2 Thessalonians1
1Niyaan Paul, Silas, ekw maak Timothy, chiyawaau umaamuuayimihaauch anite Thessalonica kaa ihtaayekw Chishemanituu Uhtaawiimaau ekw maak Utipeyihchikeu Jesus Christ kaa tipiiweusiitutaataakw chimasinahamaatinaan.2Chishemanituu Uhtaawiimaau ekw maak Utipeyihchikeu Jesus Christ chika chishewaatutaakuwaau kaye chika miikuwaau chiyaameyihtamuwiniyuu.3Niichishaanaanich, iteyihtaakun muush chechii nanaaskumachiht Chishemanituu chiyawaau uhchi wesh etituu chit ati taapweucheyimaawaau Christ kaye maak wetaach etituu chisaachihiitunaawaau.4Eukw maak uu wehchi maamihchihiyaahch ekw maak yaayimuumitaahch anite kutakach umaamuuayimihaauch e ihtaatwaau. Nimamihtisiinaan e aayimuutamaahch ekaa puuniyekw kaye eshkw yaapach e taapweucheyimekw Christ aat e ishpish nanehkaateyimuhiikuyekw kaye e ishpish aayimuhuyekw.5Ekut maak utah che uhchi chischeyihtamekw taan e ishpish kuiskw ihtit Chishemanituu e wiyaaskunichet. An maak taan e ispayekw chika tepicheyihtaakusinaawaau chechii wiichihiiweyekw anite Chishemanituu uchisheuchimaawinihch.6Chishemanituu kuiskw ihtuu. Chika ihtuutuweu chechii nanehkaateyimuyich aniyuu aweyuu kaa nanehkaateyimuhiitaakw.7Ekw chiyawaau kaa nanehkaateyimuyekw chika ihtuutaakuwaau Chishemanituu chechii puuni nanehkaateyimuwekw kaye maak niyaan eukun che ishi wiichihiikuyaahch. Iskutak pechi nuukusite Utipeyihchikeu Jesus anite kihchikiishikuhch uhchi e pechi wiichewaat utenchilam kaa suuhkaatisiyich ekut che ihtuutahk uyuu.8Ishkuteyuu e chisihkuyepayiyich chika aapachihtaau waweshihaate aniyuu ekaa kaa chischeyimaayich Chishemanituu kaye aniyuuh ekaa kaa nanihiihtamiyich miywaachimuwiniyuu anit yaayimuumaakanuyich Utipeyihchikeu Jesus.9Chika waweshihaakanuuch kaachiche chechii wanaachisiitwaau. Kata iichenaakanuuch Utipeyihchikeu e ihtaayich uhchi kaye namui nihtaa chika uhchi waapahtamuweuch taan e ishpish suuhcheyihtaakuniyich umaskuusiiwiniyuu.10Chika waweshiheu Utipeyihchikeu uyuuh aniyuu e chiishikaayich takushihke chechii chisteyihtaakuhiikut kaa taapwehtamiitwaauh kaye chechii chisteyimikut misiwe aniyuu aweyuu kaa taapweyimikut. Ekut maak che wiichihiiweyekw kaye chiyawaau chisteyihtaakuhaakanuute Utipeyihchikeu wesh chichii taapwehtenaawaau an miywaachimuwin kaa wiihtamaataahch.11Euk maak uu wehchi muush ayimiheshtamaataahch. Nitutamuwaanaan Chishemanituu chechii tepicheyihtaakusiyekw chechii ishi pimaatisiyekw aniyuu taan kaa ishi nituweyimitaakw chechii ishi pimaatisiiwekw. Nitutamuwaanaan chechii miitaakw suuhkaatisiiwiniyuu chechii ihtuutamekw misiwe e ishi pukuseyimikuyekw chechii ishi miyutuutamekw. Kaye chechii wiichihiitaakw chechii chiistaawekw aniyuuh chekwaayuuh kaa ihtuutamuwekw e taapwehtamekw.12Ekut uu che uhchi chisteyihtaakuhtaawekw chitipeyihchikeminuu Jesus utishinihkaasuwin kaye chiyawaau maak chika chisteyihtaakuhiikuwaau. Eukuu che ihtuutaakuyekw e ishpish shaweyihtaakusitwaau Chichishemanituuminuu ekw maak Utipeyihchikeu Jesus Christ.
Canadian Bible Society