Revelation12
1En du chin'hâu măq gĕh sây u vlơ trôq; du mvu ur chuq lăp nơm măt năr, bây măt khay u tĕh jâng nĕh, bây du lâm đuôn vatau gĕh mât var simănh vlơ camvôq nĕh,2en mvăc nĕh gĕh vŭn, nĕh cuôl sec sŭng lăm ji talaq, bây nô răn chĕq vĭq năq.3En du chin'hâu ndây gĕh sên sây vlơ trôq: Sên tĭq, du lâm dêr măq paho gĕh pâh lâm vôq, mât nke, bây pâh đuôn vatau vlơ khây vôq nĕh de.4Tiêng nĕh de đưc rôih du phân pe khây simănh vlơ trôq en hwât simănh jưr ntĕh. En dêr nŏq tao yăh u vôq tamun ur mơch dĕh, chĕq lăm tamun ur dĕh con nŏq nĕh nđưt con ur nŏq de.5Ur nŏq dĕh du lâm con klô, con nŏq cồ tamun sên vôq ăp daq a chhơ gadông loih. En con tamun ur nŏq de gĕh wŏq hao an Siđăch Trôq bây saq tât vwây Siđăch,6en tamun ur lôch du lăp sŭng tamăn singot, tŭq cồ nĕh gĕh du gatŭq Siđăch Trôq sŭmmrăp sindăc u nŏq, chĕq gĕh khây tamun ranô ranăm nĕh u nŏq sŭng du ravu var rayĕng prau jât năr.7En gĕh du sŭmmrơn minsŭh vlơ trôq. Mi-ca-ên bây khây con gŭn nĕh de tăm pâm bây con dêr; en con dêr nggâm chaq sŭh nĕh tăm pâm.8En nŏq nĕh đăng lôch prơn chĕq chŏl sĭq vlâq, gatŭq chĕq an khây nĕh khoi đăng hôm gĕh sây vlơ trôq wŏq.9Canŏq dêr măq bị hwât jưr — cồ vanông vĭh ađơm, gĕh cuôl pành chaq sŭh ha Sa-tan, nĕh cồ lamvoch lĕq dưnya — nĕh bị hwât jưr ntĕh, khây chaq sŭh nĕh de khoi bị hwât jưr simơ bây nĕh.10En ănh chăng du camvŭm nhai tayh vlơ trôq pành:“Vrêq heq, sinlơ wŏq yơt, prơn gŭn,bây daq gŭn Siđăch Trôq vơn de gĕh tât,nggâm bây sinlơ măq mi Candranh Wŏq Lap Yầu Siđăch de,mvăc nĕh cồ uĕh yăq pôp ŏh khây vơn de,cồ tamun măng năr yăq văq khây nĕh u vôq măt Siđăch Trôq vơn de, lĕq gĕh hwât jưr èn.11Khây nĕh sa vôq vlơ nĕh don n'ham Dive Con bây don camvŭm candân nơm de,khây nĕh đăng sinđach sinlơ hôm mrĭh nơm tât daq sindăc chĕq chưt.12Payh canŏq, căh vui hơn, ơ khây tăp trôqnggâm khây vu lây gŭq sŭng nŏq!Lŏh vòq âr an ntĕh bây daq lênh,mvăc chaq sŭh gĕh jưr tât gatŭq khamaysŭng lăm gĕh sinlơ măq nuih vyăq van'han,mvăc nĕh gưt nĕh hôm takiq vadâq vòq!”13Lăm dêr singgal lŭh pành nĕh lĕq bị hwât jưr ntĕh, nŏq nĕh dăh rachoq tamun ur, cồ tamun gĕh dĕh klô ken tĭq.14En var maq panăr khlang grâp măq gĕh paq an tamun ur nŏq chĕq nĕh păr tât tamăn singot, tât gatŭq nơm de, gatŭq cồ nĕh gĕh ranô ranăm u nŏq sŭng du vadâq, khây vadâq bây vanăc vadâq — diêr ngai a măt vĭh.15Mŏh cồ vĭh vruh daq lŭh a sŭng mŭnh nĕh dân ca phong daq dăh alưr tamun ur, chĕq nĕh ôp an ur nŏq chơh daq tât taklôn văt săq.16En ntĕh lŭh ti yơt tamun ur, ntĕh haq mŭnh bây nđưt daq phong cồ dêr gĕh vruh lŭh a mŭnh nĕh.17Canŏq dêr hao nuih bây tamun ur en nĕh saq lŭh wŏng trong tăm pâm bây maq cồ hôm sĭq vlâq sŭng chhe njang ur nŏq, cồ khây tamun tôq jơ ravwŏq Siđăch Trôq de bây gĕh camvŭm candân Siđăch Yêsu de.18En nĕh tao yăq vlơ chhŏh u vâr daq lênh.
FAR EAST BROADCASTING COMPANY