Mark14
1Lăm nŏq, alưr var năr wŏq cồ tât năr sinwơi Saq Ntrăch bây năr sinwơi sa bănh Đăng Gĕh Tape, khây sipăm măq bây khây gru pađau ravwŏq saq wŏng trong lăm lây, chĕq alưr gŭq cŏch nhŭp Siđăch en, khây nĕh nhâng tachưt Siđăch chĕq.2Mvăc khây nĕh nhai: “Đăng gĕh ôp sŭng năr sinwơi, phŭng pành gĕh sinlơ minsôc minsac ôp lŭh sŭng văl ganơ.”3Sŭng lăm Siđăch gŭq u palây Bê-tha-ni, sŭng nhi Si-môn de, cồ tamun rawŏq ramanh, Dim Siđăch gŭq u mvrăh sa nŏq gĕh du mvu ur saq tât, văt bây du lâm sitôq daq pring gŏch chĕq daq pring cam tùng yăh nthôr, săt jên lŭng. Alưr pâm pachăh bĭnh nŏq, nĕh rung daq pring nŏq vlơ vôq Siđăch.4Nŏq sŭng ganai khây nĕh, gĕh var pe du hao nuih: “Lŭh ôp păch lây nŏq gĕh vrŭq hwach daq pring nthôr heq lŏh?5Mvăc daq pring heq nhâng tăch gĕh vlơ pe rayĕng đơ-ni-ê en nŏq paq an tamun lŏh sat.” Khây nĕh nhai canjâq yông nŏq.6Nŏq Siđăch Yêsu nhai: “Saq chĕq yông heq gŭq iên. Lŭh pôp ŏh ôp rabăh rabơp nĕh canŏq? Nĕh gĕh ôp du vrŭq yăh an Ănh.7Mvăc pôp ŏh wân lawân gĕh tamun lŏh sat gŭq bây nơm, nggâm an dâq lây đăng gưt pôp ŏh cơnh pôp ŏh nhâng ôp gĕh vrŭq yăh an khây nĕh, hôm pôp ŏh nhâng đăng gĕh Ănh wân.8Nĕh gĕh ôp vrŭq cồ nơm nĕh ôp gĕh. Nĕh gĕh sŭmmrăp lor chĕq lap rup Ănh tămhơch tât vrŭq tâp.9Nhâng, Ănh nhai bây pôp ŏh, an canŏq caheq Sipơp Yăh gĕh yảng lŭh tŭq lây vlơ ăp gatŭq u dưnya nŏq vrŭq cồ yông heq gĕh ôp nhâng gĕh nhai lŭh sŭng sinlơ căh tôr tât nĕh.”10Hôm Yu-đa Ich-ca-ri-ôt, muôi sŭng mât var con tuyh, saq lŭh tât bây khây gru sipăm măq chĕq nĕh wŏng trong dơp Siđăch an khây nĕh iưn.11Lăm nŏq, alưr chăng canŏq en, khây nĕh vui hơn lŭng bây gĕh pănggân an nĕh jên. En nĕh saq wŏng trong lây yăh dông lĕq chĕq nhŭp dơp Siđăch.12Tât năr di muôi sĭq sinwơi sa Bănh Đăng Gĕh Tape, lăm vu pađăc păch pađăc dive con an sinwơi Saq Ntrăch, khây con tuyh Siđăch nhai bây Siđăch: “Gru cơnh khananh saq sŭmmrăp u vi lây chĕq Gru gĕh sa năr sinwơi Saq Ntrăch?”13En Siđăch săng var sŭng khây con tuyh nơm, en nhai bây khây nĕh: “Căh saq lăp sŭng palây, en pôp ŏh gĕh vlam du mvu anh vaniêng daq. Căh saq bây nĕh nŏq.14Hê nĕh lăp nhi lây, saq nhai bây tamun nơm nhi pành: ‘Gru nhai: “Côt wŏq tamuôi Ănh je, tŭq Ănh chĕq sa sinwơi Saq Ntrăch bây khây con tuyh Ănh, u tŭq lây?”’15Nơm nhi nhâng saq pađau pôp ŏh du lâm côt măq u vlơ nhi prĭh cồ gĕh sŭmmrăp sindăc, en saq sŭmmrăp an vơn iưn u nŏq.”16Canŏq khây con tuyh saq lŭh ntrăch en saq lăp sŭng