Matthew22
1En âh sĭq vlâq, Siđăch Yêsu du dâq wŏq nhai bây khây nĕh a camvŭm prŭp, pành:2“Daq Trôq gĕh prŭp dân ca du mvu cồ vatau, en vatau nŏq sŭmmrăp war sa tăm sai an con klô nơm de.3Vatau săng khây dĭch năc nĕh de saq chĕq cuôl khây tamun cồ gĕh panh tât war sa tăm sai, en đe khây nĕh đăng cơnh tât.4A heq vatau săng khây dĭch ndây, pành: ‘Căh nhai bây khây tamun gĕh panh: “Sên tĭq, ănh gĕh sŭmmrăp war sa ănh de, khây vưr nggâm khây gŏng lavau ănh de gĕh ôp gŏng, en ăp vrŭq gĕh sưndăc en. Căh tât bây war sa.”’5Cồ canŏq khây nĕh hwât saq mvăc đăng chĕq măt, nĕh heq saq lŭh mơ nĕh de, nĕh tĭq sinâng sĭq vrŭq ôp sa nơm de.6Sŭng lăm khây tamun hôm sĭq vlâq ndây, lăm nhŭp jơ khây dĭch năc vatau de, gĕh ôp pagơq en tachưt chĕq.7Canŏq en, vatau hao nuih, nŏq lăm săng congti nơm de saq, nĕh gĕh an tachưt văl chin'hâc nŏq bây sŏh roq palây khây nĕh de.8Alưr nŏq, vatau nhai bây khây dĭch nĕh de: ‘Cồ war sa tăm sai gĕh sưndăc en, cồ canŏq khây tamun cồ gĕh panh nŏq đăng yăh lôch.9Nŏq vrêq, căh saq tât ăp vrec trong, en hê khamay vlam dâng lây tamun, nŏq căh panh tât war sa tăm sai.’10En khây dĭch năc nŏq, lăm saq lŭh u khây con trong, gĕh vatom lĕq khây vu lây cồ khây nĕh vlam, lĕq viêm nggâm yăh, en nhi sa war gĕh vênh khây chăm tamuôi.11Aheq lăm saq lăp chĕq sên khây chăm tamuôi gŭq sa, vatau sây du mvu tĭq đăng chuq ao tăm sai.12Vatau nhai bây nĕh nŏq: ‘Ơ ganai, ôp bơh năm pôp lăp heq lăm đăng gĕh su ao tăm sai?’ Cồ canŏq nĕh nŏq kranh mŭnh.13Alưr nŏq, vatau săng khây dĭch năc: ‘Tănchăp ti jâng nĕh heq sĭq vlâq en hwât nĕh lăp vi jingo a ling tĭq, cồ gatŭq gĕh sinlơ nhim rơp bây kiêr sêch.’14Mvăc gŏq tamun gĕh cuôl, cồ canŏq takiq tamun gĕh săch sŏq.”15Lăm nŏq, alưr lăm hwât saq en, khây tamun Pha-ri-si tăm sinâng wŏng trong ôp bơh năm chĕq khây nĕh lăm dăq Siđăch sŭng camvŭm nhai.16Khây nĕh pađăr khây con tuyh nơm, nggâm khây tamun amaq Hê-rôt, tât bây Siđăch, nhai: “Ơ Gru, khananh gưt pành Gru cồ tamun yăh nhâng, en pađau tămti con trong Cô Voq de a sinlơ dip gal, en u Gru đăng gĕh sinlơ cŏh king nkênh sĭq du mvu lây, mvăc Gru đăng deng u maq ling vu de.17Payh canŏq, wĭnh an khananh gưt Gru sinâng bơh năm? Gĕh pâng ya an Sê-sa ha đăng?”18Aheq mvăc gưt nuih talaq chin'hâc khây nĕh de, Siđăch Yêsu nhai: “Ơ khây tamun tanrong mvâr tĭq, lŭh khây cô long găn Ănh?19An Ănh sên du păndŏh jên chĕq pâng ya hền.” Nŏq khây nĕh dơp an Siđăch du păndŏh đơ-ni-ê.20Siđăch nhai bây khây nĕh: “Gui nggâm săq heq cồ vu lây de?”21Khây nĕh âh: “Sê-sa de.” Lăm nŏq, Siđăch nhai bây khây nĕh: “Canŏq, căh trŏh an Sê-sa khây păch Sê-sa de, en an Siđăch Trôq khây păch Siđăch