Ephesians3
1Payh ơ vrŭq nŏq, ănh, Phao-lô, cồ tamun vi krêh jingo Siđăch Yơt Dưnya Yêsu de payh cồ pôp ŏh văl daq aling —2Mvăc payh cồ pôp ŏh gĕh chăng sĭq vrŭq jơ sên sinăc yăh Siđăch Trôq de, cồ vrŭq gĕh dơp an ănh ôp payh cồ pôp ŏh vơn,3bây sinlơ pơq an sây cồ gĕh an ănh gưt, nŏq cồ sinlơ jru sưt dân ca ănh gĕh chêr dêh takiq u vlơ nŏq.4Lăm đŏc tât sinlơ nŏq, pôp ŏh ur klô singgal lŭh gĕh sĭq sinlơ dân gưt ănh je sĭq sinlơ jru sưt Siđăch Yơt Dưnya de,5cồ vrŭq đăng gĕh pơq lŭh an con sinau con tamun sŭng khây nggơih lor, sŭng lăm vrêq heq, payh ju Siđăch Wênh, vrŭq nŏq gĕh pơq lŭh an khây con tuyh gŭn Siđăch de nggâm khây tiêng tri —6nŏq cồ: khây văl daq aling cồ tamun gĕh tăm wŏq simơ păch caya, cồ khây vau swan simơ du rup swan, bây cồ khây tamun simơ tăm paq camvŭm pănggân sŭng Siđăch Yơt Dưnya Yêsu payh ju Sipơp Yăh,7Mvăc Sipơp Yăh nŏq en ănh jêng gayh du mvu dĭch năc pănggơih u sinlơ paq an sinăc yăh Siđăch Trôq de, cồ vrŭq gĕh paq an ănh bây sinlơ ôp mprăng ju prơn gŭn Siđăch de.8Sinăc yăh nŏq gĕh paq an ănh — nĕh cồ dêh can'hâm dông lĕq sŭng khây văl gŭn Siđăch de — chĕq pađau tămti an khây văl aling sinlơ n'hăp jina đăng poch gĕh Siđăch Yơt Dưnya de,9bây chĕq ôp silang lŭh an ăp ndu tŭq lây cồ vrŭq sên groi sinlơ jru sưt, cồ sinlơ gĕh tăm pôn sưt saq ntrăch ăp nggơih lor sŭng Siđăch Trôq, cồ Candranh sun lŭh ăp sinlơ,10chĕq an vrêq heq, don ju Vatom gŭn, sinlơ vanŏh măq hwi lŭng lai Siđăch Trôq de nhâng gĕh sơr pơq lŭh dân an khây candranh sên vôq nggâm khây nĕh gĕh prơn camhlăng u khây gatŭq vlơ trôq,11bây vrŭq sŭmmrăp wân lawân cồ Siđăch gĕh ôp sŏng en sŭng Siđăch Yơt Dưnya Yêsu, Cô Voq vơn de,12en sŭng Candranh nŏq, vơn gĕh nuih talaq camhlăng nggâm con trong saq tât mơch Siđăch Trôq bây sinlơ kram nuih don tôq camvân u Siđăch.13Payh canŏq, ănh wĭnh pôp ŏh ur klô vâng vông tôr lăm sây khây sinlơ minlŏh minsat ănh je payh ơ pôp ŏh, en khây sinlơ minlŏh minsat nŏq cồ sinlơ sindraq sindil pôp ŏh ur klô de.14Payh ơ vrŭq nŏq, ănh chŏl nkrŭng u vôq măt Vap,15cồ Candranh en a Nĕh, ăp chhe njang a vlơ trôq bây u ntĕh gĕh tan'hya săq,16chĕq wĭnh Siđăch, payh bây sinlơ n'hăp jina sindraq sindil Siđăch de, ôp an pôp ŏh jêng camhlăng bây prơn gŭn ju Siđăch Wênh Siđăch de sŭng con tamun di lăm,17chĕq Siđăch Yơt Dưnya gŭq sŭng nuih talaq pôp ŏh ur klô de payh ju sinlơ tôq camvân, lăm gĕh vưt diyĕh bây kranh gajăp sŭng sinlơ tăm sinđach,18chĕq an pôp ŏh ur klô nggâm bây lĕq săq khây tamun gŭn, gĕh lôch prơn chĕq gưt dân canŏq caheq pành, maq hwi, jong, prĭh, jru,19bây chĕq sây di dân vrŭq prĭh ntrăch a sinlơ dân gưt, nŏq cồ sinlơ sinđach Siđăch Yơt Dưnya de, chĕq an pôp ŏh gĕh tŭh rung vênh rămvi sĭq ăp sinlơ yăh vênh lôch Siđăch Trôq de.20Wĭnh dâl sĭq tu Candranh cồ gĕh prơn ôp ntrăch dông a ăp vrŭq cồ vơn ngwân wĭnh ha sinâng tât, bây prơn gŭn cồ gĕh ôp vrŭq sŭng vơn,21ngwân an Siđăch gĕh sindraq sindil sŭng Vatom gŭn nggâm sŭng Siđăch Yơt Dưnya Yêsu saq ntrăch ăp nggơih wân lawân đăng chôch. A-men.
FAR EAST BROADCASTING COMPANY