1 Timoteo3
1Ënëx ka asérabi ꞌikën: Uin kara ënë ñumëti ꞌaisatania an ka ñu upí ꞌati sinanti ꞌikën.2An ënë ñumëti bikë a ka ꞌatima okin ñuikëma ꞌitima ꞌikën, ꞌianan ka achúshi xanu ñuishi ꞌianan, ñu ꞌaisama ꞌaisa tankibi tënëkë ꞌiti ꞌikën, ꞌianan ka nuibanankë, ꞌakianankë, uni aín xubunu nukumianan, bëtsi ñu ꞌunamisabi ꞌiti ꞌikën.3Ka ꞌiti ꞌikë paënkëma ꞌianan, mëanankë unima, nuibanankë, ꞌimainun kuríki kuë́ëirakëma ꞌiti ꞌikën.4Usa ꞌikë ka aín xubunu ꞌikë aín bëchikëkaman aín bana tani upiti abë inun ꞌimikë ꞌiti ꞌikën.5Uinu ꞌikë unin kara aín xubunuabi upiti ꞌima, ¿An kara uisaxun iglesianua Diosan ñumëti ꞌakin upiokin bëruanti ꞌik?6Usa ꞌain ka an ñumëti ꞌakë ax bërí ië́kë ax ꞌitima ꞌikë, ꞌën kana bëtsisamaira ꞌai ki nipakëti anua ñunshin ꞌatima nia anuribi xutima kupí.7ꞌImainun ka uni ꞌuchañu kamaribia ñuikima nuibakë ꞌiti ꞌikë, ꞌatimati ami banakëbëa, ñunshin ꞌatimanën ꞌakë ñunu nipakëtima kupin.8Usaribiti ka an iglesianu ꞌakinkëkama ax nuibanankë ꞌianan këmëi banakëma, paënkëma ꞌimainun kuríki ꞌaisamokin bikë ꞌitima ꞌikën.9Ñu unpukëkama kamina asérabi ꞌë ismia, upí sinanñu ꞌai ꞌiti kupí.10Uisai kara ꞌia kixun pain iskëxubia uisa ñu ꞌaisamabi ꞌaima nitsia iskin ka aín ñu më́ëti ꞌati ꞌinanti ꞌikën.11Usaribi ka xanukama ꞌiti ꞌikën, këmëkin bana ñuikëma, bëtsibë nuibanankë, upiti kanankë, ꞌimainun upiokin ñu ꞌakë ka ꞌiti ꞌikën.12An iglesianu ñu mëëti ꞌakinkë ax ka achúshi xanun bënë ꞌiti ꞌikën, ꞌianan ka aín bëchikë aín xubunu ꞌikë kamaribi upiokin bëruankë ꞌiti ꞌikën.13An iglesianu ñu mëëti akinkë ax ka upiokin ꞌiskë ꞌiti ꞌikën, usa ai ka kamabi unia aín ñu më́ëti ꞌaia kuë́ënkin iskë Cristo Jesusan ꞌië́mikëx ami sinani chaa ꞌiti ꞌikën.14Mi bënë́kin isikuanti kana kaini; ꞌixunbi kana ënë mi inshaxunin,15ꞌëx nukukëbëtamabi kamina ꞌunanti aín Diosan aintsikama ꞌax ka iglesia ꞌikën, an ka an ira asérabi kushiokin nu bëruaiña.16Ax ka bëtsiokin sinantisama ꞌikë asérabi nukama ami sinankë ax ka chaíira ꞌikën: Cristo ka unisa ꞌai mërakëxa, an nukë ꞌunamikë a ka aín Bëru Ñunshin Upitan ꞌunamiakëxa, usa ꞌikë ka angelkaman isakëxa. Kamabi ëmanuxun ka ñuiakëxa, usa ꞌain ka me kamanuaribi ami katamëaxa, ax ka aín nëtë pënëíira anu bikë ꞌiakëxa.
The Seed Company