2 Corinthians10
1Ihtakun che ishi pukuseyimitakuch. Uu maak che aayimuutamaatakuch an e ishpish chishewaatisiit kaye e ishpish chiyaamisiit Jesus Christ niwii iteyihtaakusin an e ishi ayimihiitakuch. Ihtaauch awenichii e itwetwaau naashch ekaa saapihtaakusuuch anit e ihtaawekw e ihtaauch. Mikw anite aahchiiuh e ihtaauch e uhchi suuhcheyihtaakuhiisuch itweuch.2Suuhk chinitutamaatinaawaau, ekaawii aayihkamihiikw chechii ekaa manaatisiyaan utihtakuche. Taapaa nika uhchi manaatisiin matwehukwaawenich anichii awenichii mikw niyaan e maamituneyimisuwachiht kaa iteyimiyamihtwaau.3Aat utah aschiihch e ihtaayihkw namui chit ishi maasihchenaanuu e ishi maasihchetwaau awenichii utah aschiihch.4Namui wii aschiiyuu maasihcheu chekwaanh nuuhtaapachihunaan. Chishemanituu usuuhkaatisiiwin nuuhtaapachihuwaanaan e wanaachihtaawachiht taan nanaahkuu e ishi maahchikwaapihkaatikutwaau awenichii machimanituuh.5Kwaast nitihtinaan chechii niihchiwepahamaahch taan e ishi wiyeshimuweu kachehtawehtaakuhiisutwaau anichii ekaa muyaam kaa ishi aayimuumaatwaau Chishemanituu kaye kaa nakaahuwetwaau chechii chischeyimaakanuyich Chishemanituuh. Niwii ihtuutawaanaanich chechii pachishteyimitisuustamuwaatwaau Christ umituneyihchikanawaauh chechii uhchi nanihiihtuwaatwaau.6Niishtam maak chiwii taupayihtwaatinaan chechii nuukuhtaayekw taapwe e nanihiihtuwekw Christ. Ekw maak che waweshihachihtwaau anichii eshkw yaapach ekaa kaa nanihiihtahkwaau.7Ekaawii ihtikw muyaam ekaa waapahtamekw taan e ishi miyu nisituunaakuhch. E ihtaakwe awen e cheshtinaahut Christ e tipiiweusiitutaakut che wii chischeyihtahk eukun an kaye chiyaanuu tepeyimitahkw.8Taapaa nishaakweyimun aat apishiish paashich kaa ishi aayimuutamuwaane an tipeyihchichewin kaa miikuyaahch chechii wiichihiitaahch. Utipeyihchikeu nichii miikunaan uyuu tipeyihchichewiniyuu chechii wiichihiitaahch, namui wii chechii niihtahuutaahch.9Namui chinituweyimitinaawaau chechii iteyihtamekw e wii kushtaachihiitakuch taan e itisinahamaatakuch.10Pasch wesh awenichii itweuch, “Naashch taapwe suuhchihtaakuniyuu taan e itasinahiichet Paul. Muhch maak e ihtaat utah naashch taapwe niyamisiiweyihtaakusuu. Kaye maak namui wiyesh itaapataniyuu taan e itwet.” Ekun e itwetwaau.11Mikw maak yaaitei che wii chischeyihtahkwaau uchii awenichii muush e ihtuutamaan taan e itisinahamaatakuch che ihtuutamaan iskutak anite e ihtaayekw e ihtaayaan.12Namui niwii ihtinaan taan e ihtitwaau anichii awenichii naashch chihchiwe kaa iteyimisutwaau. Mwehch naashch wiyawaau uste e iteyihtaakusitwaau e iteyihtaakusiyich kutak aweyuuh ekun e iteyimisutwaau. Naashch kaye kakanuwaapamituuch taapituu chechii iteyihtaakusitwaau. Nuwach maak namui iteyihtamuch aniyuu kaa ihtitwaau.13Niyaan maak wii namui paashich nika uhchi ishi mamiywaachimisunaan. Mikw aniyuu aapatisuwiniyuu Chishemanituu kaa miyimiht che aapatisiishtamuwachiht eukw mikw an che mamiywaatutamaahch. Ekut maak e asichipayekw chiyawaau wesh chitatushkaatinaan.14Namui paashich nit ishpish aayimuumisunaan muyaam chipaa ishinaakun e ihtiyaahch ekaa niyaan niishtam uhchi petwaataahch miywaachimuwin. Taapwe maak niyaan niishtam chichii petwaatinaan miywaachimuwin.15Namui kaye nitaayimuutamuwaanaan kutak awen utatuschewin mwehch niyaan an e chii ishi atushcheyaahch chechii itihtaakusiyaahch. Namui niwii paashichiskamuwaanaan taan e ishi miyimiht Chishemanituu chechii ishi atushkuwachiht. Nipukuseyihtenaan mikw etituu chechii atushcheyaahch anite e ihtaayekw wetaach chechii nihtaauchihch chitaapwehtamuwinawaau kaye che ishpish miikuwaahche Chishemanituu chechii wiichihiitaahch.16Chek maak nanaahkuu aschiihch uste anit kaa ihtaayekw kaa ihtakuhkwaauh chechii nituu waawiihtamaach miywaachimuwin. Ekw maak namui nika uhchi nanaapeumuwaachewaanaan kutak awen taan kaa ishi atushchet.17Wesh itashteu Chishemanituu utayimuwinihch, “Che wii nanaapeumukwe awen, aniyuu taan kaa ishi ihtuutamiyich Utipeyihchikeuh kata nanaapewaatamuweu.”18Wiya e miywaachimisut awen namui wiyesh itaapataniyuu. Michihpin maak Utipeyihchikeuh miywaachimikute eukw aniyuu yaakw yaapataniyich.
Canadian Bible Society