Galatians5
1Christ chichii pimaachihiikunuu ekaa miin chechii maahchikwaapihkaatikuyihkw chekwaan. Wii suuhchikaapuukw maak. Ekaawii miin chika uhchi maahchikwaapihkaatikunaawaau Jewa ayimiheu wiishuwewinh.2Nituhtuukw maa. Niya Paul uu che ititakuch. Pachishtinisuyine chechii chischinuwaachishukuyin ekw kiipaa e ishinaakuhch muyaam ekaa aapataniyich aniyuu taan kaa ihtuutamaatahkw Christ.3Miin nika itaau misiwe awen kaa pachishtinisut chechii chischinuwaachishwaakanuut, kiipaa che nituweyihtaakusit misiwe aniyuuh Jewa ayimiheu wiishuwewinh tekash chechii nanihiihtahk.4Chiyawaau kaa iteyihtamekw kuiskutaatisiiwinihch che ishi kanawaapamitaakw Chishemanituu e nanihiihtamekw Jewa ayimiheu wiishuwewinh namui Jesus Christ chiwiichewaawaau. Namui chiwii utinamuwaanaawaau Chishemanituu ushaweyihchichewin.5Niyaan maak wii kaa taapwehtamaahch, Kaa payehchisiit Ahchaahkw e wiichihiikuyaahch nitaspeyimunaan Chishemanituu chechii kuiskunaakuhiyimiht wiya ishi e ihtaat.6Namui wiyeshin chestinuwaachishukuwaahche maak ekaa chestinuwaachishukuwaahche e wiichewachiht Jesus Christ. An chihchiwe e iteyihtaakuhch eukuu chechii saachihiituyihkw e taapweyimahkw.7Aat iska suuhk chichii iteyihtenaawaawii e pimaatisiistuwekw Utipeyihchikeu. Awen kaa ihtuutaataakw ekaa chechii nanihiihtamekw taapwewin.8Namayeu wiya Chishemanituu, an kaa tepwaatitaakw, kaa siihchimitaakw uyuu chechii ihtuwekw.9Eukuu kaa chii iinaanuuhch maanh, mikw apishiish e aapatahch uhpisikan yaapach misiwe e ispichishtit an aaihkunaau chika uhpiyuu.10Yaapach maak chicheshtinaateyimitinaawaau Utipeyihchikeu uhchi mwehch niya e ishi kanawaapahtamaan chechii ishi kanawaapahtamekw kaye chiyawaau. An maak awen kaa mukushkaateyihtamihiitaakw naashch kaa kuchihtaat wiya chechii nituhtuwekw, chika waweshihaakanuu.11Niichishaanitikw, ihtaauch awenichii e itwetwaau e itweuch e nituweyihtaakuniyich chechii chischinuwaachishwaakanuut awen. Namui maak uu nit ishi kacheskwen. Aniyuu e waawiihtamuch Jesus e chii nipiyich aashiteyaahtikuhch anit ukuiskutaatisiiu chechii ishi kanawaapamitahkw Chishemanituu eukw aniyuu wehchi chishuwaasitwaau awenichii. Eukw aniyuu wehchi nanehkaateyimuhiitwaau.12Kamaa etatuu maatishushutwaau anichii kaa chischinuwaachishwaakanuutwaau, anichii kaa mukushkaateyihtamihiitaakuch.13Niichishaanitikw. Chichii wiyeyimikunaawaau chechii wiihkuchihiikuyekw taan e ishi maahchikwaapihkaasuyekw. Ekaawii mikw chika uhtaapachihunaawaau uu e chii wiihkuchihiikuyekw chechii tawiishtamekw chechii machituutamekw. Teyakuch chipaa waawiichihiitunaawaau e saachihiituyekw.14Tipituutam awen wiishuwewinh uyuu peyakw wiishuwewiniyuu e nanihiihtahk eukw chechii saachihaat wiichishaan mwehch wiya e ishpish saachihiisut.15Wii yaakwaamiikw maak. Muush machipayihkahtaatuyekwe kaye kachiihkaamituyekwe yaakwaah chihchiwe wanaachihiituyekwe.16Uu maak miin chiwiihtamaatinaawaau. Pachishtin Kaa payehchisiit Ahchaahkw