh athua cipaw langsaku khylan Pachia nynh ccungccaw kha a syntawtua, cite ka thinlung kya ka tuaku.¹⁹Pawccecize sarangpaw te ccungccaw hynh athangnaw tuh phe lokuh; sarangpaw a chi hawte ccungccaw mah a chihbua. Parouh te alokuhpaw hy a hoi hae, ccungccaw hynh sarangpaw laeze thanehuanaw hoi khyh; pawccecize abalyn mawte accakaepaw nynh thua.²⁰Abalyn mawte hmin san kheit kalan nynh a ccia hae; abalyn mawte laenoi kyate oun thua hae zah, laenoi kalan bua a ki hae.²¹Ccungccaw muisaw tuh palung lang kaethung zah, sarangpaw muisaw tuh alia lang laephi kalan a cceihbung cipaw hummou a nyh?²²Tukeiccuze ccungccaw hanlan tuh a ryalaw kya a lungtua lanpaw laeze ahoy huapaw pawpaw mah um vae khyh cipaw ka ny. Tuh-e tuh amaw hanpaw nynh thua; amaw nukhute pawmou a um cih cipaw ny khylan hum nynh mou a hopah kho cih?

¹Te khuanin kaw kya cyi athuapaw tuaasahkunaw balyn kha bua ka muih. Tuaasahkunaw a ing hae paw mitphi khuh dotua, minmin kha lungtangnaw a pyatu lu kheit san um khyh! A tuaasahtu hae kuih kya tuh huhan a um, tuaasahkunaw a ing hae paw kha lungtangnaw a pyatu lu kheit san um khyh.²Te a chih vae paw michi tuh a hiin ungpaw mihiin laeze a lungtua huapaw nynh thua cite ka tua;³thuasalama minmin parouh laeze a um boi loh leipaw, khuanin kaw kya ahoy leipaw cyisahnaw a muih boi leipaw tuh ahoyhua.⁴Oute reihkute ryalawnaw balyn te ryalawthyanaw balyn hynh lu kheit te lu kheit eiungnaw kyate nynh yn thua cipaw ka ny. E hynh zemah accakaepaw thua zah, khisan nulang deekupaw nynh thua.⁵Mingaee nynh tuh a kuih pomkuh zahamaw ngesaw kha a roku.⁶Lungdaete kuihphe kheit hoi tuhreihkute ryalawkuh zahkhisan nulang deekutekuihphe ning hoi laeze ahoyhua.

⁷Tukoute khuanin kaw kya accakaepaw bua ka muihpaw tuh:⁸Ccungccaw lu kheit tuh a makhaete um zah, ccapaw te uno mah hoi khyh; tuhzemah reihkute rya a lawpaw kha thang khyh zah, a mit tuh a hoirumnaw khate papinmaw a lungryachikhaekuh khyh. “Hum hanlan mou reihkute rya ka lah zah, hoysahnaw hoi leite ka um?” cipaw tuakuh khyh. E hynh mah accakaepaw thua zah lungtuakhaeku leipaw ryakunaw nynh thua. Ruiban Hoi tuh Ahoy

⁹Lu kheit laeze lu ning ahoyhua, pawccecize reihkute ryalaw mee alunghua a mue hae.¹⁰Lukhakheit nynh a khuliaku ze, ccangpaw lu kheit nynh a tho cih; thuasalama lu kheit makhaete tuh a khuliaku ze ngaethya kou a um, a bawmtu hoi vae khyh.¹¹Lu ning te pynkheihlan a i hae ze mih khualung; thuasalama lu kheit makhaete tuh pawtemou a khualung kho cih?¹²Lu kheit nynh ccangpaw lu kheit kha a tae kho zemah, lu ning nynh tuh lu kheit kha a tae cih. Ccangthum te ruepaw liarue tuh zoikadeihte pae khyh.

