Hebrews7
1Uu Melchizedek weskach anite chii chisheuchimaau. Salem e ishinihkaateyich ihtaawiniyuu ekute kaa chisheuchimaaut. Chii atushkuweu Chishemanituu maauch kaa ispeyihtaakusiyich e ayimiheuchimaaut. Uu maak Melchizedek peyakwaau chii nituu nachishkaweu Abrahamh mwehch e pechi chiiweyich anuhchiish e chii miyu tepahaayich kaye e chii nipahaayich mihchetu chisheuchimaauh e chii nitupayihkahtaakuyich. Ekw uu Melchizedek kaa shaweyimaat Abrahamh.2Ekw Abraham kaa miyaat aniyuuh Melchizedek peyakw tahtu mitaahtu taan kaa ishi wiihkuhtaat chekwaayuuh anite kaa nitupayit. Eukw uyuu kaa ishi miyaat aniyuuh Melchizedek e nuukuhtaat e chisteyimaat. Maamituneyihtamukw uu. An ishinihkaasuwin Melchizedek e itweshtamuwaataakanuuhch chisheuchimaau kuiskw kaa ishi uchimaaut ishi chiishuwemakan. Ekw maak aniyuu e chii chisheuchimaaut anite aniyuu ihtaawiniyuu Salem kaa ishinihkaateyich uu Melchizedek ekw eyuu chiyaameyihtamuwiniyuu kaa miiwet chisheuchimaau e ishi chiishuwemakaniyich e itweshtamuwaataakanuyich utishinihkaasuwin.3Uu kaa ishi wiihtamaatakuch eukw mikw uyuu e ishpish chischeyimaakanuut Melchizedek. Namui chichischeyimaanuu aweyuu kaa uhtaawiit maak aweyuuh kaa ukaawiit. Namui chichischeyimaanuu aweyuuh kaa uwaahkumaakanit. Kaye namui chichischeyihtamuwaanaanuu taaishpish kaa pimaatisiit kaye taaishpish kaa nipit. Namui chichischeyihtenaanuu wesh namui mitun uhchi aayimuumaakanuu masinahiikanihch. Uu kaa ishi wiihtamaatakuch, mwehch Chishemanituu Ukusisa kaachiche e ayimiheuchimaawiyich, kaye wiya Melchizedek kaachiche ayimiheuchimaau.4Maamituneyimaataau aahch e ishpish chisteyihtaakusit uu Melchizedek. Aat kaa ishpish chisteyihtaakusit aniyaa kuuhtaawiinuu Abraham yaapach chii miyeu Melchizedek pasch aniyuu taan wiya kaa ishi wiihkuhtaat.5Maamituneyihtamukw kaye taan e itashtech miin anite wiishuwewinihch. Mikw anichii Abraham utaanische ushim Levi e ihtaayich kaa uhchi aanische pimaatisiitwaau aniyuuh kaa naapewiyich chii aapahiishteyuu chechii ayimiheuchimaawiitwaauh. Uchii maak ayimiheuchimaauch chii pachishtishuwaatikuuch aniyuu Jewa wiishuwewiniyuu chechii utinamuwaatwaau utiiniimuwaauh, kaye wiichishaanawaauh, peyakw tahtu mitaahtu e ishpish wiihkuhtaayich chekwaayuu, aat kaye wiyawaau Abraham e ihtaayich e chii uhchi aanische pimaatisiitwaau.6Mikw maak aat ekaa anite Levi e ihtaayich uhchi uhtiskaanesit Melchizedek, yaapach chii miikuu Abrahamh peyakw tahtu mitaahtu taan kaa ishi pukuhtimaasuyich chekwaayuu. Ekw maak Melchizedek kaa shaweyimaat Abraham. Abraham chii niikaan wiihtamaakuu Chishemanituu cheshtinaash che shaweyimikut.7An awen kaa shaweyimaat aweyuu, wiya taapwe uste chisteyihtaakusuu ishpishaat an kaa shaweyimaakanuut.8Misiwe ayimiheuchimaauch kaa miyaakanuutwaau peyakw tahtu mitaahtu chekwaayuu, misiwe chek chii puunipimaatisiyuuch. Melchizedek kaye wiya chii ayimiheuchimaau. Chii