1 Thessalonians4

1Vii anưq, atêq lôôch, wơơy oh ay, 'wot apôôy xiin ji ahmưk nhăk oh ay đom Lôôk, laa Lôôk Jê-xu, dang đaji oh ay heq nhonq xok xing 'wot đaleq laa varơuq duh dik ka oh ay xôq riirh ji dơơp kaxay xuum Kơy Plêêk, kung đaji kach oh ay đong riirh, xôq ka oh ay hnoq ik kahluh truh iaq đnoyq.2Vii oh ay xet kaluh padoh pato leq 'wot heq pato ka oh ay bơyh Lôôk Jê-xu.3Vii neq laa iq trôôch ku Kơy Plêêk, nưq laa varơuq yuôôr vah ku oh ay: pheq jư xăk chuh xangưưy varơuq apuq atrăp;4tôôy dro đom oh ay pheq xet jư 'yo xăk xamơk haay đom varơuq hlăng vah ji jah vado,5leh dơơp tyauq ham trôôch bơyq ba (dang đaji manih tamooy kadrơy laa adro leh xet Kơy Plêêk);6xôq te kơyq lôp kadrôôp ji adô aluut oh ay ni đom ka varơuq neq, bơyh vii Lôôk laa Kơy dơơp bla hlê truh tôôy varơuq nưq, đaji 'wot kung heq đnooy adroyq ji dong dik đnooy nhăk ka oh ay.7Vii Kơy Plêêk leh taayh tawooyh haay truh varơuq klơơr 'yêq, bơh muut đom varơuq yuôôr vah.8Vii anưq, kơyq chôôyq ka'lăk pato hok neq leh aalq chôôyq ka'lăk koot manih, đơu laa chôôyq ka'lăk Kơy Plêêk, Kơy kahniq Lôôk Phool Hiel Kadraq ka oh ay.
9Măn truh varơuq oh ay xung xiaq mamuuyq, oh ay be duh 'wot valơk ka oh ay, vii kadih oh ay jah Kơy Plêêk pato pheq xung xiaq mamuuyq.10Vii dik, oh ay e dơơp đanưq đôôyq dii dêq hloay oh ay đom dih dêh Ma-xê-đoan. Bơh wơơy oh ay, 'wot ahmưk nhăk oh ay kưq kahluh truh iaq đnoyq,11ji pheq raanq paraat riirh hrok hrol, jư 'yo kaluh varơuq ku oh ay, kadih ti oh ay dơơp, đaji 'wot heq patăk pato oh ay,12xôq oh ay hnoq ik xa măn kach hyioh troq kangưưr manih xadaay ji leh e thiuq kajoq.
13Wơơy oh ay, 'wot leh trôôch oh ay be xet kajoq truh khơl adro đong vik, xôq oh ay klơlh hlu xuum đaji khơl manih kadrơy laa khơl adro leh e varơuq takôô gamưh.14Vii atoh haay tuôq đaneq Lôôk Jê-xu heq kaxêêt ji heq riirh hlê, yôôych Kơy Plêêk kung hnoq taway khơl adro heq vik truh dii Kadraq gamưh Lôôk Jê-xu.15Gamưh muut apok ku Lôôk, 'wot đnooy varơuq neq ka oh ay, đaneq haay, khơl manih măn đong riirh, khơl manih e măn hlê dong truh tuôôy Lôôk pôôt dêh, kajưk dik leh hooy adroyq khơl manih heq vik.16Vii kadih Lôôk hnoq xing plêêk kahri pôôt dii hlêêl tanưưl, dii apok ku kơy yaak ưk, kung dii hnưm keeng ku Kơy Plêêk, yôôch khơl adro heq kaxêêt đom Lôôk Wơơt Dêh hnoq riirh hlê adroyq dêq.17Xatyauq truh, haay, laa khơl manih măn đong riirh, khơl manih e măn hlê, hnoq jah taway tok kung dii oot đom đum kluk xôq tavơh Lôôk tol lawah plêêk, ji đanưq, haay hnoq măn dii Lôôk hloay hloay.18Jo nưq, dayh hlơq hlôôp mamuuyq bơơn kaluh apok neq.

FAR EAST BROADCASTING COMPANY

https://app.library.bible/content/37a1dc7a54269bd3