1 Thessalonians4
1Maahchishtai maak niichishaanitikw, chichii chiskutamaatinaan taan chipaa ishi pimaatisiinaawaau chechii naheyihtamihekw Chishemanituu. Eukw maak taapwe e ishi pimaatisiyekw. Chipukuseyimitinaan maak kaye chisiihchimitinaan suuhk etituu uu chechii ihtiyekw e nuushuushkuwekw kaye chiyawaau Utipeyihchikeu Jesus.2Wesh chichischeyihtenaawaau taan kaa itashumitaahch che ishi pimaatisiyekw, Utipeyihchikeu Jesus Christ e chii wiihtamaakuyaahch taan che ititaahch.3Wesh Chishemanituu aniyuu utiteyihtamuwin chechii payehchisiiwekw kaye ekaa mitun wiinisuwaatisiwin chechii ihtakuhch chipimaatisiiwiniwaahch.4Misiwe naapeu chipaa nuukuniyuu e chisteyimaat wiichiskweu kaye maak chipaa naheyihtamihiikuyuuh Chishemanituuh taan e itaatisiishtuwaat wiichishkweuh.5Anichii ekaa kaa chischeyimaatwaau Chishemanituuh pisikw tipeyimikuuch nitamukw chechii ihtitwaau. Chiyawaau maak wii namui uu chipaa uhchi iteyihtaakusinaawaau.6Ekaawii maak awen uyuu chika uhchi wii ishi wanituutaweu wiichishaan. Chichii wiihtamaatinaan suuhk e chii yaakwaamitaahch Utipeyihchikeu che wawesihaat misiwe aweyuuh uyuu kaa ishi wanituutamiyich.7Wesh taapaa kuuhchi tepwaatikunuu Chishemanituu wiinisuuwaatisiiwinihch chechii ishi pimaatisiyuuhkw. Payehchisiiwinihch chinituweyimikunuu chechii ishi pimaatisiyuuhkw.8Awen maak ekaa aapateyihtamukwe uyuu chiskutamaachewiniyuu namiyeyuuh naapeuh ekaa kaa aapateyimaat. Chishemanituuh, aniyuuh kaa miikuuhkw Kaa payehchisiyich Ahchaahkw eukun aniyuuh namui aapateyimeu.9Namui nituweyihtaakun chechii aayimuutamaatakuch taan chipaa ishi maamuu saachihiitunaawaau e wiichishaanihtuyekw chiyawaau kaa taapweyimekw Jesus wesh wiya Chishemanituu chichii chischeyihtamihiikuwaau taan chipaa ishi saachihiitunaawaau.10Naashch maak taapwe chisaachihaawaauch misiwe anichii chiichishaanuwaauch anite Macedonia aschiihch kaa ihtaatwaau. Ekw maak suuhk yaapach chiwii ititinaan yaapach etituu chechii saachihekuch.11Shaash ute chichii wiihtamaatinaan taan chipaa ihtinaawaau, suuhk kuchihtaakw chechii chiyaamaatisiyekw. Ekaawii utamaapimaahkuch taan e ihtitwaau kutakach awenichii. Kaye maak suuhk aapatisikw.12Ekw maak namui chika uhchi pukuseyimaawaauch kutakach awenichii chechii uhtinimaataakuch taan e ishi nuuhtepayiwekw chekwaayuu. Uu ishi pimaatisiyekwe ekw anichii awenichii ekaa kaa taapwehtahkwaau che chisteyimitaakuch.13Niichishaanitikw chinituweyimitinaan chechii chischeyihtamekw taan e ispayit awen e puunipimaatisiit e chii maak taapwehtahk miywaachimuwiniyuu. Ekw maak namui chika uhchi ishi misimeyihtenaawaau e ishi misimeyihtahkwaau anichii ekaa kaa ayaatwaau aspeyimuwiniyuu.14Chitaapwehtenaanuu e chii nipit Jesus kaye maak e chii wanishkaanaakanuut. Eukw maak uu wehchi taapwehtamukw Chishemanituu miin peshuwaate Jesus che asich peshuwaat kaye aniyuuh aweyuuh kaa nipiyich e chii taapweyimaayich Jesus.15Chiyaanuu eshkw che pimaatisiihkw takushihke Jesus namui niikaan chika uhchi nachishkawaanuu eshkw ekaa nachihaatwaau anichii shaash kaa nipitwaau kaa taapwehtahkwaau. Uu kaa ishi wiihtamaataahch wiya Utipeyihchikeu chii iteu uyuu.16Utipeyihchikeu chika pechi aasiyuu kihchikiishikuhch uhchi e chishewet e tepwet. Kaye maak an kaa niikaanishkuwaat enchil kata pehtaakusuu e tepwet kaye maak Chishemanituu upuutaachikan kata pehtaakuniyuu. Ekw anichii kaa nipitwaau e chii taapweyimaatwaau Christ wiyawaau niishtam kata uhpiskaauhch.17Ekw maak chiyaanuu eshkw kaa pimaatisiikw utah aschiihch che uhpiskaayihkw chechii nachahahkwaau anite kaskawanishkuhch uchii niishtam kaa uhpiskaatwaau. Ekw maak Utipeyihchikeu maamuu che ishi nachahiikw anite muushe chiishikuhch. Utipeyihchikeu maak e ihtaat ekute kaachiche che ihtaayihkw.18Kaachiichihiitukw maak e waawiihtamaatuyekw taan kaa itweyaahch.
Canadian Bible Society