James1
1Ja-kơ, xapok ku Kơy Plêêk ji ku Lôôk wơơt Dêh Jê-xu, atăq ka kưl vaarq adrơơk đom dong varơuq pachaay hyaak: Xăk hlơq oh ay đom xuum hlah hlaak.2Wơơy oh ay ku gô, tuôôy oh ay klêh muut đu thưq thưh thek, dayh 'yo nưq laa xuum hlah xaleep,3vii xet đaneq varơuq thưh xuum tuôq oh ay seng vlôh paraat chiuq uunq.4Bơh, paraat chiuq uunq pheq padoh vlôh đu tol kông paraat, xôq oh ay e hnoq jah kôt tok ji payôôch, leh măn thiuq kajoq.5Măn atoh kơyq nưq đom oh ay thiuq khôôt xet, adro nưq dayh apôôy vôôch varơuq nưq xing Kơy Plêêk, Kơy kahniq pôôt kach ranưh ranơơy ka tôôy adro đơu leh toah trek, yôôych varơuq khôôt xet hnoq jah kahniq ăm adro nưq.6Bơh adro nưq pheq apôôy vôôch đom xuum tuôq, leh biit ravơq kajoq, vii adro biit ravơq dang đaji rangaq tahli, biq kapuh hooy ji ranhuq ranhek adroyq khiel.7Adro đanưq te biit đaneq ni hnoq nhonq jah kajoq xing Lôôk,8nưq laa adro ragơy tađôôy xuum, leh kajưk đom tôôy trôôk hooy ni.9Adro oh ay đom aduq adrah dayh pa ưưt truh ka aduq yơơt dik ku xăk,10măn adro karoh dayh pa ưưt truh varơuq adrah ku xăk, vii adro nưq hnoq dalơh hooy đaji raak gôk pi gôk manay rek.11Mot hngơy vlok tok dii rahưk tôq huur vuh ji dơơp kateh ha'yauq rek gay, raak ni rôh ruh, kaveeh tamaq kaxay ku ni ruh hlơơp. Dang anưq, manih karoh kung hnoq biq kateh ha'yauq katul đom kaluh varơuq ku xăk.12Vanong ka adro chiuq thưh thek. Vii, tuôôy heq jah xanưk anưq, adro nưq hnoq nhonq đoat varơuq riirh, laa varơuq đơu Kơy Plêêk heq tavek kahniq ka khơl leq xung xiaq Kadraq.13Tuôôy biq adô aluut, te e kơyq đnooy đaneq: “Gô biq Kơy Plêêk adô aluut!”, vii Kơy Plêêk laa leh ik biq varơuq xơk adô aluut, đơu kadih Kadraq kung be adô aluut kơyq.14Bơh tôôy adro biq adô aluut, tuôôy biq duuy aluut ji aluut patuut bơyh xuum hmưch trôôch ku kadih ni.15Xatyauq nưq, atêq tuôôy heq măn bonq, xuum hmưch trôôch seng vlôh kadrôôp maroh, đơu atêq tuôôy heq jah văch yuôôr, kadrôôp maroh seng vlôh varơuq kaxêêt.16Wơơy oh ay xung xiaq ku gô, te xôq ni biq aluut pa ôôh.17Tôôy varơuq kahniq ăm tơơl kaxay ji tôôy kadrool xaleep raay dơơp vlôh xing ataalh, laa truh xing Vaq ku varơuq tađnah, đơu đom Kadraq leh e varơuq xaloah dơyh long galơuq pahlơơp tađôôy.18Tyauq đaji heq đinq, Kadraq heq pahleh haay vlôh bơơn apok ku hyioh jăk, xôq haay laa muuyq loayq play adroyq dik đom kaluh dong paroh ku Kadraq.19Wơơy oh ay xung xiaq ku gô, dayh xet đaneq: Tôôy adro pheq dayh tameng, manưưn đnooy, manưưn jaraq.20Vii đơơt jaraq ku koot manih leh dơơp yuôôr varơuq hyioh jăk ku Kơy Plêêk.21Vii anưq, atêq tuôôy heq leh ka'lăk kaluh thưq klơl 'yêq kung xet taleq varơuq xơuq xơk, dayh nhonq xok đom varơuq atuq xuum apok jah paraay pêêt, laa apok e hnoq wơơt xok phool hiel oh ay.22Dayh vlôh jêêk khơl adro dơơp tyauq apok, te vơ laa khơl adro tameng đơu patuut pa ôôh kadih xăk.23Vii atoh adro leq laa dro tameng apok đơu leh aalq laa dro dơơp tyauq, yôôych adro nưq dang đaji muuyq dro 'yo atrêêk mamưưt kadih 'miêh ku ni đom ramil.24Adro nưq heq atrêêk xăk yôôch ka'lăk hooy, yôôych vơ tawol hlơơp xăk 'miêh đaji đa leq.25Bơh kơyq tabông muut ganuun xaleep ku varơuq rayơh rayơơy, ji kưq wêêt kajưk dơơp anưq, leh vlôh jêêk adro tameng ragơy tawol, đơu laa adro dơơp varơuq duh dưk dơơp, yôôych dro nưq hnoq jah vanong đom varơuq dơơp ku xăk.26Atoh kơyq biit xăk laa khôôt đaauq đơu leh jư ik kapiet xăk, bơh kưq aluut pa ôôh xuum xăk, yôôych đaauq ku adro nưq be jaq triq kajoq.27Đaauq pa xarêh ji leh hlêêl a'moh adroyq kangưưr Kơy Plêêk, Vaq haay, nưq laa waak rơy oh de leh e miq vaq, mo valơu đom đơơt pơơl dal ku oot, ji jư xăk leh klơl 'yêq bơyh dêh araak.
FAR EAST BROADCASTING COMPANY