¹³Tuanaw pyakupaw a lawkuh leipaw siapharan ataw vae paw laeze a hawpaw mino a ryachipaw tuh ahoyhua.¹⁴Thonginn kyate yn poupaw ccungccaw mah thuasah, tuhkhyhze peenaw kya ryachi te a la puipaw nynh heize mah thuasah siapharan lang a tang kho.¹⁵Khuanin kaw kya a umpaw ahysuepaw balyn nynh siapharan lang a tangrupaw khah-e minopaw kha a zui hae cipaw ka ny;¹⁶aning nynh a cciakhae hae paw ccungccaw balyn tuh riatae um khyh. Tuhzemah nyalang oun um hae paw nynh tuh a tungvaw mih lungtua lan khyh. Thanccingte hynh-e hynh mah accakaepaw thua zah khisan nulang deekupaw nynh thua. Sawtuanaw, Zakawsangsakunaw te Lungryachinaw

¹Pachia inn lang na ccia vae ze, na laanccia kha la raeringkuh; mingaee hae nynh silawnaw raepaw laeze bya ngaeku khylan naekute ccia tuh ahoyhua; pawccecize mingaee hae nynh ahoy leipaw rae kha pawtemou sibia lan cipaw nyh khyh hae.²Byaho lan rangsakuh nan; Pachia malang byaho lan na thinlung te rangsakuh nan, pawccecize Pachia tuh vaawram um zah, nang tuh lae vawlan nynh na um; tukeiccuze na bya zya sah.

³Lungriathaenaw alung ze maan alung, te a ngaeepaw tuh bya patae a ho.

⁴Pachia kalan byakinkunaw na rae ze, ccingsah lanpaw na thysung nan sah; pawccecize a ngaeepaw tungvaw lungtuanaw hoi khyh. Bya na kinkupaw kha ccingsah tua.⁵Bya na kinkuh zah, ccingsah leite na umpaw laeze bya na kinku khyhpaw kha ahoyhua.⁶Na bya nynh seinaw kalan ae cciakhae nan sah, “Ka cyiseipaw nynh thua,” cite locceihtu malang ho nan; pawccemou Pachia nynh na bya kha a thinria zah na cyipaw ryalaw kha ryakhae a ro lanpaw tuh?

⁷Maan patae sah te bya patae ho tuh accakaepaw nynh thua; Pachia raw kha la rih.

⁸Ram ramkhakheit kya ryachi hae tungvaw tuaasahkunaw um zah, byading te ahmepaw a um khyhpaw kha na muih lanze na ngaeangthua nan sah; pawccecize ahangpaw bawi kha ccangpaw ahang huapaw bawi nynh a thungkhaw; te minmin laeze ahang huapaw bawi lu kheit a um ung.⁹Laephi kyate a poupaw tuh ccungccaw balyn hanlan nynh thua; siapharan nynh mah loo kha a doliakuh.

¹⁰Phua a rypaw ccungccaw tuh phua te a lungryachikhaekuh lan khyh; sisua a rypaw tuh a muepaw khate a lungryachikhaekuh lan khyh. E hynh mah accakaepaw nynh thua.

¹¹Hoipaw uccaw alung ze, a aepaw ccungccaw mah alung; uccaw a hoitu tuh a uccaw kha a mit te a muih laelan, ccangpaw pawmou a mue?

¹²Ryalahpaw tuh beihtaraw a ae zemah, patae a ae zemah hoyte a ih; thuasalama mihoipaw tuh a sisua pataepi kha nynh amaw kha isah kho khyh.

¹³Khuanin kaw kya ngaethya lan umpaw hoyleinaw ka muihpaw tuh: a hoitu nynh amaw vawsaw nawlan a hoirumnaw kha a ccyku,¹⁴tuh-e hoirumnaw tuh ahoy leipaw ryalaw keiccuze phe azo; aning nynh ccaaw a saah zemah, a ccaaw hae hanlan a kuih kya pawpaw mah um khyh.¹⁵A nung vue kyate a sasete yn pui hawte, a sasete bua a ki cih; thawte rya a la lawpaw hanlan a kuih te pawpaw mah ccyngkuh lan khyh.¹⁶E hynh mah myarya thahpaw hoyleinaw nynh thua: yn thua lya hawte a cceih cih; khivae hanlan thawte rya a law hae paw kyate pawmou a mue cih hae?¹⁷A she lungkhu balyn mohnaw kyakhe looh ae zah, lungriathaenaw, ccinaw te thinrianaw te a um.

¹⁸Ahoy cite ka muihpaw tuh: khuanin kaw kya Pachia nynh aening oun pyapaw hiinnaw ccyh syntaraw kyahin ae te nia, te ah ryalaw kyate muepaw kyakhe lungtuakhaeku hynh nynh thua; pawccecize tuh-e tuh aening hanpaw nynh thua.¹⁹Pachia nynh ccungccaw miakaw kha sisua te hoirumnaw a pya, ccungccaw tuh tuh-e hae kyakhe a lungtuakhaekuh zah amaw hanpaw kha ccoute a ryalaw kya lungtuanaw a mue—tuh-e tuh Pachia lasung nynh thua.²⁰Pachia nynh a thinlung kya lungtuanaw a pya keiccuze nulang e a hiinnaw ccyh kha liathui vae lan khyh.

