2 Corinthians8
1Niwiichewaakanitikw, chinituweyimitinaan chechii chischeyimekuch taan kaa ishi miyutuutamaakutwaau Chishemanituuh anichii umaamuuayimihaauch anite Macedonia kaa ishinihkaateyich aschiiyuu kaa ihtaatwaau.2Naashch taapwe chii pechi aayimihuuch. Aat aniyuu e ishpish naashch chistimaatisiitwaau yaapach naashch taapwe mistahii chii pachishtinicheuch. Kaye maak naashch taapwe chii miyeyihtamuch e pachishtinichetwaau.3Chii pachishtinamuch taan kaa ishi nihiipayiyich chechii ishpish pachishtinahkwaau, nichii waapamaauch wesin, ayuwaak maak yaapach chii ishpish pachishtinicheuch, wiyawaau mitun e chii iteyihtamihiikutwaau chechii ishpish pachishtinichetwaau.4Naashch nichii siihchimikunaanich chechii pachishtinachahtwaau kaye wiyawaau chechii pachishtinichetwaau chechii wiichihaakanuyich aniyuuh kaa chistimaatisiyich kaa taapwehtamiitwaauh.5Paashich maak chii ihtuutamuch taan kaa iteyimachihtwaau che ihtitwaau. Niishtam Chishemanituuh chii pachishteyimitisuustaweuch ekw niyaan kaa pachishteyimitisuustaakuyaahch mwehch taan kaa ishi nitaweyimikutwaau Chishemanituu chechii ihtitwaau.6Kaa waapahtamuwachiht maak aniyuu e ishi miiwetwaau nichii itashumaanaan Titus chechii shiihchimitaakw chechii pachishtinichewekw wesh wiya niishtam chichii aayimuutamaakuwaau e pachishtinichaanuyich.7Misiwe chekwaan naashch taapwe chikaschihunaawaau. Suuhcheyihtaakun chitaapwehtamuwinawaau. Chikaschihunaawaau e aayimuutamekw taan e ishi taapwehtamekw. Mistahii chichischeyihtamuwaanaawaau Chishemanituu utiteyihtamuwin. Naashch taapwe suuhk chititeyihtenaawaau chechii wiichihekuch kutakach awenichii kaye maak naashch taapwe chisaachihiinaan. Chipaa wii miyu miiwenaawaau maak.8Namui chiwii wiishuwaatitinaawaau uu kaa itweyaan. Mikw chiwii nituu chischeyimitinaawaau taapwe siyaachihiiwekwe e waawiihtamaatakuch taan e ishi aasihcheyihtahkwaau e pachishtinichetwaau kutakach awenichii.9Chichischeyimaawaau taan kaa ishi miyutuutamaachet Chitipeyihchikeminuu Jesus Christ. Chii weyuutisiyuu yaapach maak chii ihtuutaasuu chechii chistimaatisiit chiyaanuu uhchi. Chii nakatam wiya misiwe uweyuutisiiwin.10Eukw maak e iteyimitakuch chipaa ihtinaawaau. Pepuhch chiyawaau niishtam naashch chichii iteyihtenaawaau chechii pachishtinicheyekw, chichii chihchipayihtaanaawaau maak e pachishtinicheyekw.11Ekw maak, chiishihtaakw taan kaa ishi chihchipayihtaayekw. Taan kaa ishpish suuhk chii aascheyihtamekw uskach kaa wii chihchipayihtaayekw chechii pachishtinicheyekw peyakun yaapach chipaa ishi aascheyihtenaawaau anchiish e pachishtinicheyekw.12Nuukuhche naashch e aasihcheyihtamekw chechii pachishtinicheyekw eukw uyuu che naheyihtamihiikut Chishemanituu. Taapaa aniyuu ekaa e ayaawat kata uhchi kanawaapahtam. Aniyuu taan e ishi ayaawat eukw aniyuu che kanawaapahtahk.13Namui chititashumitinaawaau chechii aayimihiisuyekw anit chechii uhchi wehchihuutwaau kutakach.14Chiweyuuch ayaanaawaau chekwaan chechii wiichihekuch anichii awenichii kaa nuuhtepayitwaau. Ekw maak chek ishinaakuhche chiyawaau e nuuhtepayekw kutakach maak e weyuuch ayaatwaau ekw maak wiyawaau kweschiipan chechii wiichihiitaakuch. Ekw maak che taapituupayihch misiwe awen taan e ishi ayaat.15Mwehch e itashtech Chishemanituu utayimuwinihch, “An awen mistahii kaa maauchihtaat namui wesaa mistahii uhchi ayaau, ekw an mikw apishiish kaa maauchihtaat namui uhchi nuuhtepayuu.”16Ninanaaskumaau Chishemanituu e chii miyaat Titus mwehch niya e ishi saachihiitakuch chechii ishi saachihiitaakw.17Namui mikw aniyuu e chii wii itishahuchiht anite e ihtaawekw wehchi ituhtet, naashch wesin chichii wii nituwaapamikuwaau.18Ihtaau utah kutak chiichishaanuu naashch e miyu chischeyimikut misiwe taanite e ati ihtaayitwaauh umaamuuayimihaauh taan e ishi miywaapatisit e waawiihtahk miywaachimuwiniyuu. Eukun uyuu che pechi wiicheukut Titus.19Eyuu maak umaamuuayimihaauh chii wiyeyimikuu chechii wiicheukuyaahch e ituhtatawachihtwaau anichii kaa chistimaatisiitwaau kaa taapwehtahkwaau aniyuu Chipachishtinichewinawaayuu. Utipeyihchikeu maak niwii chisteyihtamihaanaan uu kaa ihtuutamaahch. Ekut che nuukuhch e wii wiichihiiweyaahch.20Namui kaye nitaweyihtenaan nitamukw chechii ishi ataameyimikuyaahch e pimipayihtaayaahch uu pachishtinichewin.21Chishemanituu nichischeyimikw muush kuiskw e ihtuuch. Nipukuseyihten maak muush kuiskw chechii ihtiyaan naapeu kaye e kanawaapamit.22Eukw maak wehchi itishahuchiht uu chiichishaanuu chechii wiichewaat aniyuu Titus. Mihchetwaau nichii waapahtiikunaan taapwe kaye wii e wii wiichihiiwet. Aniyuu maak taan e ishi taapweucheyimitaakw ekw etituu waa wiichihiitaakw.23Uu maak Titus eukw uu waachaapatisiimit e wiichihiitakuch. Ekw anichii kutakach chiichishaanuuch umaamuuayimihaauh chii itishahukuuch. Chisteyihtaakuheuch maak Christ chekwaayuu e ihtuutahkwaau.24Suuhk maak waapahtiyaahkuch uchii naapeuch e saachihekuch chechii waapahtahkwaau umaamuuayimihaauch chisaachihiiwewinawaayuu kaye chechii chischeyihtahkwaau chekwaan wehchi naashch maamihchihiyaahch.
Canadian Bible Society