2 Corinthians3
1Gĕh gal khananh du dâq wŏq saq tapơ nơm khananh? Ha dân ca khây tamun ndây, gĕh gal khananh cơnh sirăq vu nhai sĭq khananh chĕq dơp tât pôp ŏh ha a pôp ŏh?2Nơm pôp ŏh nhâng cồ sirăq khananh de, gĕh chêr sŭng nuih talaq khananh, gĕh gŏq ndu gưt bây đŏc,3mvăc gĕh văt lŭh dân lŭng pành pôp ŏh cồ sirăq Siđăch Yêsu Krit de, gĕh khananh sên roi, đăng gal gĕh chêr lŭh don a daq sinđôch nŏq don a Siđăch Wênh Siđăch Trôq cồ hôm mrĭh de, đăng gal vlơ păndŏh tamô, nŏq cồ vlơ păndŏh nuih talaq a gŏng n'ham.4Sĭq măt ndây, don a Siđăch Yêsu Krit, khananh gĕh nuih talaq tôq nhâng bâng canŏq bây Siđăch Trôq.5Đăng gal cồ khananh gĕh lôch prơn a nơm khananh chĕq sinâng dân ca du vrŭq lây nŏq nĕh tât a nơm khananh. Ala nŏq, prơn khananh de gĕh tât a Siđăch Trôq,6cồ Candranh khoi gĕh ôp an khananh gĕh sinăc jêng tamun ôp vrŭq an sinlơ tăm lăp ti me, đăng gal don a camvŭm chêr, nŏq cồ don a Siđăch Wênh; mvăc camvŭm chêr chưt ayh nĕh, hôm Siđăch Wênh ôp an rĭh.7Sĭq măt ndây, hê vrŭq ôp sinlơ chưt de — gĕh păh kĕh a camvŭm chêr vlơ tamô — gĕh văt lŭh sŭng sinlơ sindraq sindil, tât daq con sinau I-sơ-ra-ên đăng gĕh prơn sên lăp mŭh măt Môi-se payh ơ sinlơ sindraq sindil nŏq ayh du măt du hyôr u măt nĕh de,8nŏq đăng gal vrŭq ôp Siđăch Wênh de gĕh văt lŭh sŭng sinlơ sindraq sindil vlơ a nŏq gŏq dâq wŏq?9Mvăc hê sinlơ sindraq sindil hôm mo chĕq ân an vrŭq ôp cồ văt tât sinlơ ôp dôih, nŏq vrŭq ôp sinlơ yăh sŏng de nĕh gĕh vênh rămvi sinlơ sindraq sindil gŏq vlơ wŏq!10Nhâng canŏq, mvăc păch cồ gĕh sindraq sindil en nŏq đăng gĕh sindraq sindil sŭng dâq heq wŏq, payh ơ sinlơ sindraq sindil măq vlơ dông.11Mvăc hê păch cồ gĕh ayh du măt du hyôr nĕh tât bây sinlơ sindraq sindil, nŏq păch cồ wân lawân hôm gĕh tât sŭng sinlơ sindraq sindil măq mi dông gưt dâng lây!12Canŏq, lăm gĕh sinlơ don camvân canŏq, khananh nhŭp păch yăh nŏq bây nuih talaq kram camhlăng lŭng,13en đăng dân ca Môi-se, nĕh gĕh tang du păng nseng hao vlơ măt nơm tămhơch tât vrŭq đăng chĕq con sinau I-sơ-ra-ên sên lawân lăp măt en nŏq sinlơ sindraq sindil nŏq nĕh cambet.14Vrêq heq, chhu vôq khây nĕh lăq kranh en, mvăc an tât năr heq, simơ du păng nseng nŏq hôm mo gŭq vlơ vrŭq đŏc sinlơ tăm lăp ti dâm, mvăc đăng gĕh pơq lŭh, nŏq cồ don sŭng Candranh Krit, nĕh mơ saq cambet.15En canŏq, an tât năr heq, hê lăm lây ravwŏq Môi-se gĕh đŏc, nŏq du păng nseng khlop vlơ nuih talaq khây nĕh,16hôm hê lăm lây vu lây nŏq tămhơch sĭq Siđăch, nŏq păng nseng nŏq gĕh prăp chĕq.17Du maq ndây, Siđăch cồ Siđăch Wênh, nggâm Siđăch Wênh Siđăch de gŭq u vi lây, nŏq gĕh sinlơ saq lahông u nŏq.18Hôm lĕq săq vơn, bây mŭh măt đăng păng khlop, gĕh sinlơ sindraq sindil Siđăch de sol lăp, nŏq gĕh wâr lŭh jêng simơ du nggui a sinlơ sindraq sindil tât sinlơ sindraq sindil, dân ca a Siđăch, cồ Siđăch Wênh.
FAR EAST BROADCASTING COMPANY