Hebrews13
1Xuum xung xiaq oh ay pheq kưq măn miet.2Te ka'lăk tawol xuum xung tamooy, vii bơyh varơuq neq, muuyq sôôq dro heq leh xet ju tiip đoonq khơl yaak plêêk.3Dayh văch truh khơl dro biq karuk tu, đaji heq biq kal achung dii oot, ji khơl adro biq xa dơơp ra ơơh, đaji kadih oh ay kung đong măn đom muuyq xăk xamơk.4Đaamq pajêêk pheq laa varơuq vado dik đom katul tôôy dro, ji chanưng pajêêk yôôych pheq leh klơơr 'yêq, vii Kơy Plêêk hnoq xưh xadrah khơl adro apuq atrăp ji bing tuut taak.5Trôôk riirh oh ay yôôych pheq leh hmưch jêêt, tuôôy hlah xuum dii kaluh varơuq đong e, vii kadih Kadraq heq xanoh: “Gô hnoq leh hmưq e 'leq chuh xangưưy koot, Gô kung hnoq leh hmưq e 'leq ka'lăk tăk koot,”6dong pheq đnooy, vii jah xuum kôk kalh, haay đnooy: “Lôôk laa Kơy Waak gô ji gô hnoq be yôq varaal. Khơl kadrơy hnoq dơơp kajoq gô?”7Dayh văch truh khơl manih jarooy pato haay, laa khơl manih padoh apok ku Kơy Plêêk ka oh ay, tuôôy tabông 'yo raak play đơơy riirh ku oot, dayh dơơp tyauq xuum tuôq ku oot.8Lôôk Wơơt Dêh Jê-xu hngơy ahnưh, hngơy neng ji dong truh đơơy đơơy yôôych măn i ja.9Te biq adô aluut xing đu thưq pato dayq đêh xateek. Vii varơuq kaxay tamaq ka xuum klaak laa jah jư 'yo xing vanong plêêk, be aalq xing kaluh tuôông xa, đơu dii kaluh thưq nưq, khơl adro riirh bơyh ni be jah ich lơơy kajoq.10Haay e muuyq para hơu, đơu xing neng, khơl manih hơu varơuq đom hnhư hơu đơ leh e qwuyen xa.11Vii vahaap bla kadrôôp, laa phon vlôh xing kaluh poop ôô, jah xagook muut kaluh aduq vah xing thơy tơơk tưp kôt, phon xaak ku ni yôôych biq vuh pi gôk raap kuun.12Jo nưq, Lôôk Jê-xu kung heq chiuq pơơl jiq pi gôk 'mok theng, xôq Kadraq hnoq ik tađôôy đơơu manih karôp gamưh vahaap ku kadih Kadraq.13Vii anưq, haay duh truh dii Kadraq pi gôk raap kuun, pơq xok varơuq đnooy ra ơơh ku Kadraq.14Vii haay leh e muuyq theng leq măn miet aduq neq, wih hlê, haay đong axek akhiim muuyq theng jeq truh.15Gamưh Kadraq, haay hnoq ik tơơk tưp kuah lêh kacheeu ayuôôt atok Kơy Plêêk đom tôôy varơuq, nưq laa raak play ku huuy vel xưng nhonq yal Kadraq.16Măn varơuq dơơp varơuq kaxay ji varơuq ahlook aklah waak rơy yôôych te ka'lăk tawol vii Kơy Plêêk jah hlah xuum truh kaluh ôq lêh đanưq.17Dayh tameng apok ji tameng tyauq khơl manih jarooy pato oh ay, vii oot parol kôô đôôyq dii phool hiel oh ay đaji hnoq ăm vlôh apok padoh vlôh, xôq ka oot hnoq ik dơơp varơuq nưq dii xuum hlah hlaak đơu be ramooy, vii varơuq neq be ich lơơy ka oh ay.18Dayh apôôy ka 'wot, vii 'wot jah tameng tyauq đaneq 'wot e xuum klaak kaxay, tuôôy ưng trôôch riirh dong jơq dik đom tôôy varơuq.19Bơh gô kơn ahmưk nhăk oh ay dơơp đanưq 'ngưng iaq đnoyq, xôq gô meel jah wiit xuq dii oh ay.20Kơy Plêêk hrok hrol, Kơy heq rôôk kah Kơy Xakaq Trưưu Kôt, 'ngưq laa Lôôk Jê-xu haay, xing aduq kaxêêt gamưh vahaap tavek đơơy đơơy,21apôôy Kadraq ralauq xôq oh ay dii tôôy varơuq tolh kaxay xôq dưk dơơp iq trôôch ku Kadraq, tuôôy dơơp varơuq kaxay xuum kangưưr Kadraq đom haay, gamưh Lôôk Wơơt Dêh Jê-xu, laa Kơy đơu tađnah tađnaak wih xuq Kadraq dong truh đơơy đơơy miet miet. Amen.22Wơơy oh ay, gô panhăk oh ay atuq xuum dii varơuq apok ahmưk nhăk neq, vii gô heq valơk ka oh ay vơ hlê taleq apok đơu heq.23Oh ay xet đaneq dro oh ay Ti-mô-thê ku haay heq jah bla rayơh rayơơy, đơu kung nhu nưq gô hnoq tavơh mot oh ay atoh nhu nưq truh meel.24Xiin jah vôôch hlơq dêq hloay khơl manih jarooy pato oh ay kung dêq hloay khơl vah. Khơl vah xing I-ta-li vôôch hlơq oh ay.25Apôôy vanong plêêk măn kung dêq hloay oh ay.
FAR EAST BROADCASTING COMPANY