palây, en khây nĕh sây ăp vrŭq dân ca Siđăch cồ gĕh nhai bây khây nĕh, en khây nĕh sŭmmrăp du war sa sinwơi Saq Ntrăch.17Lăm mau lăq jingo en, Siđăch saq tât bây mât var con tuyh.18Lăm khây nĕh gĕh gŭq maq mvrăh sa bây sa war, Siđăch Yêsu nhai: “Nhâng, Ănh nhai bây pôp ŏh pành du mvu sŭng pôp ŏh, cồ tamun gĕh sa bây Ănh, nŏq tăm chŏl bây Ănh.”19Khây nĕh saq jưl măt en tamun heq tât tamun tĭq âh bây Siđăch: “Nhâng gĕh gal ănh ha đăng?”20Nŏq Siđăch nhai bây khây nĕh: “Nŏq cồ muôi sŭng mât var ndu pôp ŏh, tamun cồ plŏng bănh lăp nggan bây Ănh.21Mvăc Con Tamun saq dân ca camvŭm gĕh chêr sĭq Nĕh, mơ lŏh sat lŭng nggơi an tamun cồ don a nĕh, Con Tamun vlam sinlơ tăm chŏl! Nŏq tamun nŏq Yăh dông an nĕh vâng gĕh dĕh lŭh.”22Lăm khây nĕh gŭq sa, alưr sŏq bănh en, may mo, Siđăch pêch lŭh, dơp an khây nĕh en nhai: “Saq wŏq vồh. Heq cồ rup Ănh je.”23En alưr lăm nhŭp nggan en, may mo, Siđăch dơp an khây nĕh, en khây nĕh lĕq saq huch du nggan nŏq.24Siđăch nhai bây khây nĕh: “Heq cồ n'ham tăm lăp ti Ănh je, cồ n'ham gĕh tapinh jưr an gŏq ndu iưn.25Nhâng, Ănh nhai bây pôp ŏh, pành Ănh nhâng đăng hôm huch daq a play ramvu heq wŏq an tât năr nŏq, cồ năr Ănh huch daq play ramvu me sŭng daq Cô Voq.”26Alưr lăm adŏh du sirăq adŏh Siđăch en, khây nĕh saq lŭh tât tŭq gŭng Ô-liu.27Siđăch Yêsu nhai bây khây nĕh pành: “Lĕq săq pôp ŏh nhâng gĕh vông jŏch, dân ca gĕh chêr pành: ‘Ănh nhâng gĕh pâm tamun tê, nŏq con dive nĕh gĕh taprăh taprăng.’28Nŏq alưr lăm Ănh gĕh ôp an hôm mrĭh sĭq vlâq, Ănh nhâng saq tât palây Ga-li-lê lor pôp ŏh.”29Nŏq Phi-e-rơ âh bây Siđăch: “Tât daq an lĕq săq gĕh vông jŏch, hôm ănh nŏq đăng uy.”30Siđăch Yêsu nhai bây nĕh: “Nhâng, Ănh nhai bây pôp, pành năr heq — sŭng măng heq — lor a iêr kwŏng nrau var dâq, pôp gĕh di mo Ănh pe dâq.”31Nŏq nĕh nhai nhâng bâng: “Hê gĕh nhŭp ănh chưt bây Gru, ănh nhâng đăng gĕh di mo Gru uy.” Nŏq vrêq, lĕq săq khây nĕh nhâng gĕh nhai canŏq.32En khây nĕh saq tât du gatŭq, săq tŭq nŏq cồ Gêt-sê-ma-nê, en Siđăch nhai bây khây con tuyh nơm: “Căh gŭq u heq sŭng lăm Ănh vơu ngwân.”33Siđăch văt Phi-e-rơ, Ya-cơ, bây Yăng saq bây Siđăch, en nŏq Siđăch sây bưt mbê bây jăl wăl lŭng.34Siđăch nhai bây khây nĕh: “Wênh nggui Ănh je nĕh jăl wăl kwa, tât daq cơnh mơch chưt. Saq gŭq u heq mŏq bây căh iêh.”35En saq ngai dông du vau, Siđăch vĭq ncŭp jưr ntĕh en vơu ngwân pành, hê ôp gĕh, wĭnh vadâq nŏq saq ntrăch a Nĕh.36Siđăch nhai: “A-ba, ơ Vap, bây