¹Khuanin kaw kya ka muihpaw hoyleinaw a um, tuh-e tuh ccungccaw tungvaw kya rikalae lan phang a um:²Ccungccaw nynh a rypaw balyn kha hobounaw a um khyh ccaw cite, Pachia nynh sisua, hoirumnaw te sawtuanaw kha a pya, tuhzemah khah-e uccaw hae kyakhe lungtuakhaekunaw kha Pachia nynh a pya khyh keiccuze mingccangpaw nynh a lungtuakhaekuh. Tuh-e tuh accakaepaw thua zah ngaethya lan umpaw hoyleinaw nynh thua.³Ccungccapaw nynh ccaaw za kheit saahkute kum patae a hiin kho; thuasalama hiin hoynaw kya lungtuakhaeku leite, shawku kya uukunaw a um khyh lanze, tuh-e paw laeze chite yn puipaw imua tuh ahoyhua.⁴Pawccecize tuh-e imua tuh accakaepaw lang yn pui zah mohnaw kalan a cceih, a min tuh mohnaw khate bong athua;⁵tuhpiaze tuh-e imua tuh khuanin kha muih boi khyh zah pawpaw mah nyh khyh.⁶Masaty e ccungccapaw tuh kum thong ning a la hiin zemah hoynaw kha a lungtuakhaekuh khyh, atyn-are hynh san kheit kalan khaw a ccia hae?

⁷Ccungccaw nynh thawte rya a lawpaw balyn hynh khalang lungkhu lang bawku khylan a la thua zemah, ae rynaw thinlung tuh a hoi mamin.⁸A hawpaw tuh a ngaeepaw laeze pawmou a thanehua? A hiin hae paw malang khe pawtemou um lan cipaw a nykuh hae paw ryachi hae tuh pawmou a thane hae?⁹Mit te muihpaw thanenaw hynh rylenaw thinlung te vaevui laeze ahoyhua; e hynh zemah accakaepaw thua zah khisan nulang deekupaw nynh thua.

¹⁰A la umty vae paw pawpaw zemah minphuty vae paw nynh thua, ccungccaw hynh pawmou athua cipaw ny athua, te ccungccaw tuh amaw laeze athung huapaw te rawseku kho thua khyh.¹¹Bya patae ho ze accakaepaw houh alung, tuhte athua lanze ccungccaw hanlan pawmou athane?¹²Mynlyh hawte azothyapaw, accakaepaw ccungccaw hiinnaw syntaraw hanlan pawmou ahoy cipaw hummou a nyh? Amaw a chih koute khuanin kaw kya pawmou yn cyihkuh cih cipaw hum nynh mou a hopah kho?¹Minhoynaw tuh aphutepawzimuin laeze ahoyhua,chi nin tuh pui nin laeze ahoyhua.²Michi a umnaw inn lang ccia tuhpoituanaw inn lang ccia laezeahoyhua;pawccecize chinaw tuhccungccaw miakawathangnaw thua zah, tuh-e tuhahiinpaw ccungccaw nynha thinlung kya a nyku lanpaw nynh thua.³Ngaethyanaw tuhnuinpaw laeze ahoyhua,pawccecize maesue ngaethyanaw liatethinlung kha a lung a tuasah.⁴A haw hae paw thinlung tuhmichi a umnaw inn kya a um;thuasalama a ngaee hae paw thinlung tuhhoysahnaw inn kyakhe nynh a um.⁵A ngaeepaw nynhhlaw a sahpaw kha ngae laezea hawpaw nynh a penawpaw bya khangae tuh ahoyhua.⁶Pawccecize a ngaeepaw nynha nuinpaw tuhang akaw e maee a u cciamangpawhinpaw ku aroi te nynh aloku;e hynh zemah accakaepaw nynh thua.⁷Thanccingte, tuaasahkunaw nynha hawpaw kha a ngaeesah.pyaruh nynh thinlung kha a ro.⁸Uccaw athangnaw tuhathonaw laeze ahoyhua;lungsaenaw thinlung tuhlysakunaw thinlung laeze ahoyhua.⁹Na thinria zoi nan sah,pawccecize thinrianaw tuha ngaeepaw thinlung kya nynh a um.¹⁰“Pawccepei langmawlya khaatu laeze a la hoyhua?” cite ho nan.Pawccecize tuh-e na khiapaw tuhhawnaw kyate yn thuapaw thua khyh.¹¹Hawnaw tuh rho hawte hoy zah,khuanin a muih hae paw hanlanathanepaw nynh thua.¹²Pawccecize hawnaw nynha pyapaw khynnaw tuh phua nynha pyapaw khynnaw te nynh aloku;nynaw a hoipaw tuh hawnaw hoi zah,hawnaw nynh hiinnaw kha a pya,tuh-e tuh nynaw athanenawpaw nynh thua.¹³Pachia ryalaw kha hoyte tuatua;aning nynh phe a kousah vae paw khahum nynh mou lawbabin lan a rae kho?

