Matthew21
1Lăm khây nĕh mơch tât palây Yê-ru-sa-lem, en saq tât Bê-pha-yê, sĭq tu maq gŭng Ô-liu, lăm nŏq Siđăch Yêsu pađăr var ndu con tuyh,2săng khây nĕh: “Căh saq lăp sŭng palây a vôq măt pôp ŏh, en pôp ŏh sây sŏng u nŏq du lâm asĕh răch vang gĕh tănchăp, nggâm bây du lâm asĕh răch con gŭq bây nĕh. Lăm đŏh chhe tănchăp, căh têch tât Ănh iưn.3En hê gĕh vu lây nŏq nhai păch lây bây pôp ŏh, nŏq pôp ŏh nhai pành: ‘Siđăch gĕh vrŭq cơnh don asĕh heq,’ en tamun nŏq sŏng lăm nŏq chĕq an khây nĕh saq.”4Maq ndây, vrŭq heq gĕh ôp lŭh chĕq an camvŭm cồ gĕh nhai lŭh don cô tiêng tri gĕh jêng gayh, pành:5“Căh săng con ur Si-ôn de: Sên tĭq, vatau kha-ay de tât bây kha-ay, tăn jưr nơm en gŭq vlơ asĕh răch — nŏq cồ vlơ du lâm asĕh răch con, con asĕh răch vang.”6Lăm vrêq, khây con tuyh, lăm saq en ôp dân ca Siđăch Yêsu gĕh pân pađau khây nĕh,7gĕh têch asĕh răch vang nggâm asĕh răch con sĭq, en lăq ao nơm de vlơ khây asĕh nŏq, en Siđăch hao gŭq vlơ nŏq.8Lăm vrêq, gŏq ndu sŭng con văl lăq ao khây nĕh de vlơ trong, hôm khây tamun ndây păh khây singging chhơ en răh vlơ trong nŏq.9Canŏq en, khây mintan gŏq săq saq avôq Siđăch nggâm saq bây alưr sec hao, pành: “Hô-sa-na Con vatau Đa-vit! Payom tapơ Candranh tât sŭng săq Siđăch Trôq! Hô-sa-na vlơ trôq prĭh tĭq!”10Lăm Siđăch lăp sŭng palây Yê-ru-sa-lem, lĕq palây minsôc minsac, tăm lŭp: “Nŏq cồ vu lây?”11Canŏq en mintan con văl âh: “Nŏq cồ tiêng tri Yêsu, a Na-sa-ret, ntĕh Ga-li-lê.”12Siđăch Yêsu saq lăp sŭng Nhi Cŭh, en Nĕh dăh lĕq săq khây tamun tăch vro u sŭng Nhi Cŭh, en phlâq tarung nra tamun gâl jên, nggâm vi gŭq tamun tăch sŭm vrăt de.13Siđăch nhai bây khây nĕh: “Camvŭm lĕq gĕh chêr: ‘Nhi Ănh gĕh cuôl pành nhi vơu ngwân,’ aheq khamay ôp an nhi nŏq jêng minsôm can'hưn can'hlĕq.”14En khây tamun jingo măt bây tamun cannwe tât mơch Siđăch sŭng Nhi cŭh, en Siđăch jâc yăh an khây nĕh.15Cồ canŏq khây gru sipăm măq nggâm khây gru pađau ravwŏq, lăm sây khây vrŭq măq mi cồ Siđăch gĕh ôp, bây sây khây con se tapơ sŭng Nhi Cŭh, pành: “Hô-sa-na Con vatau Đa-vit,” nŏq khây nĕh măq nuih.16Khây nĕh nhai bây Siđăch: “Gru gĕh chăng khây con se nhai păch lây đăng?” Aheq Siđăch Yêsu nhai bây khây nĕh: “Gĕh vồh! Khây cô ndŏh gĕh lăm lây đŏc pành: ‘Cô Voq gĕh sŭmmrăp sưndăc sinlơ payom a mŭnh khây con se de nggâm khây con ken hôm pu,’ uy?”17Lăm lăq