Vap ăp vrŭq nhâng ôp gĕh lĕq. Wĭnh chĕq prăp nggan heq ngai a Con. Nŏq đăng gal vrŭq cồ Con cơnh, nŏq cồ vrŭq Vap cơnh.”37En nŏq Siđăch sĭq vlâq en sây khây nĕh hôm mo vĭq, nŏq Siđăch cuôl Phi-e-rơ: “Si-môn, pôp vĭq hà? Pôp đăng căh iêh gĕh du vadâq hà?38Căh gŭq iêh bây vơu ngwân, chĕq pôp ŏh đăng vông lăp sinlơ lam voch. Wênh nggui nŏq nhâng cơnh lŭng, hôm rup swan nŏq la-ui.”39Du dâq wŏq, lăm saq lŭh en, Siđăch vơu ngwân, nhai ăp camvŭm dân canŏq.40En du dâq wŏq, lăm sĭq vlâq, Siđăch sây khây nĕh hôm mo vĭq, mvăc măt khây nĕh canjâq lŭng, en khây nĕh đăng gưt păch lây chĕq âh vlâq camvŭm Siđăch.41En Siđăch tât dâq di pe en nhai bây khây nĕh: “Pôp ŏh hôm mo vĭq bây gŭq lu hà? Lôch en! Vadâq lĕq tât. Saq sên tĭq! Con Tamun gĕh mơch vlam vu chŏl vlâq nhŭp dơp lăp ti tamun bưn bap.42Tao yăh sô, saq vồh. Sên tĭq, tamun tăm chŏl bây Ănh lăq tât mơch en.”43Sưmmrâp, lăm Siđăch hôm mo nhai, Yu-đa, muôi sŭng mât var con tuyh saq tât nggâm bây nĕh nŏq cồ du mintan gŏq săq văt bây pĭh taq nggâm chhơ lon, tât a tŭq khây sipăm măq, khây gru pađau ravwŏq nggâm khây cô camvĭnh.44Nŏq vrêq, tamun tăm chŏl bây Siđăch gĕh an khây nĕh sây du sinlơ chĕq gưt, pành: “Tamun lây cồ ănh phêp nŏq nhâng cồ Nĕh nŏq. Saq nhŭp Nĕh en têch saq an di yăh.”45Canŏq, lăm gĕh tât gatŭq, sưmmrâp, alưr tât mơch Siđăch, nĕh nhai: “Ra-bi,” en nĕh phêp Siđăch.46Lăm nŏq, Khây nĕh lŭh ti vlơ Siđăch en nhŭp jơ Siđăch.47Nŏq gĕh du mvu tĭq sŭng khây tamun tao yăq mơch, alưr lăm tăq pĭh lŭh en, saq pâm du dĭch sipăm măq de en păh chăch la tôr nĕh.48Âh vlâq vrŭq cồ nhŭp jơ, Siđăch Yêsu nhai bây khây nĕh: “Khamay saq lŭh văt bây pĭh taq nggâm chhơ lon chĕq nhŭp Ănh dân ca saq nhŭp du tamun can'hưn canŏq?49Ăp năr Ănh gŭq bây khamay lăm yảng pađau sŭng nhi cŭh, nŏq lŭh khamay đăng nhŭp Ănh. An canŏq, heq cồ chĕq camvŭm Sirăq Gŭn gĕh ôp lŭh.”50Alưr lăm chĕq vlâq Siđăch, lĕq săq khây nĕh saq ndu tăm pôn lĕq.51Gĕh du mvu klô dlu tĭq saq bây Siđăch, nĕh ayh chop du păng nseng chop rawênh nơm, en khây nĕh nhŭp jơ nĕh,52nŏq alưr hwât chĕq vlâq nseng chop, nĕh gŭq sirôq lôt du.53Khây nĕh têch Siđăch Yêsu văt tât vi sipăm măq, en lĕq săq khây sipăm măq, khây cô camvĭnh, bây khây gru pađau ravwŏq jŭm vatom vlâq du gatŭq.54Hôm Phi-e-rơ saq bây Siđăch a ngai ngai, saq lăp tât sŭng glăm mơch gatŭq gru sipăm măq, en nĕh gŭq bây khây lĭnh gŭq jơ bây njâr ŭnh mơch tŭq vu rôp ŭnh.55En nŏq, khây sipăm măq bây lĕq khây