Mark13
1Lăm Siđăch gĕh saq lŭh ntrăch a nhi cŭh en, muôi sŭng khây con tuyh Siđăch nhai bây Siđăch: “Ơ Gru, sên tĭq! Khây tamô măq lŭng nggơi bây nhi la yăh rom lŭng yo!”2Siđăch Yêsu âh bây con tuyh nŏq: “Pôp sây khây nhi la heq măq mi hàh? Tât heq đăng hôm vlâq du tamô lây u heq gĕh chĕq hao vlơ tamô ndây nŏq tamô nŏq nhâng đăng vlam vông palâq.”3En lăm Siđăch gŭq vlơ gŭng Ô-liu tăm lăm măt bây nhi cŭh, Phi-e-rơ, Ya-cơ, Yăng bây Anh-rê lŭp ayh Siđăch:4“Wĭnh Gru nhai an khananh, tât lây ăp sinlơ nŏq gĕh tât? Bây gĕh păch lây an vu gưt lăm ăp sinlơ nŏq mơch ôp chhŏng?”5Lăm nŏq, Siđăch Yêsu pơq mŭnh nhai bây khây nĕh: “Căh jơ nơm, vâng chĕq vu lây têch pôp ŏh saq tih trong.6Gĕh gŏq ndu tât sŏq săq Ănh, nhai pành: ‘Heq cồ Ănh,’ en khây nĕh nhâng têch văt gŏq ndu saq tih trong.7Hôm lăm pôp ŏh gĕh chăng nhai sĭq minsŭh bây chăng lơ sĭq mintăq, nŏq vâng jăl wăl; ăp sinlơ nŏq nhâng gĕh tât, nŏq ndŏh gal cồ chôch lawăch uy.8Mvăc văl heq saq tao yăq tăm chŏl vlâq bây văl tĭq, nggâm daq heq tăm chŏl vlâq bây daq tĭq. Nhâng gĕh talŭng ntĕh u gŏq gatŭq, gĕh gŏq tŭq pangot sa. Ăp vrŭq nŏq ayh cồ avôq ăp sinlơ ji côr dân tamun cơnh dĕh ngăn.9Hôm pôp ŏh, Nơm pôp ŏh căh jơ nơm. Vu nhâng gĕh nhŭp pôp ŏh dơp an chung kwŏng bây an nhi tăm vatom, pôp ŏh vlam vu tôp pâm gông, gĕh tao yăq vlơ măt tamun cồ ôp măq bây khây vatau mvăc Ănh, dân ca du camvŭm candân an khây nĕh.10En lor lĕq, Sinlơ Yăh căh gĕh nhai lŭh an ăp văl ganơ.11Lăm khây nĕh têch pôp ŏh saq dơp an vu iưn, vâng phŭng sĭq camvŭm cồ nơm nhai. Nhâng canŏq, hê camvŭm lây gĕh paq an pôp ŏh sŭng vadâq nŏq, nŏq căh nhai camvŭm nŏq; mvăc pôp ŏh đăng gal cồ tamun nhai, nŏq cồ Siđăch Wênh.12Pôp gĕh dơp ŏh lăp tŭq chưt, vap dơp con. En ŏh con gĕh saq hao tăm chŏl mê vap nggâm ôp an khây nĕh vlam vu tachưt.13Pôp ŏh gĕh vlam vu get ncom mvăc săq Ănh je. Nŏq vu lây gŭq kram nuih an tât năr chôch lawăch, vu nŏq nhâng gĕh yơt.14En nŏq, lăm pôp ŏh sây sinlơ chhŭq chhau sĭq sinlơ singot singêt talĭh takhlai ôp lŭh ăp gatŭq đăng gĕh an ôp (vu lây sên căh sinâng), nŏq khây tamun gŭq u palây Yu-đê căh saq du hao vlơ gŭng,15hôm vu lây gŭq u vlơ vôq pho nhi, vâng jưr bây vâng saq lăp sŭng glăm chĕq sŏq păch lây lŭh ntrăch a nhi nơm,16en vu lây gŭq u mơ, vâng sĭq vlâq bây ăp păch hôm vlâq alưr chĕq sŏq ao jong nơm de.17Nŏq lŏh sat lŭng an khây ur cồ gĕh vŭn nggâm ur cồ an con pu sŭng ăp năr nŏq!18Palâq sĭq vlâq, căh vơu ngwân chĕq