1 AYohana5
1Kaangan fɛ́ a nɔɔk atsak fok aYeso wu a yet Anet-Isheshek, a mi sot kutes Adakunom, ngma ayɔng fɛ́ a shim ada me, a shim nggon wu bà.2Na ane fi in di rēn yit fok in shim yit nnon Adakunom, kin shim yit Adakunom, ni in nyes yit ikyɛng fɛ́ agbat ifɛ̀ wu fɛ̀ ni yit.3Na ane fi in di tonong yit ishim yit sak na Adakunom: inyes yit ikyɛng fɛ́ agbat ifɛ̀ wu fɛ̀ ni yit. Agbat ifɛ̀ wu se diring awo,4nek ngma ayɔng fɛ́ a mi sot kutes Adakunom, a sɛs awɛng naton kazatse. Iya awɛng naton kazatse se ne: inɔɔk atsak yit.5Angan wu fɛ́ a ya awɛng na kazatse yɛ? Tit ayɔng fɛ́ a nɔɔk atsak fok aYeso yet Arim Adakunom.6AYeso Kristi wu fɛ́ a bɛ́ azatse, ni irèn ashi nɛ nasok. Da a kin bɛ́ ni irèn ashi kyɛk awo, tit ni irèn ashi nɛ nasok. Ayet Kabik wu ka nesek kanu icɛɛt, nek Kabik e yet atsak.7Nek bataat ba fɛ̀ ba nesek kanu icɛɛt:8Kabik, ashi, nɛ nasok, bataat e bɛ́ kanu kazining.9In shashan yit kanu icɛɛt banet, awɛt kanu icɛɛt Adakunom se kashon, nek Adakunom wu a cɛɛt, a mi nɔɔk kanu icɛɛt naton Ari wu.10Ngma ayɔng fɛ́ a nɔɔk atsak ne Arim Adakunom, a rēn tsɛngtsɛng fok aYeso yet angan ɛ. Ngma ayɔng fɛ́ a rawu inɔɔk atsak na Adakunom, a mi te Adakunom sot tɛ afi mbɔɔs, nek a rawu dang nɔɔk atsak ni kanu icɛɛt fɛ́ Adakunom fɛ̀ naton Ari wu.11Kanu icɛɛt ka fɛ́ a kin nye: Adakunom mi ki nɔɔk yit kutset vit igang, kutset e se ayɛt Ari wu.12Ngma ayɔng fɛ́ a bɛ̀ Ari me, a bɛ̀ kutset; ngma ayɔng fɛ́ a se vit Arim Adakunom, vit iwu ni kutset.13Imi tsin ki jɛk yin nkyɔrɔk nang, iyin bayɔng fi i mi nɔɔk yin atsak ni iyerek Arim Adakunom, nɔng i da rēn yin fok i bɛ̀ yin kutset vit igang.14Iyɛ ting de fi in bɛ́ sak na Adakunom: ngma ikyɛng fi ki in rip yit kpaf ni ishim wu, a ki foos yit.15Ki in rēn yit fok a ki foos, ngma ikyɛng fi in ku rip yit, in rēn yit fok in da sɛ yit.16Ke akak di arunyining na tsin ra inɛn fi da itsa sak ni iku awo, won na a ra awon, Adakunom da ku nɔɔk kutset. In cɛɛt naton bayɔng fi inɛn ba tsa sak ni iku awo. Inɛn di se fi i tsas sak ni iku, in tsin fɛ̀ na a ra awon naton idɔng awo.17Ngma nkyɔrɔk nmaane in yet inɛn, awɛt inɛn di se fi da itsa sak ni iku awo.18In rēn yit fok ngma ayɔng fɛ́ a mi sot kutes Adakunom, a ya kashon ni iras inɛn awo, nek Arim Adakunom ku berese, aShetan da kyem a ku man awo.19In rēn yit fok, in yet yit nnon Adakunom, fok kazatse kang ngma kusum ka se nawop aShetan.20In ti in rēn yit fok Arim Adakunom mi bɛ́, a mi ki nɔɔk yit irēn, fi in di ki rēn yit Ayɔng fɛ́ a yet atsak. Iyit se yit ayɛt Ayɔng fɛ́ a yet atsak, in se yit ayɛt Ari wu aYeso Kristi. Iwu fɛ́ a yet Adakunom atsak e, a yet kutset vit igang e.21Naban nnon in, sak yin ace yin yik-yik na nabannom.
The Seed Company