¹⁴Acyikuthya ccyh lya lungtuate um lah, vawsaw ccyh kya hoyte tuatua; ccungccaw nynh a chih koute yn um cih paw kha pawpaw mah a ny khyh ccaw cite, Pachia nynh lungtuanaw kha umsah zah, vawsawnaw kha mah a umsah. Hiinnaw Byakhupaw

¹⁵Accakaepaw ka hiinnaw kya atyn-are kha ka muih vae; miding nynh a dingnaw kyakhe chih zah, ccungccaw hoyleipaw tuh ahoy leipaw a raenaw kyakhe a hiinshe asae.¹⁶Eih ding kaesy nan lah, eih haw kaesy nan; pawccemou namaw te namaw ryakhae na roku lanpaw tuh?¹⁷Eih hoy khyh kaesy nan lah, a ngaeepaw mah la thua nan; pawccemou na ccyh azaw maw ryakhae na chi lanpaw tuh?¹⁸Uccaw ccangkheit kha phang kyngte ccangpaw ccangkheit kha zuasah leipaw tuh ahoypaw nynh thua; pawccecize Pachia raw a rihpaw nynh tuh tuh-e ccangning mawkhate a tae cih.

¹⁹Khuapi kya um hae paw uktu lu haw laeze hawnaw nynh ahawpaw lu kheit kha thawzung a hoisah hua.

²⁰Thanccingte, seinaw papin hoi leite hoynaw kyalya raete adingpaw ccungccaw laephi vawlan lu kheit sanmah um khyh.

²¹Ccungccaw hae nynh a ho hae paw miakaw kha na peki nan sah, tuhkhyhze tuh na ryalahtu nynh thya ae lawpaw kha na thaesei cih;²²Namaw nynh mah mingccangpaw hae tungvaw avae patae thya na law hae paw kha na thinlung nynh a ny.

²³E balyn hynh hawnaw te ka syntawtua vae; “A hawpaw lang ka tang cih,” cite ka la tuaku, thuasalama hawnaw tuh kae te asawkuh.²⁴Hawnaw hynh thaethya aru, myarya khu zah, hum nynh mou a muih kho?²⁵Hawnaw te uccaw hae konglang kha ny khylan, thaethya khylan te ccung khylan zuakute ka tua, te hoyleinaw te ngaeenaw kha thaethya khylan ka zuaku.²⁶Chinaw laeze akhah huapaw, kaang athuapaw nopi kha ka muih, a thinlung tuh kaang te miabu thua zah, a kuih tuh heenawpaw bawtary nynh thua; Pachia lungry a tungpaw tuh tuh-e nopi kyate a lue, thuasalama misei tuh tuh-e nopi nynh a kyng.²⁷Dotua, ka muihpaw tuh hynh-e hynh nynh thua cite Phunghotu nynh a ci, ka ccung zah ka muih loh leipaw kha muih khylan, ccangkheit koute ccangkheit ka tuatua,²⁸buabua ka ccung zahmah ka muih khyh. Ccungccaw thong kheit laku kya ahawpaw pise lu kheit ka muih, thuasalama tuh-e hae laku kya ahawpaw nopi lu kheit san ka muih khyh.²⁹E ccangkheit kyalya hynh ka muih: Pachia nynh ccungccaw hynh miding lante a la rae, thuasalama ccungccaw nynh paccynkunaw patae kha a hoi.

¹Hummou ahawpawccungccaw hawte athua?Uccaw asuilan ccaesahnaw khahummou a nyh?Hawnaw nynh ccungccaw mitmae khaawsah zah,maesue hoyleinaw kha a rulae.

