Acts16
1Lăm vrêq, Phao-lô khoi saq jưr tât Đet-bơ en tât Lit-trơ, en sên tĭq, u nŏq gĕh du con tuyh nŏq săq Ti-mô-thê, con klô du mvu tamun ur Yo-thai tôq sŏq, en vap cồ tamun Hi Lap,2en nĕh nŏq gĕh khây pôp ŏh u Lit-trơ bây I-cô-ni gĕh camvŭm candân yăh.3Phao-lô cơnh nĕh heq saq bây nơm, nŏq lăm wŏq nĕh en, Phao-lô ôp chin'hâu chit ntô an nĕh, mvăc nĕh yăh an khây tamun Yo-thai gŭq u khây gatŭq nŏq, mvăc lĕq khây nĕh gưt pành vap nĕh nŏq cồ tamun Hi Lap.4En vrêq, lăm khây nĕh saq găn khây palây, khây nĕh nhai tacăh an khây tamun tôq căh jơ khây camvŭm pân pađau cồ gĕh khây Con Tuyh bây khây cô camvĭnh u Yê-ru-sa-lem văt lŭh.5Canŏq, khây Vatom Gŭn gĕh camhlăng sŭng sinlơ tôq en ăp năr tamun tôq gĕh hao gŏq.6Lăm nŏq, khây nĕh saq găn khây gatŭq sŭng ntĕh Phi-ri-gi bây Ga-la-ti, mvăc vlam Siđăch Wênh khăq đăng an nhai camvŭm Cô Voq u sŭng vaniêng A-si.7Alưr nŏq, lăm tât mơch Mi-si-a, khây nĕh wŏng trong chĕq saq lăp Bi-thi-ni, en Siđăch Wênh Cô Yêsu de khoi đăng an khây nĕh lăp.8Canŏq mŏh, lăq chĕq Mi-si-a, khây nĕh saq jưr tât Trô-ach.9Du sinlơ an sây lŭh bây Phao-lô sŭng dŭng măng: Du mvu tamun Ma-sê-đwan tĭq tao yăq bây cuôl nĕh pành: “Wĭnh yơt khananh lăm saq găn tât Ma-sê-đwan ơ.”10Canŏq en, sŏng lăm nĕh wŏq sinlơ an sây nŏq, khananh sô wŏng trong saq tât Ma-sê-đwan, mvăc tôq pành Cô Voq gĕh cuôl khananh saq nhai lŭh Sipơp Yăh an khây nĕh.11Payh canŏq, lăm jưr duq a Trô-ach, khananh saq sŏng tât Sa-mô-tra-sơ, en năr alưr tât Nê-a-pô-li,12en a nŏq, saq tât Phi-lip, en heq cồ palây măq mi dông lĕq sŭng ntĕh Ma-sê-đwan, cồ ntĕh gŭq sŭng ti tamun Rô-ma, en khananh gŭq u palây heq takiq năr.13En sŭng năr Sa-bat, khananh saq lŭh a maq ling lapông palây, u vâr daq phong, cồ vi khananh sinâng pành gatŭq vơu ngwân. En lăm gŭq jưr, khananh nhai păch bây khây tamun ur tăm vatom u nŏq.14En du mvu tamun ur nŏq săq Li-đi, cồ tamun tăch vro savai ncao vlân a palây Thi-a-ti-rơ, mvăc gĕh nuih talaq phŭng Cô Voq, gŭq chĕq iĕt, cồ tamun gĕh Cô Voq pơq nuih talaq chĕq iĕt chăng khây camvŭm cồ gĕh nhai lŭh a Phao-lô.15Vrêq heq, sŏng lăm nĕh nggâm lĕq caniêp nơm jưr daq ŭm vôq en, nĕh côt kĕh khananh, pành: “Hê khây cô sây ănh nhâng mbêr nuih bây Cô Voq, nŏq wĭnh gŭq sĭq vlâq, lăp sŭng nhi ănh.” Nŏq nĕh piêt khananh lăp.16Alưr nŏq, vrŭq gĕh ôp lŭh lăm khananh vlơ trong saq tât gatŭq vơu ngwân, du mvu dĭch ur tĭq vlam khananh, nĕh bị wênh chaq Phi-tôn khlâm, en nĕh cồ tamun ôp lŭh gŏq an nơm nĕh de don a vrŭq sên sipăm.17Lăm saq dăh alưr Phao-lô bây khananh, ur nŏq sec hao pành: “Khây tamun heq cồ khây dĭch năc Cô Voq Măq Prĭh de, en khây nĕh nhai lŭh an dêq cô con trong têch yơt.”18Lăm nŏq, ur heq ôp canŏq sŭng gŏq năr. Aheq, mvăc vlam sinlơ hao nuih măq, mŏh lăm pale sĭq vlâq bây chaq nŏq, Phao-lô nhai: “Sŭng săq Candranh Krit Yêsu, ănh săng may saq lŭh ntrăch a ur heq.” En chaq lŭh lawân sŭng lăm nŏq.19Aheq lăm khây nơm ur nŏq de sây pành vrŭq ôp sa vơn de đăng hôm, nŏq lăm nhŭp Phao-lô bây Si-la, khây nĕh đưc rawiq var ndu tât vi gŏq săq tamun u gatŭq khây ganwâr văt vôq.20Lăm văt var ndu tât a