tamun sŭng gatŭq nhŭp dôih wŏng trong sên gĕh păch lây chĕq yăq Siđăch Yêsu cơnh tachưt Siđăch, nŏq khây nĕh đăng wŏng sây bap lây.56Mvăc gĕh gŏq ndu candân mvâr tăm chŏl vlâq bây Siđăch, nŏq camvŭm candân khây nĕh de đăng gĕh tăm sa simơ bây ndăng ganai.57Gĕh var pe du, alưr pruh tao, candân yăq mvâr Siđăch, en nhai,58pành: “Khananh gĕh chăng Nĕh nhai cồ ‘Ănh nhâng pâm takhlai nhi cŭh don ti con tamun ôp lŭh heq, en sŭng pe năr Ănh nhâng tatao du nhi cŭh ndây đăng gal ti con tamun ôp lŭh.’”59An canŏq, tât daq sĭq vrŭq heq, nŏq camvŭm candân khây nĕh de nhâng đăng tăm sa simơ uy.60En alưr lăm tao yăq u vlăc canđal ăp ndu en, sipăm măq saq lŭp Siđăch Yêsu pành: “Lŭh may đăng âh mŭnh păch lây lĕq? Khây tamun heq ôp candân tăm chŏl vlâq may păch lây?”61Nŏq Siđăch gŭq krap mŏh bây đăng âh du mvŭm lây lĕq. Sipăm măq lŭp Siđăch wŏq, en nĕh nhai bây Siđăch: “May gĕh gal cồ Cô Krit, Con Siđăch Trôq cồ vu payom, đăng?”62Nŏq vrêq, Siđăch Yêsu nhai: “Ănh nhâng gal canŏq; en khamay gĕh sây Con Tamun gŭq u maq ma Candranh Prơn Gŭn bây tât vlăc canđal ăp sitŭq trôq.”63En nŏq alưr lăm hêch ao nơm, sipăm măq nhai: “Vơn hôm saq wŏng păch lây sĭq sinlơ candân wŏq?64Khamay gĕh chăng camvŭm nhai chhât en. Khamay sinâng lăm lây?” En nŏq lĕq săq vu lây khoi nhai dôih Siđăch cồ tamun cơnh chưt.65Gĕh var pe ndu saq chhŏh phĭch daq ju lăp Siđăch, tang măt Siđăch vlâq en pâm tôp Nĕh, en nhai bây Nĕh: “Saq nhai tiêng tri sên vồh!” Khây lĭnh cồ gŭq jơ nhâng đưc sưmmrât Siđăch en tôp.66Sŭng lăm Phi-e-rơ gŭq u sân, muôi sŭng khây dĭch ur sipăm măq de tât tŭq nĕh,67Lăm sây Phi-e-rơ gŭq njâr ŭnh, lăm nđơm dân nĕh, ur nŏq nhai: “Pôp nhâng gŭq bây Yêsu, tamun u Na-sa-ret.”68Nŏq nĕh di mo, nhai pành: “Ănh đăng gưt, nhâng đăng gưt ay cồ nhai păch lây.” En nŏq nĕh saq lŭh tu ling sân. 69Ur dĭch gĕh sây nĕh en saq nhai bây ăp ndu cồ tao yăq u nŏq pành: “Tamun heq nhâng cồ tăm simơ bây khây nĕh tĭq!”70Nŏq nĕh di mo du dâq wŏq. En du măt wŏq, khây tamun tao yăq u nŏq nhai bây Phi-e-rơ wŏq: “Nhâng pôp cồ tamun gŭq simơ bây khây nĕh tĭq, mvăc pôp nhâng cồ tamun Ga-li-lê.”71Nŏq nĕh saq raq nggâm raq săq pành: “Ănh đăng gưt tamun nŏq, tamun cồ khamay gĕh nhai tât”72Sưmmrâp iêr kwŏng nrau dâq di var en Phi-e-rơ căh tôr sĭq vlâq camvŭm cồ Siđăch Yêsu gĕh nhai bây nĕh pành: “Lor a iêr kwŏng nrau dâq di var, pôp gĕh di mo Ănh pe dâq,” nŏq sŭng lăm jăl wăl, nĕh nhim rơp.
FAR EAST BROADCASTING COMPANY