²Athyaapaw byakinkunaw kha na rae vae keiccuze siapharan nynh kaw a pyapaw kha cyitua.³Rih nan; siapharan a umnaw kyate cciatua, hankhakheit kha a lungry athua vae khyh ze, na nenung nan sah, pawccecize aning nynh a rypaw miakaw kha a cyi kho.⁴Siapharan bya tuh huhan a hoi, “Pawmou na cyi?” cite hum nynh mou a hopah ngan cih.⁵A kawpyapaw kha a zuipaw miakaw tuh vawsaw tung lan khyh, ahawpaw ccungccaw thinlung nynh tuh accyh te cyi zia kha a nyh cih.⁶Pawccecize ccungccaw hae vawsawnaw tuh ccungccaw hae tungvaw kya myarya ri salamah, uccaw miakaw nynh amaw accyh te cyinaw zia bebe a hoi hae.⁷Accaccingte, ccungccaw nynh pawmou yn cyihkuh cih cipaw nyh khyh, pawccecize pawte yn cyiku lanpaw kha hum nynh mou a hopah kho?⁸Humhung nynh mah hy kha khee khylan hy a ukpaw huhan kha hoi khyh zah, chi nin a ukpaw huhan kha mah hoi khyh; tuh-e rhawtukkunaw kyate pounaw kaw um khyh, hoyleinaw a raetupaw kha hoyleinaw nynh luesah khyh.⁹Khuanin kaw cyi athuapaw balyn hynh ka tua zah, e hae balyn hynh ka muih: Lu kheit nynh mingccangpaw kha vawsawnaw pya khylan huhan a mangnua.

¹⁰Oute shaw kya a uu hae paw ccungccaw hoylei hae paw kha ka muih; minmin tuh hmin thyaa kya leih a tee hae paw te a pou hae paw thua hae zah, tuhcite a cyinaw hae khua kya thehoynaw a ccou hae paw nynh thua hae. E hynh mah accakaepaw nynh thua.¹¹Ahoy leipaw cyisahnaw kya detahnaw palou a um khyh keiccuze ccungccaw thinlung tuh ahoy leipaw cyi lan paccynkunaw te phe abeih.¹²Misei hae nynh hoyleinaw kha avae patae a rae hae zemah mih hiinshe asae; tuhzemah Pachia raw a rih hae paw tuh amaw malang rawrite a um hae keiccuze hoynaw a ccou cih hae cipaw ka ny,¹³thuasalama ccungccaw hoy leipaw tuh Pachia malang rawrite a um khyh keiccuze hoynaw ccou lan khyh, mynlyh alopaw mih hiinshe tuh sae lan khyh.

¹⁴Laephi vawlan acyihkuhpaw accakaepaw ccangkheit a um, ccungccaw hoylei hae paw nynh mih cyisahnaw thyhte a ing lan hae paw kha adingpaw ccungccaw hae nynh ing hae zah, adingpaw ccungccaw hae nynh mih cyisahnaw thyhte a ccou lan hae paw kha ccungccaw hoylei hae paw nynh a ccou hae. E hynh mah accakaepaw nynh thua ka ci.¹⁵Tukeiccuze lungtuanaw hynh ka nawccah, pawccecize khuanin kaw kya ccungccaw hanlan aete niate mawtemaw lungtuanaw laeze ahoy huapaw pawpaw mah um vae khyh; pawccecize Pachia nynh khuanin kaw kya ccungccaw a pyapaw hiinnaw ccyh kya thawte rya a law lungkhu hynh-e hynhte a hiinkhaekuh.

¹⁶Hawnaw ny khylan te laephi vawlan a law hae paw ryalaw hae kha muih khylan he ka tua tuh, khuazi khuadae i leite ka um,¹⁷tetuh khuanin kaw kya acyihkuhpaw, lu kheit nynh sanmah muih kho leipaw Pachia ryalaw balyn kha ka muih. Zuakute a ccung hae zemah muih lan khyh hae; a haw hae paw nynh ny lan a tuaku hae zemah muih kho khyh hae.

