Philippians2
1Christ chitihtuutaakunuu chechii yaaichikaapuuhiituyihkw. Christ chitihtuutaakunuu chechii saachihiituyihkw kaye chechii kaachiichimituyihkw. Kaa payehchisiit Ahchaahkw chitihtuutaakunuu chechii miyu wiicheutuyihkw. Christ chitihtuutaakunuu chechii chishewaatutaatuyihkw kaye chechii chistimaacheyimituyihkw.2Ekw maak miyeyihtamihiikw peyakunihch e ishi maamituneyihtamekw kaye peyakunihch e ishi saachihiituyekw. Peyakunihch e iteyihtamihiikuyekw chekwaan kaye peyakunihch e ishi pukuseyimuyekw.3Namui chipaa uhchi ihtuuten chekwaan mikw chiya e maamituneyimisuyin. Maak mikw chechii uhchi mamiywaachimikuyin. Tipihteyimisukw, uste kutakach awenichii e iteyimekuch.4Namui mikw chiya chipaa uhchi nanaakataweyimisun kutakach kaye awenichii chipaa nanaakataweyimaauch.5Taan kaa ishi maamituneyihtahk Christ ekun kaye chiyaanuu chipaa ishi maamituneyihtenaanuu.6Aat Chishemanituu kaa iteyihtaakusiyich e chii iteyihtaakusit, yaapach chii pachishtinam aniyuu taapituu e ishi ayaatwaau.7Misiwe chii pachishtinam uyuu ekw mwehch aapachihaakan kaa itahiisut. Ekw mwehch naapeu e iteyihtaakusiyich kaa iteyihtaakusit.8Chii tipihteyihtaakuhiisuu e nanihiihtuwaat Chishemanituu, aat iskutak kaa utihchipayiyich che nipit, aashiteyaahtikuhch kaa chiistaaskuhwaakanuut.9Eukw maak uyuu wehchii miikut Chishemanituu maauch e niikaaneyihtaakuniyich apuwiniyuu misiwe aweyuuh chechii chisteyimikut. Kaye Chishemanituu chii miikuu ishinihkaasuwiniyuu ekaa ihtakuniyich kutachiyuu ishinihkaasuwiniyuu e ishpish chisteyihtaakuniyich.10Ekw maak misiwe awen che maamihchimaat Jesus kaa ishinihkaataakanuyich, misiwe awen kihchikiishikuhch kaye aschiihch ekw maak nitamihch aschiihch kaa ihtaat.11Misiwe awen chika itweu, Jesus eukw Utipeyihchikeu, e maamihchimaat Chishemanituu, Uhtaawiimaau.12Ekw maak niichishaanitikw, muush chichii naanahiihtuunaawaau eshkw mekwaach anite Philippihch kaa ihtaayaan. Etituu maak iteyihtaakun anuhchiish muush chechii nanihiihtamekw taan kaa ishi wiihtamaatakuch mekwaach uu ekaa ihtaayaan anit e ihtaayekw. Suuhk aapatisitaau chechii chiishihtaauhkw aniyuu kaa ishi chihchipayihtaat Chishemanituu chipimaatisiiwinaahch iskutak kaa pimaachihiitahkw. Ihtuutahtaau uu e chischisiihkw Chishemanituu eukw chipaa nanihchiishtuwaanuu kaye wiya chipaa chisteyimaakanuu.13Wesh Chishemanituu muush aapatisiihkahtam chipimaatisiiwinuuh. Chitihtuutaakunuu chechii naniheyihtamihiihkw kaye chiwiichihiikunuu chechii ihtuutamukw aniyuu e ishi naheyihtahk.14Ihtuutahtaau misiwe chekwaan ekaa mista ayimitutamuhkw kaye ekaa mamachipayihkahtaatuyihkw.15Wesh eukw uu chipaa ishi pimaatisiinaanuu e utawaashiimitutaatahkw Chishemanituu utah aschiihch mekwesiinuu kaa machaatisiitwaau e ihtaatwaau e ihtaayihkw. Ekw maak namui kata uhchi ihtakuniyuu taan