2 Peter3
1Pôp ŏh yăh sinđach, jŏq lŭng en, heq cồ păng sirăq di var ănh chêr an pôp ŏh; nŏq sŭng lĕq var păng sirăq, ănh ôp dĭh nuih chhu vôq nhâng bâng pôp ŏh de don a sinlơ pân tacăh,2chĕq căh sĭq vlâq khây camvŭm lăq gĕh nhai lor heq don a khây tiêng tri gŭn nggâm bây camvŭm nhai Siđăch de bây Siđăch Yơt don a khây con tuyh pôp ŏh de,3mvăc gưt lor vrŭq heq, nŏq cồ khây tamun nhai tasâh nhâng tât sŭng nggơih chôch lawăch bây sinlơ gơm sâq, saq diêt bây nuih talaq cơnh can'hir nơm nĕh de,4nŏq nhai: “Camvŭm pănggân sĭq sinlơ tât Siđăch de u vi lây? Mvăc a lăm khây un cô jây chưt, ăp sinlơ hôm mo dân canŏq a năr daq vôq dâq vưt vri.”5Mvăc lăm mơ kranh vôq canŏq, păch heq ôp an nđâp măt khây nĕh, nŏq cồ don a camvŭm Siđăch Trôq de, trôq lăq gĕh măt ađu ađơm, bây ntĕh gĕh sun lŭh a daq nggâm don a daq,6khoi payh ơ ăp sinlơ nŏq nŏq dưnya lăm nŏq lăq vlam sinlơ panjwăch, mvăc vlam daq lĭch.7En avrêq, payh ơ bây camvŭm nŏq, trôq bây ntĕh gĕh chĕq ân an ŭnh, gĕh jơ an năr ôp dôih bây sinlơ panjwăch khây tamun đăng tôq.8An canŏq, ơ pôp ŏh yăh sinđach, vâng chĕq du sinlơ heq nĕh ôp nđâp măt pôp ŏh, pành du năr sĭq bây Siđăch dân ca du ravu mva, bây du ravu mva dân ca du năr.9Cô Voq đăng lĭh sĭq camvŭm pănggân Nĕh de, dân ca takiq tamun sinâng pành lĭh; ala nŏq, Siđăch câp nggơ gŭq krap nggâm bây pôp ŏh, đăng cơnh du mvu lây vlam sinlơ chưt ji, nŏq cơnh lĕq săq gĕh pơq vôq saq tât sinlơ palâq vôq sĭq vlâq.10Nhâng canŏq, năr Cô Voq de gĕh tât dân ca tamun can'hưn, nŏq sŭng năr nŏq, khây tăp trôq nĕh saq cambet sŭng mŭnh tayh nggôr, bây khây păch măq ken nhâng vlam panjwăch lăm vlam ŭnh gŭch sa, hôm ntĕh bây khây vrŭq ôp vlơ nŏq nhâng gĕh vu sây. 11Mvăc ăp sinlơ nĕh vlam panjwăch dân canŏq, nŏq hôm wŏq nhŭp pôp ŏh căh gŭq saq sŭng sinlơ rĭh yăh jrŏh soch bây tôq camvân,12câp nggơ bây dŭh dăh cơnh ngwân năr saq tât Siđăch Trôq de, mvăc lăm nŏq khây tăp trôq nĕh vlam talŭng talay mvăc ŭnh sŏh roq, hôm păch măq ken nhâng la-ach mvăc ŭnh sa măq mi.13En bây camvŭm pănggân Cô Voq de, vơn gĕh câp nggơ trôq me bây ntĕh me, nŏq u gatŭq nŏq gĕh sinlơ yăh sŏng gŭq bây.14Canŏq, ơ pôp ŏh sinđach, mvăc câp nggơ ăp sinlơ nŏq, căh sŏq lĕq prơn chĕq gĕh Siđăch sên sây cồ đăng châh laq bây đăng gĕh tŭq lây chih lăh, sŭng sinlơ yăh iên.15Bây căh gưt nuih talaq gŭq krap Siđăch de vơn cồ mvăc sinlơ yơt, khoi dân ca Phao-lô, tamun pôp ŏh sinđach vơn de, lăq chêr an pôp ŏh, bây sinlơ vanŏh gĕh paq an nơm,16en dân ca sŭng ăp păng sirăq, lăm nhai sŭng sirăq sĭq ăp vrŭq heq, u nŏq gĕh var pe gatŭq đăng dê gưt nŏq khây tamun đăng đom gưt bây đăng kram gajăp văt tât păch sinâng tih, khoi dân ca bây ăp gatŭq sŭng Sirăq Gŭn ndây, tăm hơch tât sinlơ panjwăch an nơm iưn.17Don nŏq, ơ pôp ŏh yăh sinđach, mvăc gưt lor ăp vrŭq nŏq, pôp ŏh căh jơ nơm chĕq pôp ŏh đăng ôp pachĕq sinlơ kram gajăp nơm de nŏq vlam vu đưc rôih don a sinlơ ta gat khây tamun chhŭq chhau de.18Nŏq căh hao măq sŭng sinlơ yăh an ngăn bây sinlơ đom gưt Siđăch nggâm Siđăch Yơt vơn, cồ Candranh Krit Yêsu. Ngwân sinlơ sindraq sindil sĭq maq Siđăch lĕq sŭng avrêq bây tât wân lawân. A-men!
FAR EAST BROADCASTING COMPANY