¹E uccaw balyn hynh akaw-aleih do mamiate ka tua zah miding hae te mihaw hae tuh mih cyisahnaw balyn ryte Pachia kuih kya nynh a um hae; sungsakunaw tou athua, huakunaw tou athua cipaw ny kho um khyh. Ka malang pawmou a um cipaw a nyh khopaw hum san um khyh.²Ccungccaw balyn kalan phe lokuhpaw uccaw kha yn thua, a dingpaw te a ding leipaw, a hoypaw te a hoy leipaw, a thyaapaw te a thyaa leipaw, silawnaw a raepaw te a rae leipaw tungvaw yn thuapaw uccaw tuh phe lokuh. Ccungccaw hoy hae paw tuh misei hae te lokuh hae zah, bya a kinkuh hae paw tuh bya a kinkuh lei hae paw te phe lokuh hae.³Khuanin kaw kya acyihkuhpaw balyn kyaze ahoy leipaw ccangkheit tuh: ccungccaw miakaw nynh uccaw ccangkheit kha ah tung kalang oh. Tuhpiaze, ccungccaw hae thinlung tuh hoyleinaw te phe abeih; mih hiin lungkhu balyn ngaeenaw tuh mih thinlung kya phang a um, tukoute michi hae kalan a cceih hae.⁴Thuasalama a hiin hae paw ryte a umkheihpaw miakaw tuh ngaehoinaw a hoi, pawccecize ahiinpaw ui tuh achihpaw chindeih laeze ahoyhua.⁵A hiin hae paw nynh tuh kae chih cih cipaw a nyku hae, thuasalama a chih hae paw nynh tuh pawpaw mah nyh vae khyh hae; mue lanpaw lasung mah hoi vae khyh hae zah, minmin kha ning athua vae hae.⁶Mih sungsakunaw, mih huakunaw te mih eiungkunaw hae tuh phe azo vae; khuanin kaw kya acyihkuhpaw balyn hynh papin sekuh bua vae lan khyh hae.

⁷Cceih, na looh kha lungtuate ae lah, na misutui kha lungpawte neih; pawccecize Pachia nynh na cyipaw kha a naw phe ccaw vae.⁸Na boeining tuh rawpaping lan zungzae um sah; na lu kya thuhkupaw atui kha rousah nan.⁹Khuanin kaw kya Pachia nynh ae pyapaw, accakaepaw na hiinnaw ccyh balyn kha na sungsahpaw na zu ryte lungpawte mang oh, pawccecize tuh-e tuh khuanin kaw na hiin lungkhu na hanpaw thua zah, thawte rya na law mee nynh thua.¹⁰Na law lanpaw ryalaw miakaw kha na thawzung balyn te lawtua; pawccecize na cceih cihnaw Sheol kya tuh ryalaw, tuanaw, nynaw te hawnaw um vae khyh.

¹¹Khuanin kaw kya bua ka muihpaw tuh: ccuetaekunaw kya arang huapaw nynh tae zungzae khyh, rhawtukkunaw kya a thawsae huapaw nynh tae zungzae khyh, ahawpaw ccungccaw nynh looh hoi zungzae khyh, hawnaw a hoipaw nynh mihoipaw lang tang zungzae khyh, cyithyanaw a hoi huapaw nynh maehoynaw mue zungzae khyh; accyh te ccyhhoypaw tuh ccungccaw balyn hanlan a um cipaw ka muih.¹²Humhung nynh mah ro ccyh kha nyhty khyh. Mia kya a kaepaw ngasaw hawte thuasah, kaang a kaepaw pavaw hawte thuasah ccungccaw hae kha shethya nynh vaekheitmawte he a thuanua hae tuh, shethya kaang a kae hae. Ngaeenaw laeze Hawnaw Ahanghua

¹³Khuanin kaw kya hynh-e hawnaw kong tousenaw hynh mah ka muih, hynh-e hynh ka hanlan myarya abyapipaw nynh thua cite ka tua.¹⁴Khua khuakheit la um zah, tuin kya ccungccaw beihtaraw la um hae. Alesaepaw siapharan lu kheit nynh tuh-e khua tuh thiing lan la ccianua zah a la koihlu, thungkhawkunawpaw kha a la raenua.¹⁵Tuh-e khua kyatuin a ryachipaw mihawpaw lu kheit la um zah, tuh-e paw nynh a hawnaw liate khua kha a la khum. Tuhzemah tuh-e ryachipaw tuh lu kheit nynh sanmah nyh khyh hae.¹⁶Tukeiccuze, “Hawnaw hynh thawzung laeze ahoyhua; tuhzemah ryachipaw hawnaw kha theihrya hae zah, a bya kha pawlangria khyh hae,” cite ka ho.¹⁷Uktu nynh mingaee hae lakuthawte a siapaw laezea hawpaw nynh zyazyatea hopaw bya ngae tuh ahoyhua.¹⁸Hawnaw tuh rhawtuknawpawzunghe laeze ahoyhua,thuasalama misei lu kheit nynhhoynaw patae kha a ro.¹Achihpaw myn hae nynhzimuin a raetu kya-emynkhuhpaw kha a thuhsah;tuhawte adihpaw ngaeenaw tuhhawnaw te sawtuanaw laeze arihua.²Ahawpaw ccungccaw thinlung tuhamaw a ranglang kuih kyakhe a um,thuasalama a ngaeepaw thinlung tuhamaw a voilang kuih kya nynh a um.³Mingaee tuh laanpia ccia lyakhe heize tuanaw hoi khyh,mingaee athuanawpaw khaccungccaw miakaw kya a langsaku.⁴Uktu bawi nynh na tungvaw a thinria ze,na ryalaw kha poutaw nan,pawccecize daebabi lan zya um liatecyiseinaw alepaw kha ngaethya kho athua.

