Romans15
1En cồ vơn heq, pành tamun camhlăng, gưt văq nong khây sinlơ la-ui tamun đăng camhlăng, bây đăng ôp vayh nuih nơm.2Ăp ndu sŭng khây vơn căh ôp vayh nuih tamun rawênh nơm payh u vrŭq yăh rom, sinâng tât vrŭq jrông jrâng tamun nŏq.3Mvăc payh nơm Siđăch Yơt Dưnya đăng ôp vayh nuih nơm. Palâq sĭq vlâq, dân ca vrŭq gĕh chêr: “Khây camvŭm raq pandai cồ khây tamun gơm chhŏh Siđăch tŭh vlâq vlơ con”.4Mvăc gưt dâng lây sinlơ gĕh chêr jưr lor heq nŏq gĕh chêr sĭq vlâq chĕq pađau tămti an nơm vơn, chĕq don u sinlơ mbêr nuih bây don sinlơ jrông jrâng Sirăq Gŭn de, vơn wŏq gĕh sinlơ camvân.5Ngwân wĭnh Siđăch Trôq cồ mbêr nuih nggâm uĕh jrông jrâng paq sinăc an pôp ŏh chĕq gĕh simơ du nuih tôr bây ganai dân ca Siđăch Yơt Dưnya Yêsu,6chĕq an pôp ŏh ur klô gĕh simơ du nuih talaq, payh ơ du lâm mŭnh chĕq payom Siđăch Trôq, cồ vap Siđăch vơn de, cồ Siđăch Yơt Dưnya Yêsu.7Canŏq, căh tăm wŏq ndăng ganai, khoi ca Siđăch Yơt Dưnya gĕh wŏq pôp ŏh, chĕq saq tât sinlơ sindraq sindil Siđăch Trôq de.8Mvăc ănh wĭnh nhai pành Siđăch Yơt Dưnya gĕh ôp jêng dĭch năc an văl cồ gĕh chit ntô payh ơ sinlơ dip gal Siđăch Trôq de, chĕq candân khây camvŭm pănggân khây cô jây de,9en cồ chĕq khây văl daq aling payom tapơ Siđăch Trôq payh ơ nuih talaq sinđach Siđăch de, dân ca camvŭm gĕh chêr: “Payh nŏq, con nhai lŭh bây wŏq Siđăch sŭng khây văl daq aling nggâm adŏh payom tapơ săq Siđăch de.”10En gĕh nhai pân pành: “Khây văl daq aling, căh vui hơn bây văl Siđăch de,”11En wŏq pành: “Lĕq săq khây văl daq aling, căh adŏh payom Siđăch; lĕq săq khây văl, căh payom tapơ Siđăch.”12Bây Ê-sai nhai wŏq: “Diyĕh Ye-sê de sẽ lŭh măt, cồ Candranh gĕh iơq hao chĕq sên vôq khây văl daq aling; khây văl daq aling nhâng gĕh sinlơ camvân u Siđăch.”13Ngwân wĭnh Siđăch Trôq cồ sinlơ camvân de ôp an pôp ŏh ur klô vênh rămvi ăp sinlơ vui hơn bây yăh iên sŭng sinlơ tôq camvân, chĕq ôp an pôp ŏh ur klô vênh canăh sŭng sinlơ camvân don prơn gŭn Siđăch Wênh de.14Maq ndây, ơ khây pôp ŏh ur klô ănh je, nơm ănh heq khoi gĕh vayh nuih sĭq pôp ŏh pành payh nơm pôp ŏh khoi gĕh vênh rămvi sinlơ yăh rom, mvăc gĕh vŭq an di vênh ăp sinlơ dân gưt bây gĕh prơn chĕq vuôi pađau ndăng ganai.15Nhâng ănh gĕh chêr camhlăng ti an pôp ŏh ur klô gŏq dông sŭng gatŭq heq gatŭq tĭq dân ca chĕq tacăh pôp ŏh, payh ơ sinăc yăh gĕh Siđăch Trôq paq an ănh,16chĕq ôp an ănh jêng du mvu dĭch năc Siđăch Yơt Dưnya Yêsu de an văl daq aling, lăm ôp vrŭq pađăc păch pađăc an Sipơp Yăh Siđăch Trôq de, chĕq păch pađăc khây văl daq aling de gĕh wŏq sŏq sŭng sinlơ vui nuih talaq, alăm gĕh jêng soch jrŏh don u Siđăch Wênh.17Payh