Luke13
1Takiq ndu tamun gĕh măt sŭng lăm nŏq đơm vlâq an Yêsu sĭq khây tamun Ga-li-lê cồ Phi-lat ôp n'ham khây tamun nŏq tăm valâm bây păch pađăc khây nĕh.2Lăm âh vlâq, Yêsu nhai bây khây nĕh: “Khây cô sinâng pành khây tamun Ga-li-lê nŏq cồ bưn bap gŏq dông a tamun Ga-li-lê ndây mvăc khây nĕh payh wŏq văq canŏq hàh?3Ănh nhai bây khây cô, đăng gal canŏq. Cồ canŏq, Hê khây cô đăng palâq vôq, nŏq lĕq săq khoi phiêt lawăch canŏq.4Ha ca mât pham ndu tĭq, cồ nhi prĭh u Si-lô-ê vông jưr tân a vlơ bây tachưt khây nĕh: Khây cô sinâng pành khây nĕh nŏq bưn bap chhŭq chhau vlơ khây vu rĭh u Yê-ru-sa-lem hàh?5Ănh nhai bây khây cô, đăng gal canŏq. Nhâng Hê khây cô đăng palâq vôq, nŏq lĕq săq khoi phiêt lawăch canŏq.”6En Yêsu đơm ju prŭp heq: “Nĕh tĭq gĕh chhơ vả gĕh tăm sŭng rông play ramvu nĕh, en nĕh tât wŏng plây vlơ chhơ nŏq chơh cồ sây.7Nĕh nhai bây tamun ôp rông plây: ‘Pôp sên heq, pe mva a lăm cồ ănh tât wŏng plây u chhơ vả heq en chơh cồ sây. Nŏq vrêq căl nĕh. Payh di tơm cồ nĕh tât daq ayh jrâm ntĕh palay canŏq?’8En lăm âh camvŭm, pôp nŏq nhai bây nơm nhi: ‘Ơ cô, wĭnh chĕq nĕh sĭq vlâq câp mva heq wŏq, tât daq sên ănh khwai ntĕh rawênh tơm nĕh bây doq jrơu vuh lăp.9Cồ takiq wŏq, sĭq alưr heq nĕh lŭh ncao plây … en payh nhâng đăng gĕh plây, nơm nhi căl nĕh vŏq!’”10Yêsu pađau tămti sŭng nhi vatom sŏng năr Sa-bat,11en tĭq, du mvu ur vlam chaq ji côr khlâm di mât pham mva, pôp ur nŏq lŭh côq vŭt bây đăng tao yăq sŏng gĕh.12Lăm Siđăch Yêsu sây ur nŏq, nĕh săng vu cuôl en nhai bây ur nŏq: “Ơ pôp ur, pôp gĕh yơt ntrăch a sinlơ jicôr nơm en.”13Yêsu chĕq ti vlơ pôp ur, sưmmrât pôp ur tao yăq sŏng vưt, bây payom Cô Voq.14Aheq lăm nĕh cồ sên vôq nhi vatom pơq camvŭm, vaih hao nuih mvăc Siđăch Yêsu ôp an vu yăh sŭng năr Sa-bat, en nĕh nhai bây con văl pành: “Gĕh prau năr cồ sŭng khây năr nŏq chĕq ôp vrŭq. Mvăc canŏq, căh tât chĕq ranăm yăh sŭng khây năr nŏq, payh đăng gal sŭng năr Sa-bat.”15En Yêsu âh camvŭm bây nĕh: nggâm Yêsu pành: “Rĭh mvâr di gĕh vôq! Đăng gal sŭng năr Sa-bat ăp ndu khây cô ayh cồ đŏh chhe tăn vưl gapu ha asĕh nơm lŭh ntrăch a war nrung chĕq têch nĕh saq huch daq?16En tamun ur heq, cồ con ur Ap-ra-ham de, cồ tamun Sa-tan nchăp trăng, sên tĭq, sŭng mât pham mva en, pôp ur đăng gĕh đŏh lŭh ntrăch a yơu heq sŭng năr Sa-bat hàh?”17Lăm Yêsu nhai khây camvŭm nŏq, khây tamun cồ tăm chŏl Yêsu can'hwănh prênh tôr, en mintan con văl hơn vui lŭng sĭq ăp vrŭq chin'hâu yăh tam văh gĕh ôp lŭh ju Yêsu.18En nŏq, Yêsu nhai: “Daq Cô Voq de nĕh dân ca sinlơ lây, bây ănh prŭp wĕh nĕh bây păch lây heq?19Daq ntĕh nŏq dân ca nggrăp pai răch