miyaakanuu peyakw tahtu mitaahtu e tahtiniyikwaauh chekwaayuuh, mikw maak itashteyuu anite Chishemanituu utayimuwinihch eshkw e pimaatisiit.9Levi utaanische ushim eukunh anuhchiish e ayimiheuchimaawiyich. Eukw mikw uchii maayaakanuutwaau peyakw tahtu mitaahtu chekwaayuuh. Anite maak utaahch Melchizedek chii miikuu Abrahamh peyakw tahtu mitaahtu taan kaa ishi ayaayich chekwaayuu. Ekw maak chika chii itwenaanuu kaye wiya Levi peyakw tahtu mitaahtu chekwaayuu e chii miyaat aniyuuh Melchizedek muyaam kaa ishi miyaayich umushuum Abraham.10Wesh aat eshkw ekaa uhchi pimaatisiit Levi iskutak Melchizedek kaa nachishkawaayich Abrahamh chii ishinaakuniyuu mwehch kaye wiya Levi e miyaat Melchizedek peyakw tahtu mitaahtu chekwaayuu wesh ekut eshkw che uhchi aanische pimaatisiikupane Abraham e ihtaayich uu Levi.11Iskutak anichii Israel iinuuch kaa miyaakanuutwaau aniyuu wiishuwewiniyuu, aniyuuh ayimiheuchimaauh Levi e ihtaayich kaa uhchi aanische pimaatisiyich chii aayimuutamaakuuch uyuu wiishuwewiniyuu. Chii ishinaakuniikupane maak chechii pimaachihutwaau awenichii aniyuu kaa ishi aapatisiyich uyuuh ayimiheuchimaauh uhchi namui chipaa uhchi nitaweyihtaakuniyuu miin chechii ihtaat awen e ayimiheuchimaaut mwehch Melchizedek e iteyihtaakusit. Mikw maak namui uhchi pimaachihuuch awenichii mikw aniyuu utatushchewiniyuu aniyuuh ayimiheuchimaauch uhchi. Ekw kiipaa kaa nitaweyihtaakuhch miin kutak chisheayimiheuchimaau chechii ihtaat mwehch Melchizedek kaa iteyihtaakusiyich chechii iteyihtaakusit. Namui wiya Aaron kaa iteyihtaakusiyich chipaa uhchi iteyihtaakusuu.12Iskutak maak e aahchihaakanuutwaau ayimiheuchimaauch chii nitaweyihtaakun chechii aahtinikanuuhch an wiishuwewin.13E aayimuutaakanuuhch maak kutak ayimiheuchimaau e nituweyihtaakusit, Jesus an kaa aayimuumaakanuut. Namui maak Levi e ihtaayich uhchi aanische pimaatisiyuu taanite kaa uhchi pechi aanische pimaatisiyich ayimiheuchimaauh. Anite kaa uhchi aanische pimaatisiit Jesus namui wiiskaat uhchi uhchiyuu anite awen chechii ayimiheuchimaau aapatisiyich anite pachishtinichenaapiskuyuu kaa ihtakuniyich.14Misiwe awen chischeyihtam uyuu. Jesus Judah e ihtaayich chii uhchi aanische pimaatisiyuu. Kaye maak chichischeyihtenaanuu Moses ekaa uhchi wiihaat Judah e ihtaayich e uhchiyich aweyuu chechii ayimiheuchimaawiyich.15Ekw maak etituu e piyekaschihtaakuhch, shaash ihtaau kutak ayimiheuchimaau muyaam Melchizedek e iteyihtaakusit. Eukw uu Jesus.16Jesus maak aat ekaa anite uhchi aanische pimaatisiit taanite aanische wehchiyich ayimiheuchimaauh, yaapach chii ayimiheuchimaahaakanuu wesh namui wiiskaat chika uhchi puunipayiniyuu kaa suuhkaatisiimakaniyich upimaatisiiwin.17Eukw uyuu e ishi aayimuumaakanuut anite Chishemanituu utayimuwinihch, Chishemanituu e chii ishi aayimuumikut,Kaachiche chitayimiheuchimaawin, muyaam e ishi ayimiheuchimaaut Melchizedek.18Ekw maak an kaa chiishi aapatahch