1 Thessalonians3
1Jo nưq, tuôôy leh chiuq xiik iaq ik, 'wot biit tolh iaq laa muuyq adro pheq biq măn hlê aduq A-thên,2ji 'wot heq patăk dăt Ti-mô-thê, adro oh ay ku 'wot ji xapok ku Kơy Plêêk đom Hêêl Kaxay ku Lôôk Wơơt Dêh, xôq dơơp kajưk kalh ji ahmưk nhăk oh ay truh xuum tuôq ku oh ay,3xôq leh kơyq biq anhưh ahrưng katul kaluh pơơl dal neq. Vii kadih oh ay xet đaneq haay jah đinq tangưưr varơuq đanưq.4Pheq đnooy tuôôy 'wot đong măn dii oh ay, 'wot heq đnooy adroyq ka oh ay đaneq haay hnoq chiuq pơơl dal, ji varơuq xalih vlôh dang đaji oh ay heq xet.5Vii liq jo nưq, tuôôy leh hno chiuq xiik iaq ik đnoyq, gô heq patăk manih hooy xôq xet xuum tuôq oh ay đaleq, xet 'leq adro adô aluut bơơn kach leq nưq heq adô adeng oh ay ji varơuq dơơp ku 'wot jêêk vlôh hlo hloh.6Bơh hloay tuôôy neq, Ti-mô-thê, atêq tuôôy hooy xing aduq oh ay xuq dii 'wot, heq taway ka 'wot hêêl hlah truh xuum tuôq ji xuum xung xiaq ku oh ay, đaneq oh ay hloay jư kaluh duut noor kaxay tamaq truh 'wot, takôô trôôch tavơh 'wot kung dang đaji 'wot trôôch tavơh oh ay.7Vii liq jo nưq, wơơy oh ay, 'wot jah hlơq hlôôp xing oh ay tuôôy tangưưr dii tôôy hiêmh ngwi ji pơơl dal ku oh ay, vii xuum tuôq ku oh ay.8Jauq xing tuôôy neq, atoh kadih oh ay dưk kajưk đom Lôôk, yôôych 'wot riirh.9'Wot hnoq ik tơơk tưp Kơy Plêêk apok kuh kway đaleq truh oh ay gamưh tol dêq hloay xuum mưng me đơu vii kơq oh ay, 'wot hlah hlaak kangưưr Kơy Plêêk 'wot,10klôôy hngơy apôôy dêq xuum xôq jah tavơh mot oh ay ji ăm athêêp kaluh kajoq măn thiuq đom xuum tuôq oh ay?11Apôôy vôôch kadih Kơy Plêêk, Vaq haay, ji Lôôk Jê-xu, Lôôk haay, jarooy trôôk 'wot truh kung oh ay.12Apôôy Lôôk khienq oh ay athêêp tok ji raah jôh đom xuum xung xiaq đôôyq dii mamuuyq ji đôôyq dii tôôy adro, kung đaji kach 'wot đôôyq dii oh ay,13xôq dơơp ka xuum oh ay kajưk kalh, leh e kajoq đangq trek đom varơuq hlăng vah kangưưr Kơy Plêêk, Vaq haay, đom varơuq rama truh ku Lôôk haay, laa Lôôk Jê-xu, kung dii dêq hloay khơl vah Kadraq. Amen!
FAR EAST BROADCASTING COMPANY