Hebrews8
1Maau waa ititakuch. Chitayaawaanuu chisheayimiheuchimaau. Mwehch maak uu kaa ishi pechi aayimuutamaatakuch taan kaa ishi nituweyihtaakusikupane chechii iteyihtaakusit ayimiheuchimaau tekash chechii wepeyihtamuwaakanuutwaau awenichii umachihtwaawinuwaauh ekun nihaau e iteyihtaakusit uu chichisheayimiheuchimaaminuu. Anite Chishemanituuh maauch kaa suuhcheyihtaakusiyich unihiiwiniihch ekute wehtapit, anite kihchikiishikuhch.2Kihchikiishikuhch ihtakun chihchiwe ayimiheu maahkiih. Piihch maak an chihchiwe ayimiheu maahkiih ekut e ihtakuhch an e pischisaach maauch kaa chisteyihtaakuhch. Ekut maak chesheayimiheuchimaau aapatisit uu chichisheayimiheuchimaaminuu. Wiya Utipeyihchikeu chii wiikaapuuhtaau aniyuu ayimiheu maahkiiyuu anite kihchikiishikuhch kaa ihtakuniyich. Namui wii naapeu uhchi wiikaapuuhtaau.3An awen kaa wiyeyimaakanuut chechii chisheayimiheuchimaaut eukw an kaa petaawaat aniyuuh iinuuh upachishtinichewiniyuu kaye umachishtawehamaawiniyuu anite Chishemanituu e ihtaayich. Ekw maak kaye chiyaanuu chichisheayimiheuchimaaminuu Christ kaye wiya chipaa ihtakuniyuu chekwaayuu e ishi pachishtinamuwaat Chishemanituu.4Mikw maak utah aschiihch chii ihtaakupane namui chipaa uhchi ayimiheuchimaau wesh shaash ihtaauch kutakach ayimiheuchimaauch utah aschiihch. Aniyuu maak e itashteyich Jewa wiishuwewiniyuu ekun e ishi atushchetwaau uchii ayimiheuchimaauch utah aschiihch kaa ayimiheuchimaau aapatisitwaau.5Uchii maak ayimiheuchimaauch utah aschiihch kaa ayimiheuchimaau aapatisitwaau anite Jewa ayimiheu maahkiihch chii aapatisuuch. Aniyuu maak ayimiheu maahkiiyuu anit kaa aapatisitwaau mwehch an chihchiwe ayimiheu maahkii kihchikiishikuhch kaa ihtakuhch kaa ishinaakuhch chii ishinaakuniyuu. Wesh iskutak Moses che wiikaapuuhtaat aniyuu ayimiheu maahkiiyuu, chii itikuu Chishemanituuh, “Anite wachiihch kaa ihtaayin kaa waapahtiitaan taan che ishihtaayin ekun nihaau che ishihtaayin.”6Ekw maak nesituhtamuhkw uste e chisteyihtaakuniyich aniyuu utayimiheu atushchewin an chichisheayimiheuchimaaminuu Jesus e iteyihtaakuniyich utayimiheuchimaau aapatisuwiniyuu aniyuuh ayimiheuchimaau utah aschiihch kaa ayimiheuchimaau aapatisiyich. Kaye aniyuu kaa uskaayich niskumuwiniyuu kaa ushihtaat Jesus ekun aniyuu uste chesteyihtaakuniyich ishpishaat aniyuu weskach niskumuwiniyuu. Wesh Chishemanituu naspich taapweu uste mistahii che miyutuutamuwaat iinuu aniyuu kaa uskaayich niskumuwiniyuu uhchi.7Chii ishpish miywaapatanikupane maak an niishtam niskumuwin chechii pimaachihutwaau awenichii, namui chipaa uhchi nitaweyihtaakun e uskaach niskumuwin.8Chii ihtakuniyuu maak taan kaa ishi ekaa naheyihtamihiikut utiiniimh Chishemanituu. Chii iteu utayimuwinihch,Chika utihchipayuu e uskaayich niskumuwiniyuu che ushihtamuukwaau nitiiniimach. Israel iinuuch kaye Judah iinuuch chika nanihiihtamuch.9Uyuu kutachiyuu niskumuwiniyuu che ushihtamuukwaau nitiiniimach aahchiiuh chika iteyihtaakuniyuu kaa iteyihtaakuniyich aniyuu niskumuwiniyuu kaa ushihtamaamach aniyaah utaanische uhtaawaauh iskutak niya tipiiwe kaa wiihkuchihiimach anite Egypt uhchi. Wiyawaau maak namui uhchi nanihiihtamuch aniyuu niskumuwiniyuu. Eukw maak aniyuu wehchi ekaa uhchi piskaatakwaau.10Mikw maak maauyuu kaa uskaayich niskumuwiniyuu che miikwaau Israel iinuuch iskutak utihchipayikwaawen aniyuuh e chiishikaakwaauh. Nika ihtuutawaauch chechii maamituneyihtamihiikutwaau niwiishuwewinh kaye naashch chechii muushihutwaau e wii nanihiihtahkwaau. Niya nika Uchishemanituumitutaakuch kaye wiyawaau nika utiiniimin.11Namui chika uhchi nitaweyihtaakuniyuu chechii chischinuhamuwaat awen wiichishaan e itaat, Chika chiskutamaatin chechii chischeyimat Chishemanituu. Wesh misiwe awen nika chischeyimikw, kaa chisheinuut kaye an kaa awaashiyuut. An kaa chisteyihtaakusit kaye an ekaa kaa chisteyihtaakusit.12Nika chistimaacheyimaauch e machaatisiitwaau kaye tekash nika wepeyihtamuwaauch umachihtwaawinawaauh.13Iskutak Chishemanituu kaa itwet miin kutachiyuu niskumuwiniyuu che ushihtamuwaat utiiniim ekut wehchi chischeyihtaakuhch an niishtam kaa ushihtaakanuuhch ekaa shaash aapatihch kaye shaash e peshunaakuhch che chiishaapatahch.
Canadian Bible Society