wiishuwewin iichenikanuu wesh namui suuhcheyihtaakun kaye namui wiyesh chii itaapatan.19Wesh aniyuuh wiishuwewinh Moses kaa pachishtinahk namui uhchii ihtuutaakuuch iinuuch chechii kuiskutaatisiitwaau. Mikw maak kutach chekwaan uste e miywaach chimiikunaanuu, eukuu aspeyimuwin. Aspeyimuwin ayaayihkwe eukuu che wiichihiikuyihkw chechii peshuwaapamihkw Chishemanituu.20Chishemanituu chii naspich taapweu kaa itwet,21Chiya muush chika ayimiheuchimaaun. Namui maak wiiskaat aahchiiuh nika uhchi iteyihtamihiikuun, chii kaachiche che ayimiheuchimaawiyin.Uyuu kaa itwet Chishemanituu namui wiiskaat uhchi iteu aniyuu kutak ayimiheuchimaau anite Levi e ihtaayich kaa uhchi aanische pimaatisiitwaau.22Chichischeyihtenaanuu uu wesh wiya Chishemanituu chii naspich taapweu uyuu kaa itaat Jesus. Uste maak uyuu kaa uskaayich niskumuwiniyuu kaa miitahkw Chishemanituu miywaayuu ishpishaat an weskach niskumuwin. Chicheshtinaahunaanuu maak che nanaakataweyihtahk Jesus cheshtinaash chechii miskamuhkw aniyuuh chekwaayuuh Chishemanituuh kaa itweyich che miikuuhkw.23Tahtwaau kaa nipit ayimiheuchimaau anite Levi e ihtaayich e chii uhchi aanische pimaatisiit, miin kutak awen chii ati miiskutiskuweu aniyuu kaa nipiyich.24Wiya maak Jesus, kaachiche chika ayimiheuchimaau, wesh kaachiche chika pimaatisiyuu.25Tekash chika chii pimaachiheu misiwe aweyuuh kaa taapweyimikut e naataayich Chishemanituuh. Wesh kaachiche pimaatisiyuu ekw maak muush chechii ayimiheshtamuwaat utiiniim.26Jesus eukw chisheayimiheuchimaaut chihchiwe chechii wiichihiitahkw. Namui wiiskaat machituutam. Mitun tekash kuiskutaatisiyuu kaye payehchisiyuu. Namui mitun iteyihtaakusuu taan e iteyihtaakusuuhkw chiyaanuu e machaatisiihkw. Namui mitun ihtakuniyuu chekwaayuu chechii ishi ataameyihtaakusit. Chishemanituuh chii wiyaapamikuu kaye chii ahiikuu anite maauch e ispeyihtaakuniyich anite kihchikiishikuhch.27Jesus namui uhchi ihtuu taan kaa chii ihtiyich kutak chisheayimiheuchimaau. Chii nitaweyihtaakusuuch anichii ayimiheuchimaauch eshikum chiishikaauh chechii machishtawehamaatwaau awesiisa anit chechii uhchi wepeyihtamuwaakanuutwaau umachihtwaawinawaauh kaye maak utiiniimiwaauh chechii wepeyihtamuwaakanuyich umachihtwaawiniyuuh. Jesus maak wiya mikw peyakwaau chii pachishtinam tipiiwe upimaatisiiwin chechii wepeyihtamuwaakanuyich aweyuuh umachihtwaawiniyuuh. Namui maak uhchi nitaweyihtaakuniyuu miin chechii pachishtinahk upimaatisiiwin.28An weskach wiishuwewin eukw an kaa chii aapatahch e miiskutuunaakanuut awen che chisheayimiheuchimaaut, namui maak tekash uhchi kuiskutaatisiyuuch uchii kaa wiyeyimaakanuutwaau. Paatimaa maak, iskutak kaa pachishtinahk ayimiheu wiishuwewiniyuu Chishemanituu ekw kaa nashpich taapwet Ukusisa che chisheayimiheuchimaawiyich. Shaash maak chii ihtuutam uyuu. Kaachiche tekash kuiskutaatisiyuu Jesus e chisheayimiheuchimaaut.
Canadian Bible Society