chechii waapahtiisk taan che ishi pimaatisiyin ekw maak namui chika uhchi ihtuuten an machihtwaawin waa ihtuutaman.17Wesh aniyuu e ishi nituweyimitahkw Kaa payehchisiit Ahchaahkw chechii ishi pimaatisiyuuhkw namui chinaheyihtenaanuu chechii ihtuutamuhkw. Naashch taapwe aahchiiuh iteyihtaakun chiyaanuu taan waa ishi pimaatisiihkw e iteyihtaakuniyich Kaa payehchisiit Ahchaahkw e ishi nituweyimatahkw chechii ishi pimaatisiyuuhkw. Maashihiituumakanh uyuu niishu iteyihtamuwin utah e ihtaayihkw. Ekw maak Kaa payehchisiit Ahchaahkw waa nakaahutahkw e wii machituutamuhkw.18Chiishpin Kaa payehchisiit Ahchaahkw tipeyihtahke chipimaatisiiwinawaauh namui ekw chika uhchi maahchikwaapihkaatikunaawaau Jewa ayimiheu wiishuwewinh.19Piyekasch nisituunaakuniyuu taan e ihtit awen nitamukw kaa wii ishi naniheyihtamihiisut. Miyeyihtam e pisikwaatisiit, e wiinisuu ihtit, e wiinisuu pimaatisiit, e wiinisuu maamituneyihtahk,20Kaye maak manituuhkaanh e nuuchiishtuwaat kaye maamaahtaawaatisiiwiniyuu e mukushkaachishtaat. Uyuu e ishi pimaatisiitwaau awenichii wauhkaateyimituuch, mamachipayihkahtaatuuch, naashch taapwe wiihchi wauhteyimeuch aweyuuh, aahkuyuwesuuch, kaye muush wii naniikaaneyihtaakuhiisuuch. Kakatipaanipayiheuch aweyuuh kaye pahkaanihiisuuch wiyawaau taan waa ihtitwaau chechii ihtitwaau.21Wiihch mushteneyihtamuch, muush chiishkwepeuch, maausikuwiyuuch chechii wiinisuu ihtuutaatutwaau, kaye naashch namui mamestinamuch che ishi mamachi ihtuutahkwaau. Shaash chichii ayaakwaamitinaawaau miin maak chika ayaakwaaitinaawaau anichii uyuu kaa ishi pimaatisiitwaau namui Chishemanituuh uchisheuchimaawiniihch chika uhchi ishi tipeyihtaakusuuch.22Ekw maak anichii Kaa payehchisiyich Ahchaahkw kaa pachishteyihtamuwaatwaau chechii tipeyihtamiyich e ishi pimaatisiitwaau kaye wiyawaau chiihkaanaakuniyuu taan nihaau e ishi pimaatisiitwaau. Saachihiiweuch, muuchicheyihtamuch, chiyaameyihtaakusuuch, siipiiwesiyuuch, miyeyihtaakusuuch, miyutuutamuch, taapweucheyihtaakusuuch,23naashch yuuspaatisiyuuch kaye miyu naanaakachihtaauch taan e ishi pimaatisiitwaau. Namui ihtakuniyiche wiishuwewin e chistahamaachemakahch uu chechii ishi pimaatisiinaanuuhch.24Anichii maak Jesus Christ kaa tipiyeusiitutaakutwaau shaash chii wiyeyihtamuch ekaa chechii pachishteyimitisutwaau kaau chechii ihtuutahkwaau taan waa ishi wehchipayiyich chechii ishi machi pimaatisiitwaau. Namui wii machituutamuch taan kaa ishi pechi machituutahkwaau anite ishi utaahch. Mwehch taapwe e chii asich chiistaaskutahkwaau umachaatisiiwinawaau kaye umachinituweyihtamuwinawaau aashiteyaahtikuhch ekun kaa ihtitwaau.25Shaash chichii miikunuu pimaatisiiwiniyuu Kaa payehchisiit Ahchaahkw, pimaatisiitaau maak taan e ishi nituweyimitahk chechii ishi pimaatisiyuuhkw.26Ekaawii chika uhchi chihchiwe iteyimisunaanuu. Ekaawii chika uhchi wauhkaahiitunaanuu kaye ekaawii chika uhchi mamushtenamuwaanuuch awenichii.
Canadian Bible Society