chechii ishi ataameyimitahkw awen kaye mitun chika payehchinaakunh chipimaatisiiwinuuh. Mwehch achahkushach e chihkaashtuwetwaau e tipiskaayich ekun chipaa ishi waashtuwenaanuu uta aschiihch.16Ekun uu chipaa ishi pimaatisiinaanuu e waawiihtamuuhkwaau awenichii Chishemanituu e pimaachihiiweyich. Ekw maak iskutak utihchipayihche Christ che takushinit, ekw che maamihchihiyekw. Ekut che nuukuhch ekaa sehchei uhchi aapatisiyaan.17Maaskuuch nika nipahiikuun. Ekw maak an taapishkun tekash e chii pachishteyihtamuuhkw Chishemanituu chipimaatisiiwinuuh aat nipahiikuyaane nika miyeyihten kaye taapishkun chika miyeyihtenaanuu wesh ekut che uhchi asich pachishtinamuwaakanuut Chishemanituu taan e ishi taapweyimekw.18Kaye maak chiyawaau ekun mwehch chipaa ishi sichiyesinaawaau kaye chipaa wiich muuchicheyihtamuuminaawaau.19Nitaweyihtahke Utipeyihchikeu Jesus, nipukuseyihten chechii itishahuuk Timothy anite e ihtaawekw. Ekw maak che miyeyihtamaan pehtamaane taan e itaachimikuyekw.20Wesh namui ihtaau kutak awen utah mistahii e iteyimitaakw mwehch niya e iteyimitakuch.21Misiwe kutakach awenichii mikw wiyawaau nanaakatuweyimisuuch, namui aapateyihtamihiikuuch chechii waawiihtahkwaau miywaachimuwiniyuu.22Chichischeyimaawaau Timothy e chii ishi nuukuhtaat e miywaapatisit. Nichii niishwaapatisinaan miywaachimuwin e waawiihtamaahch mwehch naapeu ekw maak ukusisa e niishwaapatisitwaau nichii ishinaakusinaan.23Nipukuseyihten wiipach chechii itishahuuk anite e ihtaawekw iskutak chischeyihtamaane taan che ispayiwaane.24Nitaapweucheyimaau Utipeyihchikeu chechii nihiipayihtaat kaye niya wiipach chechii nituwaapamitakuch.25Nititeyihten kaau chechii chiiwetishahuuk chiichishaanuu Epaphroditus anite e ihtaawekw. Wesh suuhk nichii wiichihiikw e waawiihtamaan miywaachimuwin. Chiyawaau chichii pechi itishahwaawaau chechii pechi waawiichihiit.26Pukuweyihtam miin chechii waapamitaakw misiwe. Chii mukushkaachishkaakuu e chii wiihtaamaakuwekw e chii aahkusit.27Chii mista aahkusuu kiipaa taapwe, chekaat chii nipuu. Mikw maak Chishemanituu nichii chistimaacheyimikunaan taapishkun. Chii ihtuutaweu ekaa chechii nipiyich ekaa uste chechii misimeyihtamuch.28Ekun maak wehch etituu sichiyesiyaan chechii itishahuuk anite e ihtaawekw chechii miyeyihtamekw miin waapamekwe. Ekw maak namui nika uhchi ishpish aayimeyihten.29Waapahtiyaahkw e sichiyeyaapamekw mwehch e ihtitwaau kaa taapweucheyimaatwaau Utipeyihchikeu wiyaapamitutwaauh. Yaakwaau chipaa iteyimaawaauch misiwe awenichii uu e iteyihtaakusitwaau, e iteyihtaakusit wiya.30Namui uhchi puuniyuu e atuskuwaat Jesus aat e chii kushpanaataniyich upimaatisiiwin e chii peshuwaapahtahk nipuwiniyuu. Eukw uyuu kaa ihtit e pechi wiichihiit ekaa uhchi ihtaayekw chiyawaau chechii pechi wiichihiyekw.
Canadian Bible Society