Luke5
1Vrŭq sẫy lŭh lăm mintan con văl tăm piêt rawênh Yêsu chĕq chăng camvŭm Siđăch Trôq, bây Nĕh tao yăq u vâr tanlô Gê-nê-sa-rêt,2Yêsu sây var tong duq krêh a camvong đec pâq u vâr daq, en khây nĕh cồ yŭq ca, lăm nŏq jưr ntrăch a duq èn, khây nĕh pih yŭq.3Yêsu hao muôi sŭng var tong duq, en duq hao nŏq cồ Si-môn de. Yêsu săng nĕh chhưl duq lŭh ngai a vâr daq ndêt wŏq. Alưr lăm gŭq iên sŏng gatŭq èn, Yêsu pađau ca'hya an con văl a duq nŏq.4Lăm Yêsu pađau chhŏng, Yêsu nhai bây Si-môn: “Sô iau duq saq lŭh vi jru en trŏh yŭq pôp de jưr chĕq nhŭp du vadâq ca.”5Lăm âh camvŭm, Si-môn nhai: “Ơ gru, cồ lăq trŏh yŭq silang măng dŏh, khananh đăng nhŭp gĕh păch lây uy, en tôq bây camvŭm gru de, ănh heq trŏh yŭq.”6Alưr lăm ôp vrŭq nŏq, khây nĕh nhŭp gĕh gŏq ca lŭng, en yŭq khây nĕh mơch tarih.7Khây nĕh lawaih ti cuôl pôp ŏh a duq ndây tât lŭh ti an nơm, khây tamun nŏq tât bây đưc ca hao vênh vŭp var tong duq tât daq duq mơch tam vŭq.8Cồ canŏq, lăm sây vrŭq heq, Si-môn Phi-e-rơ pin nơm jưr u nkrŭng Siđăch Yêsu, nhai: “Cŭh Siđăch, wĭnh saq ntrăch a ănh, mvăc ănh heq cồ tamun gĕh bưn bap.”9Mvăc sinlơ phŭng sŭmmrŏh jôm vênh nơm nĕh bây lĕq tamun cồ gŭq bây nĕh payh ju vrŭq yŭq ca cồ khây nĕh yŭq gĕh nŏq,10Khoi dân canŏq sĭq Ya-cơ bây Yăng, cồ khây con klô Sê-bê-đê de, khây nĕh cồ pôp ŏh yŭq simơ Si-môn. Siđăch Yêsu nhai bây Si-môn: “Vâng phŭng, a heq pŏh mvôq pôp jêng gayh ti yŭq tamun.”11Alưr lăm iau hao duq lăp vâr daq, bây hwât tabayh lĕq caya nŏq, khây nĕh saq bây Yêsu.12Vrŭq sẫy lŭh lăm Yêsu tât gŭq u du palây tĭq, bây deng tĭq, du mvu nơm vênh rawŏq ramanh, lăm sây Siđăch Yêsu, nĕh pin gasưt măt jưr wĭnh bây Nĕh, pành: “Cŭh Siđăch, hê Cô cơnh, nŏq Cô ôp an ănh lĕq ji heq.”13Siđăch ntŏng ti rapâq nĕh, nhai: “Ănh cơnh, jrŏh chĕq vồh!” sưmmrâh, ji nŏq văch ntrăch a nĕh.14En Yêsu pân nĕh đăng nhai bây vu lây, palâq vlâq: “Sô saq lŭh măt di nơm an sipăm gưt bây pađăc păch pađăc sĭq vrŭq gĕh jrŏh pôp de dân ca Môi-se gĕh pađau, chĕq candân an khây nĕh.”15Payh canŏq, vu nhai plơ sĭq Yêsu lŭh lam gatŭq hwi dông wŏq, mŏh mintan con văl tăm têch ganai tât chĕq chăng Yêsu pađau ca'hya bây gĕh ranăm lĕq khây ji côr nơm de.16En Yêsu uĕh diêr lăp gatŭq singot bây vơu ngwân.17Vrŭq sẫy lŭh sŭng du năr tĭq, sŭng lăm Yêsu pađau ca'hya, nŏq gĕh khây tamun Pha-ri-si bây gru tămti ravwŏq gŭq u nŏq, cồ khây tamun gĕh tât a khây palây sŭng ntĕh Ga-li-lê bây Yu-đê, khoi ca a palây Yê-ru-sa-lem, bây prơn gŭn Cô Voq de gŭq bây Yêsu ranăm khây ji côr.18Sên tĭq, gĕh khây tamun tăm tung du mvu klô vĭq vlơ chơnơng, nŏq cồ tamun ji tŭm ti jâng, khây nĕh wŏng trong chĕq văt lăp pôp nŏq sŭng di lăm chĕq u vôq măt Yêsu.19Lăm wŏng đăng gĕh trong chĕq văt lăp pôp nŏq mvăc gŏq săq lŭng, mŏh khây nĕh hao vlơ vôq duôl nhi, pơq păch tatâm lŭh, khây nĕh yar tănjưr pôp nŏq vĭq vlơ chơnơng