Trôq de.”22Lăm chăng camvŭm nhai nŏq, khây nĕh camhŏq lŭng, en khây nĕh saq, chĕq Siđăch sĭq vlâq.23Sŭng năr nŏq, khây tamun Sa-đu-sê tât mơch Siđăch, mvăc uĕh nhai pành đăng gĕh sinlơ tao rĭh sĭq vlâq, nŏq khây nĕh lŭp rasŏh Siđăch,24pành: “Ơ Gru, Môi-se gĕh nhai: ‘Hê du mvu lây nŏq chưt en ndŏh gĕh con, canŏq ŏh klô nĕh nŏq de saq sai si-ur pôp de en dĕh con an pôp nơm de.’25Aheq, sŭng khananh gĕh pŏh lâm pôp ŏh klô, tamun vôq lĕq, lăm sai ur, en chưt. En nĕh chĕq sĭq vlâq si-ur nĕh an ŏh nĕh de, lăm hôm ndŏh gĕh con.26Tamun di var en tamun di pe, an tât tamun di pŏh, khoi canŏq.27En a lưr lĕq, tamun ur nŏq khoi chưt.28Canŏq, sŭng sinlơ tao rĭh sĭq vlâq, ur nŏq cồ si-ur vu lây de sŭng pŏh ndu pôp ŏh nŏq? Mvăc lĕq săq khây nĕh gĕh sai ur nŏq.”29Aheq lăm âh camvŭm, Siđăch Yêsu nhai bây khây nĕh: “Khây cô tĭh wil en, mvăc đăng gưt Sirăq Gŭn nggâm prơn gŭn Siđăch Trôq de.30Mvăc sŭng sinlơ tao rĭh sĭq vlâq, vu đăng sai ur khoi đăng sai klô, aheq khây nĕh rĭh dân ca khây con gŭn vlơ trôq.31Hôm sĭq sinlơ tao rĭh sĭq vlâq tamun chưt de, khây cô ndŏh đŏc camvŭm gĕh Siđăch Trôq nhai bây vơn, pành:32‘Ănh heq cồ Siđăch Trôq Ap-ra-ham de, Siđăch Trôq I-sac de en Siđăch Trôq Ya-côp de’? Siđăch Trôq đăng gal cồ tamun chưt de, nŏq cồ tamun rĭh de.”33Lăm chăng canŏq, con văl camhŏq sĭq sinlơ pađau tămti Siđăch de.34Hôm khây tamun Pha-ri-si, lăm chăng pành Siđăch ôp an khây tamun Sa-đu-sê kranh mŭnh, nŏq tăm vatom bây ndăng ganai.35Muôi sŭng khây nĕh, cồ gru pađau ravwŏq, lŭp rasŏh chĕq long găn Siđăch —36“Ơ Cô, camvŭm pân lây cồ măq dông lĕq sŭng ravwŏq?”37En Siđăch nhai bây nĕh: “‘Căh sinđach Cô Voq, cồ Siđăch Trôq pôp de, bây lĕq nuih talaq pôp de, nggâm lĕq wênh nggui pôp, bây lĕq chhu vôq pôp de.’38Nŏq cồ camvŭm pân măq bây măq mi dông lĕq.39Hôm camvŭm pân di var dân ca camvŭm nŏq — ‘Căh sinđach tamun rawênh con de dân ca nơm vơn.’40Lĕq ravwŏq bây khây tiêng tri gĕh chĕq tơm vlơ var camvŭm pân heq.”41Vrêq heq, alưr lăm khây tamun Pha-ri-si gĕh tăm vatom simơ, Siđăch Yêsu lŭp khây nĕh,42pành: “Khây cô sinâng bơh năm sĭq Candranh Krit? Nĕh cồ con vu lây?” Khây nĕh âh camvŭm Siđăch: “Vatau Đa-vit de.”43Siđăch nhai bây khây nĕh: “Canŏq ôp bơh năm nŏq Đa-vit, sŭng Siđăch Wênh, cuôl Nĕh pành Cô Voq, lăm nhai:44‘Cô Voq nhai bây Siđăch ănh: “Gŭq u maq ti ma Ănh de, an tât lăm lây Ănh chĕq khây tamun tăm chŏl Con de u tĕh jâng Con”’?45Canŏq hê Đa-vit cuôl Nĕh pành ‘Cô Voq,’ nŏq ôp bơh năm Siđăch cồ con vatau nŏq de di gĕh?”46Đăng gĕh vu lây âh sĭq vlâq Siđăch gĕh du camvŭm lây, khoi đăng du mvu lây thêng lŭp Siđăch wŏq a năr nŏq.
FAR EAST BROADCASTING COMPANY