⁵Khuanin kaw ka muihpaw hoyleinaw ccangkheit a um, tuh-e tuh uktu bawi cyiseinaw liate yn poupaw nynh thua:⁶mingaee hae tuh ahangnaw hmin kya um hae zah, mihoi hae tuh anenaw hmin kya a haung hae.⁷See hae nynh marang ccikuh hae zah, bawi hae nynh see hae hawte mih ccu te a ccia hae paw kha ka muih vae.⁸Hunghua a karouhpaw tuhtuh-e hunghua lungkhu lang a ccah cih;koihpaw lungrua a khyhpaw tuhhupaw nynh a tuh cih.⁹Lung a khyhpaw tuhtuh-e lung keiccuze vaemaw a mue cih.Thingtung a buapaw tuhtuh-e thingtung keiccuzevaemaw a mue cih.¹⁰Hae tuh he angoih tetaaw leite um lanze,thawzung patae thua aho;hawnaw nynh ccungccaw khalaansui-uanaw a pya.¹¹Hupaw nynh oun tuh mawkhehupaw kha naawty khyh zetuh,hupaw naawthyatu tuh thane vae khyh.

¹²Mihawpaw bya nynh amaw khamaehoynaw a muesah,thuasalama mingaee munglae nynh tuhamaw kha a ro.¹³Mih byaho tuh ngaeenaw tetho zah ahoy leipawngaeenaw khate athang.¹⁴Mingaee tuh apaekuh lei lanbya a ho.Yn cyihkuh cih paw khahum nynh san nyh khyh,malang pawte yn cyiku lanpaw khahummou a ho kho?¹⁵Mingaee ryalaw nynhamaw toulou kha myarya a bangsah,pawccecize khua langa cceihpaw laanpi sanmahnyh vae khyh.

¹⁶Ram uktu siapharan tuhzawthaw taraw thua zah,ram kya-e bawi hae tuhawkhua takaw khe poi a tua hae,tuh-e ram tuh ngaethya lanumpaw ram nynh thua.¹⁷Ram uktu siapharan tuha sung-epaw thua zah,ram kya-e bawi hae tuhzu-aenaw hanlan thua leite,thawzung hanlan citeangaekuhpaw ccyh kyakhepoi a tua hae, tuh-e ram tuhalungtuapaw ram nynh thua.¹⁸Thawnawnaw keiccuzeinn lungkhu acia,sawphahkunaw keiccuze inn azu.¹⁹Nuin khylan poi a tua hae,misutui nynh lungtuasah zah,phua nynh rypaw miakaw a cyi kho.²⁰Siapharan kha na thinlung teheize thyalaw nan,mihoipaw kha na ikhung kyaheize thyalaw nan;pawccecize azouthyapawpavaw nynh tuh-e roi khaa zoukhae cih, tuhkhyhze sake saepawahysuepaw nynhtuh-e kong tuh a ho cih.Zuakunaw Mee¹Na looh kha tui vawlan vuatua,nin patae aro te na muethui cih.²Na hoirumnaw khasan sari khyhze san tarya langphiate nung, pawccecizelaephi vawlan pawcihawpawronaw mou yn cyihkuh cihcipaw na nyh khyh.³Maeking tuh khuaatui te he abeih te,laephi vawlan khuaa arah;thingku tuh alia lang a pu zemah,palung lang a pu zemaha punaw hmin kyakhe a huekuh.⁴Khivae a ngawpaw tuhccacii tukuh boi lan khyh;maeking a ngaehoipaw tuhloohruekuh boi lan khyh.

⁵Hy nynh ccaawpoipaw nopi vue kya a umpaw ru hae kalan pawtemou a thua cipaw na ny khyh hawte, atyn-are a raetupaw Pachia ryalaw kha na nyh khyh.

