1 Corinthians13
1Cồ ănh gĕh prơn nhai khây trong nhai con tamun de nggâm con gŭn, en ănh đăng gĕh sinlơ tăm sinđach, nŏq ănh jêng lŭh dân ca gong chĭnh gŏh tayh mŭnh ha chrâp chreng di ngây nga.2Lăm an ănh gĕh sinăc nhai tiêng tri bây gưt lĕq khây sinlơ jru sưt nggâm khây sinlơ vanŏh, en lăm an ănh gĕh lôch sinlơ tôq camvân tât daq pađăr gĕh gŭng canăng saq vi ndây, nŏq hê ănh đăng gĕh sinlơ tăm sinđach, nŏq ănh khoi đăng lŭh păch lây lĕq.3Tât daq lăm dâq ănh paq an lĕq păch caya ănh je, bây an ănh pađăc rup swan nơm chĕq an ănh gĕh parang lŭh, nŏq hê ănh đăng gĕh sinlơ tăm sinđach, nŏq ănh đăng lŭh păch lây lĕq. 4Sinlơ tăm sinđach gĕh nuih talaq gŭq krap ra'ngăp bây pành hyơ lŭh sinlơ lamut lamit, sinlơ tăm sinđach đăng tăm canănh, sinlơ tăm sinđach đăng lơ vôq, đăng iơq nơm,5đăng ôp tih wil a ravwŏq, đăng saq wŏng ayh păch yăh an nơm iưn, đăng dê chĕq vu ôp măq nuih, đăng sinâng ôp vrŭq viêm vôt,6đăng vui hơn sĭq sinlơ tih wil, nŏq vui hơn sŭng sinlơ dip gal;7sinlơ tăm sinđach uĕh lăq chĕq ăp sinlơ, tôq camvân ăp sinlơ, câp nggơ ăp sinlơ, gŭq krap ăp sinlơ.8Sinlơ tăm sinđach đăng pachĕq gĕh uy. Măt ndây, an cồ sinăc nhai tiêng tri, nŏq nĕh nhâng đăng hôm; an cồ sinăc nhai gŏq trong ndây, nŏq nĕh nhâng lĕq; an cồ đom gưt sinlơ vanŏh, nŏq nĕh nhâng khoi hwât tagayh.9Mvăc vơn đom gưt takiq ngăn, en vơn nhai tiêng tri takiq ngăn.10Nŏq lăm sinlơ lôch yăh tât, păch cồ ndŏh lôch yăh sĭq păch nŏq gĕh hwât chĕq lĕq.11Lăm ănh hôm mo con se, ănh chih nhai dân ca con se, ănh sinâng dân ca con se, ănh tăm nhai dân ca con se. Lăm ănh gĕh hao măq, ănh hwât chĕq lĕq ăp vrŭq cồ con se de.12Lăm vrêq heq, vơn sên sây sŭng kiêng bây nggui rawĭch, nŏq tât ĭh ôi nŏq măt tăm deng măt. Avrêq, ănh gĕh sên gưt takiq ngăn, nŏq tât ĭh ôi, ănh gĕh sên gưt lôch lĕq, khoi dân ca ănh gĕh sên gưt yăh lôch lĕq.13Nŏq avrêq hôm vlâq pe sinlơ heq: sinlơ tôq, sinlơ camvân, nggâm sinlơ tăm sinđach. Nŏq sinlơ măq mi dông lĕq sŭng pe sinlơ nŏq cồ sinlơ tăm sinđach.
FAR EAST BROADCASTING COMPANY