John6
1Alưr khây vrŭh nŏq, Siđăch Yêsu hao trong saq tât vâr maq tĭq daq lênh Ga-li-lê, (cồ daq lênh Ti-bê-ri-at).2Du mintan con văl gŏq săq lŭng saq bây Siđăch, mvăc khây nĕh gĕh dŏq sây khây păch chin'hâu cồ Siđăch ôp vlơ khây tamun ji côr.3Aheq Siđăch Yêsu saq hao vlơ gŭng, en u nŏq Siđăch gŭq jưr bây khây con tuyh Nĕh de.4(Lăm nŏq, Lễ Saq Ntrăch, cồ dŏq lễ tamun Yo-thai de, lĕq mơch tât en.)5A lưr nŏq, lăm tăm hơch hao bây sây văl ganơ gŏq săq tăm iau tât bây nơm, Siđăch Yêsu nhai bây Phi-lip: “Vơn vro păch sa u vi lây chĕq khây tamun heq sa?”6(Cồ nhâng Siđăch lŭp canŏq chĕq long găn Phi-lip, mvăc Nĕh gưt vrŭq Nĕh mơch ôp en.)7Phi-lip âh camvŭm Siđăch: “Var rayĕng đơ-ni-ê bănh khoi đăng lôch an khây nĕh chĕq du mvu wŏq du ndêt.”8Anh-rê, muôi sŭng khây con tuyh Siđăch de, cồ ŏh klô Si-môn Phi-e-rơ de, nhai bây Siđăch:9“U heq gĕh du mvu ŏh klô gĕh prăm lâm bănh ôp a phe va nggâm var lâm ca ken, cồ canŏq, khây păch heq ôp gĕh păch lây an khây tamun gŏq săq caheq?”10Siđăch Yêsu nhai: “Vrêq sŭmmrăp an khây vu gŭq jưr.” (Lăm nŏq gĕh gŏq canji u tuq nŏq.) Canŏq, khây tamun klô gŭq jưr, gĕh mơch prăm ravu ndu.11En nŏq, Siđăch Yêsu văt khây bănh, en lăm pađăc camvŭm may mo, Siđăch paq an khây tamun gŭq sa, en khoi ôp canŏq bây ca wŏq, vu cơnh dâng lây khoi gĕh lĕq.12En lăm con văl sa hơm en, Siđăch săng khây con tuyh Nĕh: “Saq dônh vatom khây vŭm bănh cồ hôm canăh, chĕq đăng gĕh păch lây lŭh valây chĕq.”13Canŏq, vu dông vatom en vadâng vênh mât var gasop bănh hôm canăh a prăm lâm bănh phe va cồ con văl gĕh sa.14Payh canŏq, khây tamun deng sây păch chin'hâu cồ Siđăch gĕh ôp, nhai pành: “Heq nhâng cồ Candranh nhai lor phải tât sŭng dưnya.”15Canŏq, mvăc singgal gưt pành khây nĕh cơnh tât bây piêt nơm chĕq iơq hao ôp vatau, nŏq Siđăch Yêsu diêr wŏq hao vlơ gŭng du mvu.16Lăm vrêq, lăm cô mơch mau, khây con tuyh Siđăch saq jưr tu maq daq lênh,17Nŏq lăm saq hao duq en, khây nĕh saq tât maq tĭq daq lênh sĭq tu Ca-bê-na-ŭm, en trôq jêng jingo sinđôch èn, cồ canŏq Siđăch Yêsu hôm ndŏh tât bây khây nĕh.18Mvăc du sŭmmrơn chhal camhlăng khlôm găn, nŏq daq lênh rapăn.19Lăm nre duq lŭh ngai mơch var jât prăm ha pe jât êch-ta-đơ, khây con tuyh sây Siđăch Yêsu saq a jâng vlơ daq lênh en tât mơch duq, nŏq khây nĕh nrat bây phŭng candŭh.20A heq Siđăch nhai bây khây nĕh: “Cồ Ănh heq! Vâng phŭng vầy!”21Canŏq mŏh, khây nĕh cơnh wŏq Siđăch hao duq, en sŏng lăm nŏq duq lăp tât vâr daq, cồ gatŭq khây nĕh saq tât.22Năr alưr, mintan con văl gŭq u vâr daq lênh maq tĭq sây pành hôm ayh du tong duq ngăn en đăng gĕh duq lây ndây u nŏq, bây sây pành Siđăch Yêsu đăng hao duq bây khây con tuyh Nĕh de, mà ayh con tuyh Siđăch de lŭh saq vŏq.23Cồ canŏq, gĕh khây duq ndây a Ti-bê-ri-at saq tât mơch gatŭq cồ khây nĕh gĕh sa bănh lăm Siđăch pađăc camvŭm may mo.24Payh canŏq, lăm mintan convăl sây pành Siđăch Yêsu đăng gŭq u nŏq, khây con tuyh Siđăch de khoi