⁶Awkhua ccyh kya ccacii tu lah, zete ccyh kya mah haeungtaw nan; pawccecize teihynhmou yn hoy cih, e hynh tou, khuh-e khuh tou, tuhkhyhze parouh mawte tou yn hoy cih cipaw na nyh khyh.

⁷Awnaw tuh ahoy, khuanin muih tuh lungrythuakhaeku lan a um.

⁸Mih hiinshe asae hae paw tuh mih lung atua cih; tuhzemah mohnaw ccyh patae yn um cih cipaw nyh hae sah. Yn cyihkuh cih paw balyn tuh accakaepaw nynh thua.

⁹Pou mino, na no lyakhe lungtuate umtua, na no ccyh lyakhe na thinlung tuh lungpawte um sah. Na thinlung nynh a rypaw te na mit nynh a rypaw kha cyitua, thuasalama hynh-e hae balyn keiccuze Pachia nynh bya ae pia cih cipaw nyku tua.

¹⁰Na thinlung kyate lungriathaenaw kha vuatua, na pyn kyate ccinaw kha vuatua; pawccecize na zawthaw ccyh tuh sosohte athang cih.

¹Vawsaw ccyh yn thua maw, te “Lungtuanaw ka hoi khyh,” na ci ccyh athua maw, na zawthaw lyakhe nang ae Raetu kha nytua;²khuanin te awnaw, sawpaw te awsi hae tuh moh hae zah, maeking tuh khuaatui ryte azo mawkhe amaw kha nytua;³tuin nin khe inn ngawtu hae tuh a thyngkuh cih hae zah, mih thawsae hae paw tuh mih thawzya cih, sungsuhpaw nopi hae tuh a zya hae keiccuze ryalaw a haeungtaw cih hae zah, thanlan-aw kyate a do hae paw tuh vyvyte a muih cih hae;⁴laanpi pe e thuakaw kha he a khaw hae te, sungsuhnaw hae paw roi tuh zyazyate nynh accae vae cih, te pavaw roi he accae te, a tho cih zah hlawsah hae paw nopi hae roi tuh zyazyate nynh accae vae cih.⁵Ahangpaw raw kha a rih cih hae zah, laanpi kya myarya rinaw a um cih; almon ku tuh apaw cih, tungkhipaw tuh rutatu lan a vaw cih, a lungry hawte thua vae khyh; pawccecize ccungccaw balyn tuh zungzae mih inn langkhe a cceih hahe cih hae zah, rawkhuite a um hae paw tuh laanpi kya a cceih bungthung cih hae;⁶ngun rui tuh apae cih zah, sui pakekhupaw tuh akoi cih, tuidy kya tuipung akoi cih, tuisung kya-e thenawpaw arui apae cih,⁷laenoi tuh yn thuanaw laephi kalan a ki cih zah, hy tuh a pyatu Pachia kalan a ki cih.⁸Accakaepaw, atyn-are hynh accakaepaw nynh thua cite Phunghotu nynh a ho. Thangsahnaw

⁹Phunghotu tuh a haw keiccuze a nypaw kha ccungccaw hae kya a ccangpya hae, phungtangbya kha akaw-aleih ccangkute a ccaesah.¹⁰Phunghotu nynh lungrythua lan umpaw bya hae kha ccung zah, byaccing athuapaw bya kha ccaerarih lan a zei.

¹¹A haw hae paw bya tuh ahepaw ccungngue te nynh aloku, a suelua hae paw bya hae tuh tynkaring lan khiadepaw thingkhia hawte thua zah, aening balyn oun do-oihtu tuurinpaw nynh a pya hae paw nynh thua.¹²Ka ccapaw, hynh-e hae koute na raeringku lanpaw a um ung. Ccauh patae rae hynh thangthya khyh, thawte ccaw ccangku hynh mah pynsaw abangkuh.

¹³E bya hae balyn athang te, ho lanpaw ccangkheit a um ung. Pachia kha rih lah, a kawbya hae kha zuitua; pawccecize Pachia nynh ccungccaw a raenuathepaw tuh hynh-e hanlan nynh thua.¹⁴Thuruhpaw uccaw miakaw, ahoypaw thuasah, athahpaw thuasah, cyisahnaw miakaw kha Pachia nynh bya a pia cih.

Bible Society of Myanmar

https://app.library.bible/content/1a340f5ae072b2f4