Galatians6
1Niichishaanitikw, chiishpin shaakuuchihiikute awen machaatisiiwiniyuu chiyawaau kaa piichishkaataakw kaa payehchisiit ahchaahkw chipaa wiichihaawaau an awen chiyaam chechii miinupitekw taan waa ishi paschepayit. Yaakwaamiishtaasukw kaye, ekaa chechii asichipayiyekw kaye chiyawaau chechii ati machituutamekw.2Maamiiskuch wiichihiitukw e aayimuhuyekw. Uu ihtiyekwe chika ihtuutamuwaanaawaau taan kaa itashuwet Christ.3Chiishpin awen chihchiwe e iteyimisut aat maak ekaa wiyesh iteyihtaakusit wiya tekash wiyeshimitisuu.4Misiwe paahpeyakw awen chipaa naanituu chischeyimisuu kuiskw kaa ihtikwe. Kuiskw maak kaa ihtikwe, kiipaa che maamihchihiisut, namui mechim kata uhchi kanawaapahtamuweu kutak aweyuu taan kaa ihtiyich.5Wesh misiwe awen tipaan chipaa ihtuutam taan aniyuuh kaa itashumikut Chishemanituuh wiya che ihtuutahk.6An awen kaa chiskutamuwaakanuut miywaachimuwiniyuu chipaa miyeu aniyuuh kaa chiskutamaakut chechii aapachihtaayich misiwe taan e ishi miyu ayaat chekwaayuuh.7Ekaawii wiyeshimitisukw, namui awen chika chii wiyeshimeu Chishemanituuh. Wesh aniyuu chekwaayuu che pachishtinamukwe awen anite aschiihch eukun aniyuu che nihtaauchiniyich anit.8Awen maak pisikw nitamukw kaa ishi pimaatisiit chika ishinaakuniyuu chek che ati wanaachihtaat upimaatisiiwin. Ekw maak awen mikw e ishi nituweyimikut Kaa payehchisiyich Ahchaahkw ishi pimaatisiite chika ayaau kaachiche pimaatisiiwiniyuu.9Ekaawii chika uhchi saskachiinaanuu e miyutuutamuhkw. Wesh kata utihchipayuu taanite che miikuyihkw chitipahamaakusiiwinuu ekaa puuniikwe e miyutuutamuhkw.10Mikw maak che ishpish miikuwaauhkwe chechii miyutuutamuhkw ekun muush ishi kuchihtaataau chechii ishi miyutuutamuhkw, muush misiwe awen chechii waawiichihiihkw. Etituu maak anichii kaa taapweyimaatwaau Jesus chipaa wii miyutuutawaanuuch.11Niya Paul kaa masinahamaatakuch. Chiwaapahtenaawaau taan e ishpish mamahkastaayaan ekw e masinahiicheyaan.12Anichii kaa wii siihchimitaakuch chechii chischinuwaachishukuwekw mikw wii nuukuhiisuuch e nanihiihtahkwaau Jewa ayimiheu wiishuwewinh kaye maak nituweyihtamuch chechii miywaachimaakanuutwaau. Eukw uyuu e ihtitwaau ekaa chechii nanehkaateyimuhaakanuutwaau e aayimuumaatwaau Christ utaashiteyaahtikumiyuuh.13Namui waawaach nanihiihtamuch Jewa ayimiheu wiishuwewinh anichii kaa pachishtinisutwaau chechii chischinuwaachishwaakanuutwaau. Chinituweyimikuwaauch chechii chischinuwaachishukuwekw mikw chechii maamihchimutwaau kaye chiyawaau e chii ihtuutaataakuch chechii chischinuwaachishukuwekw.14Niya maak wii mikw peyakw chekwaan nimaamihchihiikun, eukw Utipeyihchikeu Jesus Christ utaashiteyaahtikum. Wesh aniyuu taan kaa ihtit Christ aashiteyaahtikuhch eukw wehchi ekaa aapateyihtamihiikuyaan aniyuuh chekwaayuuh anichii ekaa kaa taapweucheyimaatwaau Jesus naashch chihchiwe kaa iteyihtamihiikutwaau. Kaye wiyawaau maak namui mitun aapateyihtamuch aniyuuh chekwaayuuh naashch chihchiwe kaa iteyihtamihiikuuch.15Chestinuwaachishwaakanuukwe awen maak ekaa chestinuwaachishwaakanuukwe, namui chekwaan. Chishemanituu e chii miikuyihkw uschi pimaatisiiwiniyuu eukw chihchiwe e iteyihtaakuhch.16Ekw maak misiwe anichii kaa nuushunehahkwaau uyuu chiskutamaachewiniyuu, Chishemanituuh chika miikuuch chiyaameyihtamuwiniyuu kaye chika chistimaacheyimikuuch kaye ekun che ihtuutawaat misiwe utiiniimh.17Ekaawii awen nika wii nanehkaachihiikw. Ihtakun taan kaa ishi namehiikuyaan niyuuhch Christ uhchi e atushkuuk.18Utipeyihchikeu Jesus Christ chika shaweyimikuwaau, niichishaanitikw. Amen.
Canadian Bible Society