chĕq khây nĕh, Siđăch saq lŭh ntrăch a palây chĕq tât Bê-tha-ni en vĭq măng u nŏq.18Tât silang, sŭng lăm saq sĭq vlâq lăp palây, nŏq Siđăch pangot.19Lăm deng sây du tơm chhơ vả u maq trong, Siđăch saq tât chhơ nŏq en singgal gưt đăng gĕh păch lây vlơ nĕh aling la vŏq en. Siđăch nhai bây nĕh: “Play đăng hôm gĕh u may wŏq an tât gơih nggơih,” en sŏng lăm nŏq, chhơ vả nŏq ro chĕq.20Sây canŏq en, khây con tuyh camhŏq, nhai: “Ôp bơh năm nŏq chhơ vả ro sŭmmrât canŏq?”21En lăm âh camvŭm, Siđăch Yêsu nhai bây khây nĕh: “Nhâng, Ănh nhai bây pôp ŏh, hê pôp ŏh gĕh sinlơ tôq bây đăng ngâm, nŏq pôp ŏh ôp gĕh đăng gal ayh vrŭq heq an chhơ vả, mà tât cồ hê pôp ŏh nhai bây gŭng heq: ‘Căh gĕh iơq hao, en gĕh hwât jưr daq lênh,’ en vrŭq nŏq gĕh ôp lŭh.22Ăp sinlơ, an nŏq cồ sinlơ lây pôp ŏh cuôl wĭnh sŭng camvŭm vơu ngwân, nŏq pôp ŏh wŏq gĕh lăm tôq sŏq don camvân.”23En lăm Siđăch lăp sŭng Nhi Cŭh en, khây gru sipăm măq nggâm khây cô camvĭnh sŭng con văl gĕh tât vlam Siđăch sŭng lăm nĕh pađau tămti, lŭp: “Don prơn gŭn lây Gru ôp khây vrŭq heq, en vu lây gĕh an Gru prơn nŏq?”24Cồ canŏq chĕq âh camvŭm, Siđăch Yêsu nhai bây khây nĕh: “Ănh khoi lŭp khây cô du camvŭm, en hê khây cô âh gĕh camvŭm Ănh, nŏq Ănh khoi nhai an khây cô gưt Ănh ôp khây vrŭq heq don a prơn gŭn lây.25Chin'hâu ŭm vôq Yăng de — chin'hâu nŏq a vi lây? A vlơ trôq ha a con tamun?” Aheq, khây nĕh tăm nhai bây ndăng ganai, pành: “Hê vơn nhai: ‘A vlơ trôq,’ canŏq Nĕh nhai bây vơn: ‘Nŏq payh ơ tơm lây nŏq khây cô đăng tôq nĕh?’26Hôm hê vơn nhai: ‘A con tamun,’ nŏq vơn phŭng con văl, mvăc lĕq săq khây nĕh sên Yăng cồ du cô tiêng tri.”27Nŏq lăm âh camvŭm Siđăch Yêsu, khây nĕh nhai: “Khananh đăng gưt.” Siđăch khoi nhai bây khây nĕh: “Ănh khoi đăng an khây cô gưt Ănh ôp khây vrŭq heq don a prơn gŭn lây.28En heq, khây cô sinâng bơh năm? Du mvu tĭq gĕh var lâm con klô, en lăm tât bây con di muôi, nĕh nhai: ‘Ơ con klô, năr heq con saq ôp vrŭq u rông ramvu ơ.’29Aheq lăm âh sĭq vlâq, nĕh nhai: ‘Con đăng saq hôq,’ cồ canŏq a lưr nŏq, lăm pagâl nuih talaq, nŏq nĕh saq.30Hôm lăm tât vlam con di var, nĕh cồ vap nhai dân canŏq. En, lăm âh camvŭm, nĕh nhai: ‘Gĕh con, ơ vap,’ en nĕh đăng saq.31Vu lây sŭng var lâm con klô nŏq ôp bây nuih cơnh vap khây nĕh de?” Khây nĕh âh: “Con di muôi.” Siđăch Yêsu nhai bây khây nĕh: “Nhâng, Ănh nhai bây