Revelation4
1Alưr khây vrŭq nŏq, ănh sên sây bây tĭq, du lâm lapông gĕh pơq lŭh vlơ trôq, en camvŭm di muôi cồ ănh gĕh chăng nhai bây ănh dân ca mŭnh panŭng, nhai pành: “Sô hao heq, en Ănh pađau an con sây khây vrŭq nhâng sẫy lŭh alưr khây vrŭq heq.”2Sŏng lăm nŏq, ănh gŭq sŭng Siđăch Wênh, en sên tĭq, du vwây gĕh chĕq vlơ trôq! En gĕh du Candranh gŭq vlơ vwây.3Candranh gŭq vlơ vwây păch cồ rom dân ca gŏch sănh khlŏh bây gŏch sănh găh, en sây du lâm nac rawênh vwây bây rom dân ca gŏch ramưt.4Rawênh vwây gĕh var jât puôn lâm vwây, en gŭq vlơ vwây cồ var jât puôn cô camvĭnh gĕh chuq lăp ao jong voq, bây đuôn daq gŭn a mơh vlơ vôq khây nĕh.5A vwây chir lŭh khây chhe lơp, tayh phing raphing, nggâm lơp tŏh târ. Pâh tong ŭnh ngit a vôq vwây, nŏq cồ pâh wênh Siđăch Trôq de.6Avôq vwây dân ca daq lênh silang tagăh, dân ca pha lê, hôm vlăc canđal vwây bây rawênh vwây nŏq gĕh puôn con gŏng, vênh khây canong măt, avôq bây alưr.7Con gŏng di muôi dân ca yau chamhưr, con gŏng di var ca lamo con, con gŏng di pe gĕh mŭh măt dân ca tamun, bây con gŏng di puôn dân ca khlang grâp păr.8Puôn con gŏng, ăp lâm con gŏng sŭng khây nĕh dăp ndăp gĕh prau panăr rawênh, sŭng di lăm vênh khây nggăp măt, en năr ca măng, khây nĕh đăng gĕh sinlơ lu lŏh lăm nhai pành:“Gŭn gayh, mơ gŭn gayh, mơ gŭn gayh cồ Cô Voq, Siđăch Trôq prơn gŭn,Candranh gĕh a daq vôq, avrêq heq bây di tât.”9Hê lăm lây khây con gŏng pađăc sinlơ sindraq sindil, sinlơ iơq prĭh, bây camvŭm may mo an Candranh gŭq vlơ vwây, nŏq cồ Candranh hôm mrĭh di tât wân lawân, hôm diêt,10nŏq var jât puôn cô camvĭnh pin nơm jưr u vôq măt Candranh gŭq vlơ vwây, bây cŭh sưmvăh Candranh hôm mrĭh di tât wân lawân, hôm diêt bây khây nĕh chĕq đuôn gŭn nơm jưr u vôq vwây, nhai pành:11“Cŭh Cô Voq bây Siđăch Trôq khananh de,Siđăch nhâng dip gal wŏq sinlơ sindraq, sinlơ iơq prĭh, bây prơn gŭn,mvăc Siđăch sun lŭh ăp sinlơ;khoi bây nuih cơnh Siđăch nŏq khây nĕh hôm diêt bây gĕh răq tatao.”
FAR EAST BROADCASTING COMPANY