đăng gĕh, nŏq khây nĕh saq hao duq en saq tât Ca-bê-na-ŭm wŏng Siđăch Yêsu.25Lăm wŏng vlam Siđăch u maq tĭq vâr daq lênh, khây nĕh lŭp Siđăch: “Ơ Gru, Gru tât heq lăm lây?”26Siđăch Yêsu âh camvŭm khây nĕh en siđăch nhai: “Nhâng, Ănh nhai nhâng bây khây pôp ŏh, pôp ŏh wŏng Ănh đăng gal payh ơ pôp ŏh gĕh sây khây păch chin'hâu, mà payh ơ pôp ŏh gĕh sa bănh bây gĕh hơm talaq.27Vâng ôp vrŭq payh ơ păch sa dê pa-ŭm, mà payh ơ păch sa hôm sĭq vlâq an tât sinlơ rĭh gơih nggơih cồ Con Tamun paq an pôp ŏh, mvăc Cô Voq, cồ Vap, gĕh pâng păch tayh vlơ Nĕh.”28En nŏq khây nĕh nhai bây Siđăch: “Khananh ôp păch lây chĕq khananh ôp gĕh vrŭq Cô Voq de heq?”29Siđăch Yêsu âh camvŭm en nhai bây khây nĕh: “Heq cồ vrŭq Cô Voq de, nŏq cồ pôp ŏh chĕq nuih talaq tôq camvân u Candranh cồ Siđăch Trôq gĕh pađăr tât.”30Nŏq khây nĕh nhai bây Siđăch: “Canŏq Gru ôp păch chin'hâu lây chĕq khananh sây bây tôq Gru? Gru ôp vrŭq lây?31Un cô khananh de sa ma-na u sŭng tamăn singot, dân ca gĕh chêr pành: ‘Siđăch paq an khây nĕh bănh a vlơ Trôq chĕq sa.’”32En Siđăch Yêsu âh sĭq vlâq khây nĕh: “Nhâng, Ănh nhai nhâng bây pôp ŏh, Môi-se đăng gĕh paq an pôp ŏh bănh a vlơ trôq uy, ayh Vap Ănh de paq an pôp ŏh bănh nhâng a vlơ Trôq.33Mvăc bănh Cô Voq de cồ pănh a vlơ trôq jưr bây paq sinlơ rĭh an dưnya.”34Canŏq mŏh, khây nĕh nhai bây Siđăch: “Ơ Gru, wĭnh paq an khananh bănh nŏq wân lawân.”35Siđăch Yêsu nhai bây khây nĕh: “Ănh heq cồ bănh sinlơ rĭh de. Vu lây tât bây Ănh nhâng đăng pangot, en vu lây tôq camvân u Ănh nhâng đăng hôm lăm lây can'hir wŏq.36Cồ canŏq Ănh gĕh nhai bây pôp ŏh pành pôp ŏh gĕh sây Ănh mà pôp ŏh đăng tôq?37Lĕq săq vu lây cồ Vap paq an Ănh sẽ tât bây Ănh, en tamun tât bây Ănh, nŏq Ănh nhâng bâng đăng hwât lŭh ling.38Mvăc Ănh a vlơ Trôq jưr đăng gal chĕq Ănh ôp bây nuih Ănh cơnh, mà bây nuih cơnh Candranh pađăr Ănh tât.39Heq cồ nuih cơnh a Candranh cồ pađăr Ănh, nŏq là Ănh đăng chĕq tarui du mvu lây sŭng lĕq khây tamun cồ Vap gĕh paq an Ănh, palâq sĭq vlâq Ănh ôp an tamun nŏq tao rĭh sĭq vlâq sŭng năr chôch lĕq.40Mvăc heq cồ sinlơ cồ Vap Ănh cơnh, pành vu lây sây con bây tôq Con, nŏq gĕh sinlơ rĭh gơih nggơih, hôm Ănh heq nhâng ôp an tamun nŏq tao rĭh sĭq vlâq sŭng năr chôch lĕq.”41En nŏq, tamun Yo-thai tăm nhai lŭh lăp sĭq Siđăch mvăc Siđăch nhai: “Ănh heq cồ bănh a vlơ trôq jưr.”42Khây nĕh nhai: “Đăng gal heq cồ Yêsu, con klô Yô-sep de cồ vơn gưt dân lŭng vap bây mê nĕh de uy? Nŏq lŭh vrêq nĕh nhai pành: ‘Ănh a vlơ trôq jưr’?”43Siđăch Yêsu âh camvŭm en săng khây nĕh: “Vâng nhai lŭh lăp bây ndăng ganai wŏq vầy.44Đăng vu lây tât gĕh bây Ănh hê Vap, cồ Candranh săng pađăr Ănh, đăng đưc nĕh nŏq tât, hôm Ănh sẽ ôp an nĕh nŏq tao rĭh sĭq vlâq sŭng năr chôch lĕq.45Nŏq cồ sinlơ gĕh chêr sŭng khây sirăq nhai lor: ‘En lĕq săq gĕh Cô Voq pađau.’ Lĕq vu lây gĕh chăng bây gĕh đom u Vap nŏq tât bây Ănh.46Mvăc đăng gĕh du mvu lây gĕh dŏq lây sây Vap, ayh Candranh cồ gŭq u sŭng sinlơ gĕh măt Cô Voq de — Nĕh gĕh sây Vap.47Nhâng, Ănh nhai nhâng bây pôp ŏh, vu lây tôq nŏq gĕh sinlơ rĭh gơih nggơih.48Ănh heq cồ bănh sinlơ rĭh de.49Un cô jây pôp ŏh de gĕh sa ma-na sŭng tamăn singot, en khây nĕh chưt.50Heq cồ bănh a vlơ trôq jưr, chĕq an a bănh nŏq, vu lây sa nŏq đăng chưt.51Ănh heq cồ bănh sinlơ rĭh a vlơ trôq jưr. Hê vu lây sa bănh heq, nĕh nŏq gĕh rĭh an tât gơih nggơih. En wŏq, gŏng Ănh de khoi cồ bănh cồ Ănh paq an payh ơ sinlơ rĭh dưnya de.”52En nŏq tamun Yo-thai tăm cammlăh bây ndăng ganai, pành: “Ôp bơh năm nĕh heq an vơn sa gŏng nơm nĕh de di gĕh?”53Canŏq mŏh, Siđăch Yêsu nhai bây khây nĕh: “Nhâng, Ănh nhai nhâng bây pôp ŏh ur klô, hê pôp ŏh đăng sa gŏng Con Tamun bây huch n'ham Nĕh de, nŏq pôp ŏh đăng gĕh sinlơ rĭh sŭng nơm.54Vu lây sa gŏng Ănh bây huch n'ham Ănh, nŏq gĕh sinlơ rĭh gơih nggơih, hôm Ănh sẽ ôp an tamun nŏq tao rĭh sĭq vlâq sŭng năr chôch lĕq.55Mvăc gŏng Ănh cồ păch sa nhâng, en n'ham Ănh cồ păch huch nhâng.56Vu lây sa gŏng Ănh bây huch n'ham Ănh nŏq cơ gŭq u sŭng Ănh, en Ănh khoi gŭq sŭng tamun nŏq.57Dân ca Vap hôm rĭh gĕh săng pađăr Ănh, hôm Ănh rĭh don a Vap bơh năm, nŏq tamun sa gŏng Ănh khoi rĭh don Ănh dân canŏq.58Heq cồ bănh a vlơ Trôq jưr, đăng dân ca bănh cồ khây un cô gĕh sa en khoi chưt. Vu lây sa bănh heq gĕh rĭh an tât gơih nggơih.”59Siđăch nhai khây camvŭm nŏq sŭng nhi vatom lăm pađau tămti u Ca-bê-na-ŭm.60En nŏq, lăm gŏq săq tamun sŭng khây con tuyh Siđăch de chăng canŏq, khây nĕh nhai: “Camvŭm heq nhâng đăng dê, păch vu lây chăng di gĕh camvŭm nŏq?”61A heq Siđăch Yêsu nơm Nĕh gưt pành khây con tuyh Nĕh de tăm nhai lŭh lăp sĭq sinlơ nŏq, nŏq Siđăch nhai bây khây nĕh: “Camvŭm nŏq tagoq pôp ŏh hà?62Canŏq hê pôp ŏh sây Con Tamun hao tu gatŭq cồ Nĕh gŭq a lor heq nŏq mŏq sinâng?63Siđăch Wênh cồ Candranh ôp an rĭh; hôm gŏng n'ham đăng ôp gĕh păch lây. Khây camvŭm cồ Ănh gĕh nhai bây pôp ŏh cồ gŭn măn en khây camvŭm nŏq cồ sinlơ rĭh.64Cồ canŏq sŭng pôp ŏh gĕh takiq ndu đăng tôq.” Mvăc Siđăch Yêsu gưt a lăm daq vôq vu lây cồ tamun đăng tôq, en vu lây cồ tamun châl sĭq vlâq Nĕh.65En Siđăch nhai: “Payh sinlơ nŏq, Ănh gĕh nhai bây pôp ŏh pành đăng gĕh du mvu lây tât gĕh bây Ănh hê Vap đăng paq sinăc an nĕh nŏq.”66A lăm nŏq, gŏq ndu sŭng khây con tuyh Siđăch de pơq jâng saq sĭq en đăng hôm saq bây Siđăch wŏq.67Payh canŏq, Siđăch Yêsu nhai bây mât var con tuyh: “Hôm pôp ŏh khoi cơnh lŭh saq êh?”68Si-môn Phi-e-rơ âh camvŭm Siđăch: “Cŭh Siđăch, khananh saq bây vu lây vrêq? Cô gĕh khây camvŭm sinlơ rĭh gơih nggơih,69khananh tôq, bây singgal gưt pành Cô cồ Candranh Gŭn Cô Voq de.”70Siđăch Yêsu âh sĭq vlâq khây nĕh: “Đăng gal Ănh gĕh cuôl pôp ŏh, cồ mât var ndu con tuyh, mà du mvu sŭng pôp ŏh cồ chaq.”71Siđăch nhai sĭq Yu-đa con Si-môn Ich-ca-ri-ôt, mvăc nơm nĕh, cồ muôi sŭng mât var con tuyh, mơch tăch palau Siđăch.
FAR EAST BROADCASTING COMPANY