khây cô pành khây tamun wŏq jên pâng ya nggâm ur can'hat saq lăp sŭng Daq Trôq Cô Voq de lor khây cô.32Mvăc Yăng gĕh tât bây khây cô sŭng con trong yăh sŏng, nŏq khây cô đăng tôq nĕh. Hôm khây tamun wŏq jên pâng ya nggâm ur can'hat tôq nĕh. Aheq khây cô, cồ gĕh deng sây en, đăng cơnh palâq vôq alưr nŏq chĕq tôq nĕh.33Căh chăng du camvŭm prŭp ndây. Gĕh du mvu nơm ntĕh, cồ tamun gĕh tăm du rông ramvu, tatao paga rawênh rông nŏq, khwai chhŭng chĕq păt alăc ramvu sŭng nŏq, tatao tông prĭh en an khây tamun tăm ramvu chwâl rông nŏq, en nĕh saq ngai.34Vrêq heq, sŭng lăm khây bĕh play mơch tât, nơm ntĕh pađăr khây dĭch nơm de saq tât bây khây tamun tăm ramvu chĕq sŏq maq play jo nĕh de.35Aheq lăm nhŭp jơ vatom khây dĭch nơm ntĕh de en, khây tamun tăm ramvu pâm nĕh heq, tachưt nĕh tĭq, hwât tamô nĕh tơq.36En wŏq, nĕh pađăr khây dĭch ndây tât, gŏq săq vlơ vatom lor, en khây nĕh khoi ôp an khây dĭch nŏq dân canŏq.37En alưr lĕq, nĕh săng đe con klô nĕh de tât bây khây tamun tăm ramvu, pành: ‘Khây nĕh gưt phŭng con klô nơm de.’38Aheq văl tăm ramvu, lăm sây con klô nŏq, gĕh tăm nhai bây ndăng ganai: ‘Heq cồ con wŏq păch caya. Vrêq vơn tachưt nĕh en wŏq păch caya nĕh de.’39Lăm nhŭp jơ con klô nŏq en, khây nĕh hwât con nŏq lŭh ntrăch a rông ramvu en tachưt chĕq.40Canŏq, lăm nơm rông ramvu tât, nĕh ôp păch lây bây khây tamun tăm ramvu nŏq?”41Khây nĕh âh bây Siđăch: “Nơm ntĕh tachưt văl chin'hâc nŏq an di lŏh sat, en an khây tamun tăm ramvu ndây chwâl rông, cồ khây tamun gưt dơp an nơm ntĕh maq play jo sŭng khây bĕh play khây nĕh de.”42Siđăch Yêsu nhai bây khây nĕh: “Gal đăng khây cô hôm ndŏh đŏc sŭng Sirăq Gŭn: ‘Tamô cồ khây tamun ôp nhi hwât chĕq, nĕh gĕh jêng tamô kranh gajăp an tơm nhi. Vrŭq heq gĕh ôp lŭh a Cô Voq, en nĕh yăh rom lŭng sŭng măt vơn?’43Payh ơ tu tơm heq, Ănh nhai bây khây cô pành Daq Trôq Cô Voq de gĕh nhŭp văt saq ntrăch a khây cô en gĕh paq an du văl gưt an lŭh play jo sŭng Daq Trôq nŏq.44Vu lây tavông lăp sŭng tamô heq vlam lêch pachăh, hôm tamô nŏq tarŏh vlơ vu lây, tamô nŏq gatŏq lêch tamun nŏq.”45Lăm chăng khây camvŭm prŭp Siđăch de, khây gru sipăm măq nggâm khây tamun Pha-ri-si singgal gưt pành Siđăch nhai sĭq khây nĕh.46Lăm wŏng trong chĕq nhŭp Siđăch, en đe khây nĕh phŭng con văl, mvăc con văl sên Siđăch cồ du Cô tiêng tri.
FAR EAST BROADCASTING COMPANY