jưr vlăc canđal mintan tamun, sŏng măt Siđăch Yêsu.20Lăm sây sinlơ tôq camvân khây nĕh, Yêsu nhai: “Ơ tamun, bưn bap pôp gĕh hwât chĕq en.”21Khây gru tămti ravwŏq bây tamun Pha-ri-si tăm nhai tăm sơr vrŭq, pành: “Nĕh heq a de vu lây lŭh nhai camvŭm bưn bap canŏq? Vu lây lôch prơn hwât bưn bap đăng gal ayh du mvu Cô Voq ngăn?”22Nhâng Siđăch Yêsu gưt sinlơ sinâng khây nĕh de, chĕq âh sĭq vlâq, Nĕh nhai bây khây nĕh: “Lŭh khây cô tăm sơr vrŭq sŭng nuih talaq nơm canŏq?23Camvŭm lây cồ dê nhai dông: ‘Bưn bap pôp gĕh hwât en’ ha nhai: ‘Sô tao yăq bây pơq saq’?24Payh chĕq khây cô di gưt pành Con Tamun vlơ ntĕh gĕh prơn chĕq hwât bưn bap,” — Yêsu nhai bây nĕh cồ tŭm ti jâng — “Ănh săng pôp, sô tao yăq, situôn chơnơng nơm bây saq sĭq nhi pôp de.”25Sưmmrât, pôp nŏq tao yăq u măt khây nĕh, alưr lăm situôn chơnơng cồ nĕh vĭq u vlơ nŏq, mŏh nĕh saq sĭq nhi nơm, vatom sinlơ sindraq sindil an Cô Voq.26Sinlơ phŭng krăq krây tôq vênh jôm ăp ndu, bây khây nĕh payom Cô Voq, nuih vŭp phŭng candŭh, nhai pành: “Năr heq vơn gĕh sây khây vrŭq ca-ayh cavon canŏq.”27Alưr khây vrŭq nŏq, Yêsu saq ntrăch a nŏq bây sên mŏng mŏng du mvu wŏq pâng ya săq nĕh Lê-vi gŭq u nhi wŏq pâng ya, en Yêsu nhai bây nĕh: “Saq bây ănh!”28Pôq vaih alưr lăm tao yăq, hwât chĕq ăp sinlơ, nĕh saq bây Yêsu.29Lê-vi prang du war sa măq chĕq iau Yêsu sa u nhi nơm, bây gĕh mintan tamun cồ nhŭp pâng ya nggâm khây vu ndây gŭq simơ sa bây khây nĕh.30En cồ khây tamun Pha-ri-si bây gru tămti ravwŏq khây nĕh nhai jwĕh nhai săm bây con tuyh Yêsu de, pành: “Payh cồ vrŭq lây lŭh khamay sa huch bây tamun wŏq pâng ya nggâm khây tamun bưn bap?”31Chĕq âh camvŭm, Siđăch Yêsu nhai bây khây nĕh: “Tamun cồ yăh camhlăng đăng gĕh vrŭq chĕq tât gru jrơu, ayh tamun cồ ji râng cơnh vòq.32Ănh đăng tât chĕq cuôl panh tamun yăh sŏng, payh pành tamun gĕh bưn bap dâl sĭq chĕq palâq vôq.”33Payh en, Khây nĕh nhai bây Yêsu: “Khây con tuyh Yăng de uĕh ât sa chĕq pađăc camvŭm vơu ngwân, con tuyh tamun Pha-ri-si khoi canŏq. En cồ tamun khây cô ayh sa bây huch.”34Yêsu âh bây khây nĕh: “Khây cô vi cồ thêng nhŭp tamuôi tât sa war tăm sai ât sa sŭng lăm klô pasa hôm gŭq bây khây nĕh, gal đăng?35En nhâng chĕq tât năr cồ lăm său klô nŏq gĕh iau saq ntrăch khây nĕh. Lăm nŏq, sŭng khây năr nŏq, khây nĕh ât sa.”36En Yêsu đơm prŭp ju sinlơ pôn sưt an khây nĕh caheq: “Đăng vu lây tavôl lăp u ao dâm păng cŭmvai hêch lŭh cồ a păng ao me. Nhâng hê ôp canŏq, nĕh tahec ao me, nggâm cŭmvai cồ nhŭp a ao me khoi đăng tăm răp bây ao dâm.37Bây đăng gĕh vu lây tŭh sĕh me lăp sŭng sitôq ntô dâm. En hê ôp canŏq, sĕh me nĕh sa tahec ntô dâm, sĕh tapinh lŭh aling, sitôq khoi phŭch pachăh.38Palâq sĭq vlâq, tŭh vadâng sĕh me u sŭng sitôq me.39Alưr lăm huch sĕh dâm, đăng vu lây cơnh sĕh me, mvăc nĕh nhai pành: ‘Sĕh dâm băq dông.’”
FAR EAST BROADCASTING COMPANY