tamun tĭq nhŭp vrŏh sŭng re nơm, en nggrăp hon tao măq jêng lŭh du tơm chhơ, bây sŭm khlang ôp minsôm vlơ singging nĕh de.”20Yêsu nhai wŏq: “Ănh prŭp wĕh daq Cô Voq de bây sinlơ lây?21Daq ntĕh nŏq dân ca tape cồ ur tĭq nhŭp tăm valâm sŭng pe la-i vanĭh di tât lăm vanĭh nŏq liq hao lĕq.”22En Yêsu saq lăp ăp khây palây pala, jưt jưt pađau tămti bây jưt jưt ôp vrŭq sŭng tanrong saq gơi nggơi tât Yê-ru-sa-lem.23Lăm nŏq, gĕh du mvu wĭnh lŭp Yêsu: “Cŭh Siđăch, gal đăng pành ayh takiq tamun gĕh yơt?” Yêsu âh bây khây nĕh:24“Căh di lĕq prơn chĕq saq lăp lapông hwêt mvăc, ănh nhai an pôp ŏh di gưt, gŏq ndu wŏng trong chĕq lăp en đăng lăp gĕh uy.25Alưr lăm nơm nhi nhi tao yăq bây păng lapông vlâq, pôp ŏh choh tao yăq maq a ling bây gŏh lapông, cuôl pành: ‘Cŭh Siđăch, wĭnh pơq an khananh maq.’ En lăm âh camvŭm bây pôp ŏh, nơm nơm nhi nhai: ‘Ănh đăng gưt khamay, ha khamay gŭq a vi lây lŭh.’26Lăm nŏq, pôp ŏh pơq camvŭm chĕq nhai pành: ‘Khananh cồ gŭq sa huch u vôq măt cô, bây cô gĕh pađau tămti sŭng khây trong măq khananh de.’27Aheq nơm nhi nhi âh camvŭm, nhai bây pôp ŏh: ‘Ănh đăng gưt khamay gŭq a vi lây tât. Sô saq lŭh ntrăch a ănh, cồ lĕq săq mintan ôp vrŭq đăng sŏng yăh tĭq!’28U tŭq nŏq, nhâng gĕh nhim rơp nggâm căp sêch lăm pôp ŏh sây Ap-ra-ham, I-sac, bây Ya-côp, nggâm lĕq khây tiêng tri gŭq sŭng daq Cô Voq de, en đăng sây pôp ŏh, mvăc nhŭp hwât lŭh a ling.29Vu tât a maq vâh bây maq nhâp, a maq cang bây maq king, bây vu gŭq sa huch simơ sŭng daq Cô Voq de.30Tĭq, gĕh khây tamun alưr chôch tĭq en nĕh vaih hao tâu vôq, en gĕh gŏq ndu gŭq avôq pôq vaih khây nĕh gŭq alưr lĕq.”31Payh sŏng lăm nŏq, khây tamun Pha-ri-si tĭq tât mơch, nhai bây Yêsu: “Wĭnh gru lŭh saq bây sô saq di ngai ntrăch a heq mvăc Hê-rôt cơnh tachưt gru.”32Yêsu nhai bây khây nĕh: “Sô saq, nhai bây sipiq nŏq: ‘Sên heq, ănh dăh chaq nggâm ranăm yăh an vu năr heq bây năr ta-au, en lăp năr di pe ănh ôp chhŏng lĕq ăp vrŭq.’33Payh canŏq, sĭq nơm ănh, vrŭq cồ vlơ lĕq nŏq cồ jưt jưt dăh bây tanrong vrŭq sŭng năr heq, năr ta-au bây năr klaq, mvăc sĭq bây du mvu tiêng tri, đăng gĕh chưt a ling palây Yê-ru-sa-lem.34Ơ Yê-ru-sa-lem, Yê-ru-sa-lem, may tachưt khây tiêng tri bây hwât tamô khây tamun cồ gĕh pađăr tât bây nơm. Gưt gŏq vadâq Ănh cơnh vatom ŏh con khamay vlâq dân ca vrŭq iêr vang takrŭc con nơm grăm sŭng panăr, èn khamay đăng cơnh.35Tĭq, nhi khamay de vu chit pakhlăh ntrăch a khamay. Ănh nhai bây khamay, khamay nhâng đăng sây ănh di tât lăm vadâq nŏq gĕh tât, cồ lăm khamay gưt nhai: ‘Gal nhâng payom tapơ Candranh gĕh tât sŭng săq Siđăch de.’”
FAR EAST BROADCASTING COMPANY