2 Corinthians7
1Niwiichewaakanitikw, misiwe taan kaa itwet Chishemanituu cheshtinaash che ihtuutamaatahkw taapwe kata ihtuutam. Payehchihiisutaau maak ekaa mitun chechii ihtakuhch machihtwaawin chiiyuunaahch kaye chitahchaahkunaahch. Wesh ekut e nuuhkuhtaayihkw e nanihchiishtuuhkw Chishemanituu tekash e pachishteyimisuyihkw chechii atushkuukw.2Ekaawii iicheninaanh. Taapaa nuuhchi wanituutawaanaan awen. Namui nuuhchi wanaachihaanaan awen kaye namui nuuhchi wiyeshihaanaan awen.3Namayeu wii e wii nishuuwanaachimitakuch wehchi ititakuch uu. Shaash chichii wiihtamaatinaawaau e saachihiitaahch nitehiinaahch che ishpish pimaatisiyaahch kaye maak aat puunipimaatisiyaahche.4Mistahii chitaapweucheyimitinaawaau. Kaye naashch taapwe chimaamihchihiinaawaau. Naashch taapwe nikaachiichihiikuun e chischisiitutaatakuch. Aat e aayimihuyaahch yaapach naashch nimiyeyihten.5Wiyene utah, anite an Macedonia kaa ishinihkaatech aschii niishtam kaa ihtaayaahch namui mechim nuuhchii aasteyeskusinaan. Naashch taapwe nanaahkuu chiishi waustaapayuu. Chii ihtaauch anichii e machipayihkahtuuyimihtwaauh. Nichii wii sechisinaan maak.6Chishemanituu kaa kaachiichihaat aweyuu e niihteyihtamiyich nichii kaachiichihiikunaan kaa pechi itishahwaat niwiichewaakanh Titus.7Namui maak mikw anit nuuhchi miyeyihtamihiikunaan. Kaa pehtamaahch kaye taan kaa ishi kaachiichihekw Titus eukw uu kaye kaa kaachiichihiikuyaahch. Nichii wiihtamaakunaan naashch taapwe e wii waapamiyaahch kaye taan kaa ishi mihchiiweyihtamekw. Chii aayimuutam kaye taan kaa ishi maamituneyimiyekw. Ekw maak etituu kaa miyeyihtamaan.8Naashch taapwe chichii misimeyihtamihiikunaawaache an kaa masinahamaatakuch. Namui maak mitun nimihchiiwesin an taan kaa itisinahamaatakuch. Niishtam kiipaa chii ihtakun e macheyihtamaan. Aatawii maak mikw weipishchiish chichii misimeyihtenaawaau.9Anuhchiish maak ekw meyeyihtamaan. Aat e chii ihtakuhch e misimeyihtamekw chichii ihtuutaakunaawaau uu misimeyihtamuwin taapwe chechii mihchiiweyihtamekw chimachituutamuwinawaauh ekw maak chechii kweskaatisiyekw. Wesh Chishemanituu chichii miikuwaau aniyuu misimeyihtamuwiniyuu kaye aniyuu mihchiiweyihtamuwiniyuu. Namui maak kuuhchi aahkuhiikunaawaau an kaa ishi masinahamaatakuch.10Michihpin e ihtuutahk Chishemanituu chechii misimeyihtamihiikuyihkw chimachituutamuwinuuh ekut wehchi kweschinikanuuhkwaau chitehiinuuh ekw maak e ati pimaachihuyihkw, namui maak ihtaau awen chechii mihchiiweyihtahkw e chii pimaachihaakanuut. Aschiiyuu misimeyihtamuwin maak nipuwinihch ituhtahiiwemakan.11Chiyawaau maak wii chii naheyihtamihiikuu Chishemanituu taan kaa ishi mihchiiweyihtamekw. Chiwaapahtenaawaau kaye taan e ishi wiichihiikuyekw. Etituu suuhk chititeyihtenaawaau. Etituu suuhk chiwii waapahtiiwenaawaau taan e ishi miyutuutamekw. Chitihtuutaakunaawaau chechii macheyihtamekw e machituutaakanuuhch kaye chechii chishuwaasiistamekw machituutamuwin. Chitaascheyihtenaawaau chechii waweshihaakanuut an kaa machituutahk kaye maak chechii kuiskunaakanuut. Taapwe chichii waapahtiiwenaawaau kuiskw e ihtiyekw.12Namayeu an awen kaa machituutahk maak aniyuuh aweyuuh kaa wanituutaakut wehchii masinahamaatakuch. Chichii masinahamaatinaawaau chechii waapahtiitaakw Chishemanituu taan e ishpish aapateyimiyaahch.13Mistahii maak nikaachiichihiikunaan e chischeyihtamaahch uu. Etituu maak nichii miyeyihtenaan e waapamachiht niwiichewaakanaan Titus e miyeyihtahk. Chii miyeyihtam taan kaa ishi miyuhkuwekw ekw maak namui uhchi aayimeyihtam.14Niyaakan nichii wiihtamuwaau taan e ishi maamihchihiyaahch. Nichii taapwehtaanaakupane maak aniyuu taan kaa ishi wiihtamuwachiht. Muush nichii taapwenaan taan kaa ishi wiihtamaataahch kaye maak nichii taapwenaan taan kaa itaachimushtuwachiht Titus.15Ekw maak etituu e ati saachihiitaakw Titus e chischisit taan kaa ishi yaakwaau nituhtuwekw kaye e chii nanihiihtuwekw kaye maak taan kaa ishi miyuhkuwekw yaakwaau e iteyimekw.16Nimiyeyihten maak taapwe chechii taapweucheyimitakuch chechii ihtuutamekw misiwe taan e itashumitakuch.
Canadian Bible Society