vrŭq nŏq đăng ôp lŭh sŭng khây tacăt.19Mvăc sŭng ăp năr nŏq nhâng gĕh păch lŏh sat tât daq ndŏh gĕh canŏq a lăm daq vôq sun lŭh trôq ntĕh, cồ a lăm Siđăch Trôq sun lŭh ăp vrŭq an tât năr heq, bây nhâng đăng gĕh canŏq wŏq.20En hê Siđăch đăng đưc dêh vlâq ăp năr nŏq, ăp con cồ gĕh rup swan nhâng đăng gĕh yơt. Nŏq mvăc khây tamun gĕh cuôl, cồ khây tamun Siđăch gĕh săch, Siđăch chit jưr maq sĭq vlâq ăp năr nŏq.21Lăm nŏq, hê vu lây nŏq nhai bây pôp ŏh: ‘Sên heq, Candranh Krit gŭq u heq! Sên tĭq, gŭq u tĭq!’ nŏq vâng tôq.22Mvăc candranh krit mvâr bây tiêng tri mvâr nhâng gĕh saq hao, en gĕh pành hyơ lŭh ăp sinlơ krăq krây bây vrŭq chin'hâu, chĕq hê gĕh wŏq, ôp an tih hwi khây tamun cồ gĕh cuôl.23Nŏq pôp ŏh căh jơ nơm! Saq sên heq, Ănh lĕq gĕh an pôp ŏh gưt lor ăp vrŭq en.24En nŏq, sŭng ăp năr nŏq, alưr sinlơ lŏh sat nŏq, măt năr nĕh vlam jingo, măt khay nhâng đăng păng lawi lawơ lŭh sinlơ silang nĕh de;25Khây simănh a vlơ trôq nĕh tarŏh jưr, bây ăp prơn camhlăng a vlơ trôq nĕh lănggưn gatâr.26Nŏq avrêq, vu gĕh sây Con Tamun sŏq chin'hâu bây sindraq sindil măq mi saq tât vlăc canđal ăp lawang tŭq.27Alưr nŏq, Siđăch gĕh pađăr khây con gŭn nggâm Siđăch gĕh jŭm vatom vlâq khây tamun gĕh cuôl Siđăch de ăp puôn gatŭq, a jâng ntĕh an tât jâng trôq.28Du maq ndây, căh đom iêt chăng sĭq dŭng a chhơ vả. A lăm singging nĕh hôm mo gase bây lŭh la en, pôp ŏh gưt pành khay dŭh cơnh mơch tât.29Nhâng canŏq, lăm pôp ŏh sây ăp vrŭq nŏq ôp lŭh, pôp ŏh gưt pành Siđăch gĕh gŭq mơch, u vôq lapông.30Nhâng, Ănh nhai bây pôp ŏh pành chhe njang heq nhâng đăng saq ntrăch an tât lăm ăp vrŭq nŏq gĕh ôp lŭh.31Trôq bây ntĕh gĕh saq ntrăch, nŏq ăp camvŭm Ănh je nhâng đăng saq ntrăch uy.32Hôm sĭq năr nŏq ha vadâq nŏq, ayh Vap, nŏq đăng gĕh vu lây gưt gĕh, tât daq khây con gŭn vlơ trôq nhâng canŏq, en Con khoi canŏq.33Căh jơ nơm! Căh gŭq câp iêh bây vơu ngwân, mvăc pôp ŏh đăng gưt vadâq nŏq cồ tât lây.34Dân ca du mvu tĭq saq trong ngai a nhi, lăm lŭh ntrăch a nhi nơm, en gĕh dơp an ăp dĭch nơm prơn sên groi vrŭq nơm de, nŏq nĕh pân ca'hya tamun sên nhi la pành tamun nŏq căh gŭq iêh;35Don nŏq, căh gŭq iêh, mvăc pôp ŏh đăng gưt lăm lây tamun tơm nhi sĭq tât — ha tât vi mau, ha năc năng; ha lăm iêr nrau ha ôi silang;36phŭng pành alưr lăm sưmmrât sĭq tât, nơm nhi nhŭp vlam pôp ŏh mo vĭq.37Nŏq sinlơ cồ Ănh nhai bây pôp ŏh, Ănh nhâng nhai bây ăp ndu: Căh câp iêh ơ!”
FAR EAST BROADCASTING COMPANY