vôq khây ganwâr en, khây nĕh nhai: “Khây tamun heq ôp minsôc minsac palây vơn, mvăc cồ văl Yo-thai,21nŏq khây nĕh nhai parang khây ravwŏq gŭq saq cồ đăng gĕh an vơn wŏq ha ôp bây, mvăc vơn cồ con văl Rô-ma.”22En mintan gŏq săq prŭh tao chŏl sĭq vlâq var ndu, nŏq lăm an hêch ao khây nĕh lŭh, khây ganwâr săng pâm khây nĕh a rĕh.23Lawân sŭng lăm nŏq, lăm pâm gông var ndu gŏq en, khây nĕh trăng var ndu lăp nhi jingo, lŭh camvŭm an ganwâr jơ nhi jingo căh cŏch jơ khây nĕh an di sưt,24en ganwâr nŏq, lăm wŏq camvŭm canŏq, gĕh trăng khây nĕh lăp nhi jingo sŭng di lăm, en krêh jâng khây nĕh lăp jicŏng.25Cồ canŏq, mơch năc vanăng, sŭng lăm vơu ngwân, Phao-lô bây Si-la adŏh camvŭm gŭn payom Cô Voq, hôm khây tamun ndây iĕt chăng khây nĕh.26Lăm vrêq du dâq ntĕh lănggưn măq tât sŭmmrât, tât daq lĕq tơm nhi jingo nggưn, en sŏng lăm nŏq, lĕq khây lapông pơq hwi en chhe loih vlơ ăp ndu talŭh lĕq.27Canŏq en lăm ganwâr jơ nhi jingo phwŏng căh vĭq, deng sây khây lapông nhi jingo gĕh pơq hwi en, nŏq tăq pĭh nơm lŭh, nĕh cơnh tachưt nơm nĕh mvăc sinâng pành khây tamun sŭng nhi jingo saq du lĕq èn.28Aheq Phao-lô sec tayh mŭnh, pành: “Vâng ôp lŏh nơm vầy, mvăc lĕq săq khananh hôm gŭq u heq.”29Aheq, alưr lăm săng nhŭp ŭnh, nĕh pĭh păh lôt lăp sŭng di lăm, en payh ơ phŭng candŭh âr, nĕh gasăp nơm jưr u vôq Phao-lô bây Si-la,30en lăm văt khây nĕh lŭh tu ling, nĕh nhai: “Ơ khây cô, ănh gưt ôp păch lây chĕq ănh wŏq gĕh sinlơ têch yơt heq?”31Aheq, khây nĕh nhai: “Căh tôq u Siđăch Yêsu, nŏq pôp gĕh yơt — pôp nggâm tamun nhi pôp de.”32En khây nĕh tămti camvŭm Cô Voq an nĕh nggâm bây lĕq săq khây tamun sŭng nhi nĕh.33En sŏng vadâq nŏq sŭng vanăng, lăm văt khây nĕh saq bây nơm, nĕh rao jrŏh an khây nĕh bây vi cồ chăch, en nĕh jưr daq ŭm vôq lawân — nĕh nggâm ăp ndu tamun sŭng nhi nơm.34Lawân sŭng lăm nŏq, lăm văt khây nĕh lăp nhi nơm, nĕh pri păch sa lŭh a vôq măt khây nĕh en vui hơn nhâng bâng bây khây tamun sŭng nhi, mvăc gĕh tôq Cô Voq en.35En vrêq, tât silang vi ôi, khây ganwâr săng khây tamun pađăr saq, nhai pành: “Đŏh an khây nĕh nŏq saq.”36Canŏq, ganwâr jơ nhi jingo nhai sĭq vlâq khây camvŭm nŏq an Phao-lô, pành: “Khây ganwâr gĕh pađăr tamun tât nhai pành khây cô gĕh đŏh an saq en. Canŏq vrêq, lăm saq lŭh, ngwân an var ndu khây cô hao trong yăh song săq.”37Cồ canŏq Phao-lô nhai bây khây nĕh: “Lăm pâm gông khananh a vôq măt gŏq săq, cồ khây tamun gĕh kwiềng con văl Rô-ma, sŭng lăm đăng săc si, khây nĕh hwât khananh lăp nhi jingo, en vrêq khây nĕh cơnh đŏh an khananh saq lŭh chŏq ramŏq canŏq? Nhâng đăng gĕh! Palâq sĭq vlâq, nơm khây nĕh, lăm tât heq, căh iau khananh lŭh.”38Aheq, khây tamun pađăr đơm sĭq vlâq khây camvŭm nŏq an khây ganwâr, en khây nĕh phŭng candŭh lăm chăng pành var ndu heq cồ con văl Rô-ma.39Lăm saq tât en, khây ganwâr côt kĕh khây nĕh en lăm iau lŭh tu ling, khây ganwâr wĭnh khây nĕh saq ngai ntrăch a palây nơm.40Canŏq en, lăm saq lŭh ntrăch a nhi jingo, var ndu saq lăp sŭng nhi Li-đi de. En lăm vlam khây pôp ŏh, var ndu pành jrâng khây nĕh, en hao trong saq.
FAR EAST BROADCASTING COMPANY