Philippians1
1Niya Paul chimasinahamaatinaawaau chiyawaau Jesus Christ kaa taapweyimekw anite Philippihch kaa ihtaayekw. Timothy ekw maak niya taapishkun nitatushkuwaanaan Jesus Christ. Kaye chiyawaau kaa niikaanishkuwekuch umaamuuayimihaauch ekw maak chiyawaau kaa wiichihiiweyekw anite ayimiheukamikuhch chimasinahamaatinaan.2Nipukuseyimaanaanich Chishemanituu Kuuhtaawiinuu kaye Utipeyihchikeu Jesus Christ chechii miyutuutaataakuch kaye chechii miitaakuch chiyaameyihtamuwiniyuu.3Ninanaaskumaau Chishemanituu, tahtwaau miyaamituneyimitakuch.4Kaye naashch taapwe nimiyeyihten, tahtwaau e ayimiheshtamaatakuch.5Nichischisin taan kaa ishpish chii pechi miyu wiichihiyekw e waawiihtamuukwaau awenichii miywaachimuwiniyuu Jesus e aayimuumaakanuyich. Eukun kaa ati waawiichihiyekw niishtam kaa pehtamekw miywaachimuwin eshkw maak mekwaach anuhchiish chiwiichihiinaawaau.6Nicheshtinaahuun maak Chishemanituu chechii chiishihtaat taan kaa ishi chihchi miyuunaakuhtaat chipimaatisiiwinawaauh iskutak kaa pimaachihiitaakw kaye che wiichihiitaakw etituu chechii ati nihtaauchuwekw piihiim aniyuu e chiishikaayich takushiniyichen Jesus Christ.7Chemaanam maak uu chit ishi maamituneyimitinaawaau wesh chisaachihiitinaawaau. Wesh misiwe e tashiyekw chichii miikunaawaau chishewaatisiiwin muyaam taan kaa ishi miikuyaan niya aat utah mekwaach chipahutuukamikuhch e ihtaayaan kaye maak mekwaach kaa chii chispewaatutamaan miywaachimuwin kaye kaa chii aapatisiihkahtamaan chechii taapwehtaakanuuhch.8Chishemanituu chischeyihtam taan e ishpish naashch wii wiicheutakuch ekw miin, wesh Christ Jesus nichii ihtuutaakw naashch chechii saachihiitakuch.9Chitayimiheshtamaatinaawaau wetaach chechii ati saachihiituyekw, wetaach chechii ati kachehtawehtamekw kaye wetaach chechii miyu kachescheyihtamekw chekwaan.10Chitayimiheshtamaatinaawaau chechii ati chischeyihtamekw taan an maauch e kuiskunaakuhch chechii ishi pimaatisiyekw ekw maak mitun che payehchi pimaatisiyekw kaye namui mitun kata uhchi ihtakun che ishi ataameyihtaakusiyekw iskutak takushihke Jesus Christ.11Chitayimiheshtamaatinaawaau muush chechii miyutuutawekuch awenichii wesh chikuiskutaatisiinaawaau. Christ chitihtuutaakuwaau chechii miyutuutawekuch awenichii. Ekw maak Chishemanituu che chisteyimaakanuut kaye che maamihchimaakanuut.12Niichishaanitikw chinitaweyimitinaawaau chechii chischeyihtamekw uu kaa ispayaan e chipahukuyaan taapwe chii ati wiichihiikuuch kutakach awenichii chechii ati taapwehtahkwaau miywaachimuwiniyuu.13Muyaam misiwe anichii shimaakanishach kaa naanaakachihtaawaatwaau chisheuchimaauh uwaaskaahiikanimiyuu kaye kutakach awenichii utah kaa ihtaatwaau chischeyihtamuch e atushkaamach Christ wehch ihtaauch utah.14Kaye maak, e ihtaayaan utah chipahutuukamikuhch mihchetu chiichishaanuuch etituu suuhchikaapuuch e taapweyimaatwaau Utipeyihchikeu, etituu ati suuhchiteheuch e waawiihtahkwaau miywaachimuwiniyuu ekaa mitun kushtaachitwaau.15Taapwe kiipaa ihtaauch awenichii mikw e uhteyimitwaau maak e wii mamachipayihiitwaau eukw wehchi aayimuumaatwaau Christ. Ekw kutakach suuhk waawiihtamuch miywaachimuwiniyuu kuiskw e ihtitwaau.16Eukunich maak uchii e nuukuhtaatwaau e saachihiitwaau, chischeyihtamuch Chishemanituu e chii wiyaapamiyich chechii waawiihtamuch e taapwemakaniyich uyuu miywaachimuwiniyuu.17Anichii