Romans16
1En wŏq, ănh wĭnh iơq hao bây pôp ŏh pôp ur Phê-bê, sŭng ganai khananh de, khoi cồ tamun ôp vrŭq sŭng Vatom Gŭn Sen-cơ-rê de,2chĕq pôp ŏh ur klô wŏq nĕh sŭng Siđăch, dăh bây sinlơ dip gal sĭq bây khây tamun gŭn, bây tât tăm nđôi nĕh sŭng vrŭq lây cồ nĕh cơnh don tât pôp ŏh. Mvăc pôp ur heq khoi cồ tamun ôp păch yăh an gŏq ndu, bây khoi an nơm ănh wŏq.3Wĭnh khwây Bê-rit-sin bây A-kwi-la, cồ khây ganai ôp vrŭq bây ănh sŭng Siđăch Yơt Dưnya Yêsu,4nŏq cồ khây tamun gĕh tabayh swan nơm mvăc chĕq jơ sinlơ rĭh an ănh, đăng gal ayh ănh may mo khây nĕh, cồ lĕq khây Vatom Gŭn sŭng văl daq aling khoi may mo wŏq,5bây wĭnh khwây Vatom Gŭn u nhi khây nĕh. Wĭnh khwây Ê-bai-nêt, pôp ŏh yâh sinđach ănh de, nĕh khoi cồ play avôq lĕq sŭng ntĕh A-si an Siđăch Yơt Dưnya.6Wĭnh khwây Ma-ri, cồ tamun ôp vrŭq hyoq chŏnh mvăc khây pôp ŏh ur klô.7Wĭnh khwây An-trô-ni-cơ bây Yu-ni-a, pôp ŏh chhe hwai ănh je bây khoi cồ ganai sŭng nhi jingo ănh je. Var ndu nŏq cồ khây tamun gĕh tapơ u sŭng khây con tuyh, khây nĕh khoi gŭq sŭng Siđăch Yơt Dưnya lor a ănh.8Wĭnh khwây Am-li-a, ganai yâh sinđach ănh je sŭng Siđăch.9Wĭnh khwây U-rơ-banh, ganai ôp vrŭq simơ bây khananh sŭng Siđăch Yơt Dưnya, bây Êch-ta-chi, ganai yâh sinđach ănh je.10Wĭnh khwây A-be-lơ, cồ tamun gĕh wŏq lăp sŭng Siđăch Yơt Dưnya. Wĭnh khwây lĕq khây tamun sŭng caniêp A-rit-tô-bu.11Wĭnh khwây Hê-rô-đi-ôn, cồ tamun chhe hwai ănh de, Wĭnh khwây khây vu lây sŭng caniêp Nat-sit de, cồ khây tamun gŭq sŭng Cô Voq.12Wĭnh khwây Tri-phe-nơ bây Tri-phô-sơ, khây tamun hyoq chŏnh sŭng Siđăch. Wĭnh khwây Bet-si-đơ yâh sinđach, tamun ôp vrŭq vŭh hyoq lŭng sŭng Siđăch.13Wĭnh khwây Ru-phu, cồ tamun gĕh săch sŏq sŭng Siđăch, nggâm mê nĕh de, bây ănh de.14Wĭnh khwây A-sin-cơ-rit, Phơ-lê-gôn, Het-me, Ba-trô-ba, Het-ma bây khây pôp ŏh gŭq bây khây nĕh.15Wĭnh khwây Phi-lô-lô-gơ bây Yu-li, Nê-rê bây pôp ur nĕh, bây Ô-lim nggâm lĕq khây Vatom Gŭn cồ gŭq bây khây nĕh.16Căh gưt pơq nuih talaq iơq tapơ ndăng ganai a sinlơ tăm sôc gŭn. Lĕq săq khây Vatom Gŭn Siđăch Yơt Dưnya de khwây mơq tât pôp ŏh.17Maq ndây, ơ khây pôp ŏh ur klô, ănh côt kĕh vuôi pôp ŏh gưt jơ nơm ntrăch a khây nĕh cồ uĕh ôp lŭh sinlơ tăm paklăh nggâm sinlơ tachơn jâng, tih a sinlơ tămti cồ pôp ŏh gĕh đom, bây căh plĕh ngai a khây nĕh.18Mvăc khây tamun canŏq đăng tôp chăng Siđăch vơn, cồ Siđăch Yơt Dưnya, ayh cồ talaq nơm de, bây payh ơ camvŭm rapôt yăh nkhơch, khây nĕh lamvoch lĕq khây nuih talaq đăng kram.19Payh ơ nuih talaq tôq chăng pôp ŏh ur klô de gĕh parang tât ăp ndu. Payh canŏq, ănh vui hơn sĭq pôp ŏh, en ănh cơnh pôp ŏh gĕh vanŏh sĭq vrŭq ôp yăh, en soch jrŏh sĭq vrŭq chin'hâc.20Siđăch Trôq sinlơ yăh iên de sô lŭng Nĕh jăc jâng jot lât chaq Sa-tan u tĕh jâng pôp ŏh. Ngwân sinăc yăh Siđăch vơn de, cồ Siđăch Yơt Dưnya Yêsu, gŭq bây pôp ŏh ur klô.21Ti-mô-thê, ganai tăm ôp vrŭq ănh je, nggâm Lu-si-ut, Ya-sôn bây Sô-si-ba-tê, cồ khây tamun chhe hwai ănh je, dơp camvŭm mơq khwây pôp ŏh ur klô.22Ănh, Tet-tiu, cồ tamun chêr sirăq heq, gĕh camvŭm mơq khwây pôp ŏh ur klô sŭng Cô Voq.23Gai-ut, cồ tamun wŏq sŭmmrăp an ănh bây lĕq Vatom Gŭn, wĭnh gĕh camvŭm mơq khwây pôp ŏh ur klô. Ê-ra-tu, ôp vrŭq jơ jên palây de, nggâm bây tamun pôp ŏh Kwa-tu, gĕh camvŭm mơq khwây tât pôp ŏh ur klô.24[Ngwân sinăc yăh Siđăch vơn de, cồ Siđăch Yơt Dưnya Yêsu, gŭq bây lĕq săq pôp ŏh ur klô. A-men.]25Ngwân sinlơ sindraq sindil sĭq tu Candranh cồ gĕh prơn gŭn ôp an pôp ŏh ur klô kram camhlăng bây Sipơp Yăh ănh je nggâm sinlơ nhai tămti sĭq Siđăch Yơt Dưnya Yêsu, bây sinlơ pơq an sây sĭq sinlơ jru sưt cồ gĕh tăm pôn sưt sŭng jong mva saq găn gŏq nggơih,26en vrêq heq gĕh pơq lŭh, nggâm bây don khây sirăq tiêng tri, dăh bây camvŭm pân Siđăch Trôq wân lawân de, gĕh nhai lŭh an ăp văl chĕq iau tât sinlơ tôq phŭng ôp bây sŭng sinlơ tôq camvân,27ngwân sinlơ sindraq sindil sĭq tu Siđăch, cồ Siđăch Trôq vanŏh vlơ lĕq, don Siđăch Yơt Dưnya Yêsu, di tât wân lawân. A-men.
FAR EAST BROADCASTING COMPANY