nŏq, sŭng Siđăch Yơt Dưnya Yêsu, ănh gĕh sinlơ lơ vôq sĭq khây vrŭq Siđăch Trôq de.18Mvăc ănh đăng thêng nhai du sinlơ lây cồ sinlơ nŏq đăng gĕh Siđăch Yơt Dưnya ôp ju ănh, chĕq iau khây văl daq aling tât sinlơ tôq phlâq nơm — don camvŭm nhai nggâm vrŭq ôp,19don prơn camhlăng sŭng khây vrŭq tayh gŭn bây chin'hâu, don a prơn gŭn Siđăch Wênh Cô Voq de — tât daq ănh gĕh nhai lŭh Sipơp Yăh Siđăch Yơt Dưnya lôch lĕq a Yê-ru-sa-lem en saq rawênh di tât ntĕh I-li-ri;20cồ bây tanrong nŏq, gât tăm khlŏq bây nuih cơnh nhai lŭh Sipơp Yăh đăng gal u gatŭq Siđăch Yơt Dưnya gĕh cuôl wĭnh, chĕq an ănh đăng tatao vrŭq pănggơih vlơ tăp jâng tamun ndây de.21Cồ canŏq, dân ca sinlơ gĕh chêr: “Khây tamun cồ ndŏh gĕh nhai an gưt sĭq Siđăch nŏq gĕh sây, bây khây tamun cồ ndŏh gĕh chăng nŏq gĕh gưt dân.”22Canŏq, gŏq dâq ănh khoi vlam sinlơ khăq king chĕq tât păng mơq pôp ŏh.23En vrêq heq, mvăc đăng hôm gĕh gatŭq u sŭng khây palây heq, mvăc gât nong văq du nuih talaq can'hir cơnh tât păng mơq pôp ŏh a gŏq mva èn,24payh canŏq hê lăm lây ănh hao trong saq tât Tây Ban Nha, ănh nhâng camvân, lăm saq găn nŏq, vlam pôp ŏh ur klô, en gĕh pôp ŏh tăm lăp ti chĕq saq tât nŏq, hê lor lĕq ănh gĕh vayh nuih talaq bây pôp ŏh ur klô sŭng takiq vadâq.25En vrêq heq ănh vlơ trong saq tât Yê-ru-sa-lem chĕq tăm lăp ti nong iơq khây tamun gŭn.26Mvăc tamun Ma-sê-đwan bây A-chai gĕh vui nuih talaq ôp vrŭq tăm riq jên nŏq chĕq paq an khây tamun lŏh sat sŭng ndăng khây tamun gŭn u palây Yê-ru-sa-lem.27Mvăc khây nĕh vayh nuih nggâm khây nĕh gĕh tăm văc se khây tamun nŏq. Mvăc hê khây văl daq aling gĕh don wŏq simơ khây sinăc yăh sĭq nuih wênh khây tamun tĭq, nŏq khây nĕh khoi căh vrŭq tăm paq vlâq an khây tamun tĭq sĭq khây păch rup swan.28Canŏq, lăm ôp jêng en vrŭq heq nggâm pành nhâng khây păch cồ tăm lăp ti nŏq tât ti khây nĕh, nŏq ănh pơq jâng lŭh saq găn ju pôp ŏh chĕq tât Tây Ban Nha.29En ănh gưt pành lăm tât mơq pôp ŏh ur klô, ănh tât bây sinlơ vênh lôch sinăc yăh Siđăch Yêsu Krit de.30Măt ndây, wĭnh nhai bây pôp ŏh, payh ơ Siđăch vơn, cồ Siđăch Yêsu Krit, en don sinlơ sinđach Siđăch Wênh de, ănh côt cĕh pôp ŏh lăp ti tăm chŏl simơ bây ănh sŏq khây camvŭm vơu ngwân ala an ănh pađăc hao Siđăch Trôq,31chĕq ănh gĕh wŏq yơt ntrăch a khây tamun cồ đăng tôq chăng u Yu-đê, bây chĕq vrŭq ôp ănh je paq an Yê-ru-sa-lem gĕh vui nuih talaq chĕq wŏq sŏq payh a khây Vatom Gŭn;32chĕq an bây nuih cơnh Siđăch Trôq de, ănh saq tât gatŭq pôp ŏh sŭng sinlơ vui hơn, mvăc gĕh vayh nuih lu lŏh bây pôp ŏh.33Ngwân wĭnh Siđăch Trôq yăh iên gŭq bây lĕq săq pôp ŏh ur klô. A-men.
FAR EAST BROADCASTING COMPANY