kutakach kaa aayimuumakwaau chii waawiihtamuch miywaachimuwiniyuu mikw wiyawaau utiteyihtamuwaniwaahch uhchi, namui taapwe uhchi wii wiichiheuch aweyuu. Ekun e ihtitwaau etituu e wii waushtaapayihiitwaau utah chipahutuukamikuhch e ihtaauch.18Ekush kataaihtuuch. Tepiyaahch Christ e aayimuumaakanuut. Aat kutakach ekaa maamuyaam ihtitwaau e waawiihtahkwaau miywaachimuwiniyuu maak kutakach kuiskw e ihtitwaau e waawiihtahkwaau, yaapach nimiyeyihten.19Suuhk maak nika miywaaten, nichischeyihten che pachishtinikuyaan wesh chitayimiheshtamuunaawaau kaye maak Kaa payehchisiit Ahchaahkw nipechi wiichihiikw.20Naashch nipukuseyihten kaye nitaspeyimuun ekaa wiiskaat chechii ihtuutamaan chekwaan anit chechii uhchi wanituutamaan e atushkuuk Christ. Teyakuch chechii suuhchiteheyaan muush chechii chisteyihtaakuhaakanuut Christ nipimaatisiiwinihch mwehch anuhchiish e ishi chisteyihtaakuhaakanuut. Nipukuseyihten chechii chisteyihtaakuhaakanuut Christ nipimaatisiiwinihch mekwaach e pimaatisiyaan maak nipahiikuwache wiya uhchi.21Niya kiipaa che ishpish pimaatisiiwaane muush nika papaawiichewaau Christ. Nipahiikuyaane maak taapwe kata ihtakun che ishi miyu miskamaan.22Etituu maak che miikuwaane chechii pimaatisiyaan utah aschiihch, ekw etituu che miyu atushkuuk Christ e waawiihtamaan miywaachimuwin. Miikuyaan maak chechii wiyeyihtamaan, chechii nipiyaan maak chechii pimaatisiyaan namui nichischeyihten taanite eukw nipaa ishi wiyeyihten.23Taapishkun nimushteneyihten aniyuuh. Naashch taapwe niwii nakaten uu aschii, Jesus Christ e ihtaat chechii ihtaayaan. Eukw uu uste meywaashich.24Mikw maak chiyawaau uhchi, uste iteyihtaakun chechii pimaatisiyaan ishpish wii chechii nipiyaan.25Nicheshtinaahun maak taapwe e nituweyihtaakusiyaan eshkw etituu chechii pimaatisiyaan utah aschiihch chiyawaau uhchi. Nichischeyihten maak che ihtaayaan anit e ihtaayekw chechii wiichihiitakuch wetaach chechii suuhchikaapuuyekw e taapweyimekw Christ kaye chechii muuchicheyihtamekw an uhchi.26Ekw maak etituu che ihtakuhch e miywaatamekw Christ Jesus e ihtaat ishi an miin e pechi nituwaapamitakuch.27Mikw maak, eukw uu wehchi yaaitei nituweyihtaakusiyekw chechii ishi pimaatisiyekw taan e itashumukuyihkw miywaachimuwin chipaa ishi pimaatisiinaanuu. Ekw maak aat ekaa miin chii waapamitakuche maak nihiipayihche miin chechii waapamitakuch che chischeyimitakuch ekaa mitun chekwaan chii aahtinikuyekw misiwe peyakunihch e iteyihtamekw taan waa ihtiyekw kaye taapwe peyakunihch e ishi pukuseyihtamekw e maamuu aahchiishtamekw e waawiihtamekw miywaachimuwin.28Ekaawii chika uhchi kushtaawaauch anichii wiyesh kaa wii ihtuutaataakuch miywaachimuwiniyuu e waawiihtamuwekw. Wesh ekut che uhchi chischeyihtahkwaau wiyawaau che wanaatisiitwaau kaye ekut che uhchi waapahtahkwaau chiyawaau che pimaachihiikuwekw. Chishemanituu maak wii misiwe kata ihtuutam uyuu chechii ispayiyich.29Chishemanituu maak chichii wiyeyimukuwaau namui mikw chechii taapweyimekw Christ, chichii wiyeyimikuwaau kaye chechii nanehkaachihiikuyekw Christ uhchi.30Taapishkun maak chichii nanehkaachihiikunaanuu e waawiihtamuhkw miywaachimuwin. Chichii waapaminaawaau taan kaa ishi nachishkamaan e waawiihtamaan miywaachimuwin anit e ihtaayekw. Chipehtenaawaau kaye eshkw yaapach e aayimihuyaan.
Canadian Bible Society