1 Pedro4
1Mitsux kamina Cristo ꞌiasai tëmëratishi ꞌiti ꞌain, Cristo ënë menua aín naminu tëmëra, usaribiti min naminu ꞌuchatëkënuma ꞌiti ꞌain.2Ax kamabi nëtën Dios kuë́ënsa oí tsóti kuë́ënkë an ka unin sinankësa oi tsotima ꞌikën.3ꞌItsa baritia kamina mitsux uni an Diosan bana unankëma an akësaribi okin ñu ꞌatima akën, usa ꞌain kamina, mitsuxribi ꞌatima ñu ꞌai bukuakën, pianan, chaíira, xëanan, paëanan bëtsi ñu rabi bukuakën.4Bërí kamina mitsun atubëtan a ñukama ꞌaima, usa ꞌain ka atux mitsu sinani ꞌatimati banaia.5ꞌAibi ka atun uisai kara ꞌiaxa kixun an ënë kati ukëma ꞌainshi ꞌiti ꞌikën, an ka uni bamakëma ꞌimainun bamakë uni ñukákin uisai kara ꞌiaxa kixun kati ꞌikën.6ꞌAn ka kamabi uni bamakëkama upí bana ñuixuankëxa, atuxribia bëru ñunshin Upiñu ꞌai tsónun, Dios kuënsabi oi ënë nëtënu aín nami kupí ꞌaisama okë unin isti kupí.7Anuan kamabi ñu këñuti ka ꞌuramatia. Usa ꞌain kamina mitsux upí sinanñu ꞌixun, asérabi ënkima ñukati ꞌain.8Usa ꞌain kamina kamaxi nuibanani kuë́ënti ꞌain, mitsux nuibanankë ꞌain ka min ꞌuchakama tërë́nkë ꞌiti ꞌikën.9Kamabi kamina min xubunu ami, banakima biti ꞌain.10Mikama kamina achúshi achushinën, Diosan Bëru Ñunshin upí bia. A upiokin bëruanki kamina bëtsi kamaribi upiokin ꞌakinti ꞌain.11Uix kara banaia, ax ka Diosan banasaribi ꞌinun banati ꞌikën. Uin kara bëtsi ñu ꞌinania an ka Diosan ꞌakinkëxun bëtsi ꞌakinti ꞌikën. Kamabi ñu ꞌakin kamina Dios Jesucristo kupí rabikë ꞌitanu ꞌati ꞌain, aín kushi pënëkikë an ka nëtë xënibua ꞌaibi ꞌiti ꞌikën. Ashi.12ꞌËn nuibakë xukëantu, kamina tëmërai sinankasmakësa ꞌitima ꞌain, bëtsi bëtsi ñu ꞌikëbëbi ka ax bëtsi ñu inukësa ꞌikën.13ꞌAibi kamina kuë́ënti ꞌain, Cristo ꞌiasaribiti tëmërai ax ukëbë aín nëtë pënëíira anu ꞌinux kuë́ëira kuë́ënti ꞌain.14Chúamarua tani kamina bëtsian Cristo kupí ñuikë kuë́ënti ꞌain, usa ꞌain ka Diosan Bëru Ñunshin Upíira kamabi nëtën mitsubë ꞌiti ꞌikën.15Mikama achushinëx tëmërakë, ax ka uni rëtëkë, mëkamakë, ꞌakanankë, ꞌimainu unin ꞌakë ñunu atsinkë kupí ꞌikëma ꞌikën.16Uix kara Cristonan ꞌaish tëmëraia ax ka ami rabintima ꞌikën, usai ꞌikima ka aín anë ubankë kupí Dios rabiti ꞌikën.17Anun Diosan kaiskë unikama aín aintsibi tëmëramiti nëtë ka nukuaxa. ¿Usa ꞌain kara an aín bana kuaisamatankë a unikama Diosan uisa oti ꞌik?18—Nuibakatibi ka upí ñu ꞌakë an ꞌiëtia, ¿Uisai kara uni ꞌatima ꞌimainun uni ꞌuchañukama ꞌiti ꞌik?19Axa Dios kuë́ënkësabi oí tëmërakë an ka ax kuë́ënkësabi oki upioki ꞌakin, Diosan aín rara itsi bëruanu ꞌinanti ꞌikën an ka ënkima bëruaia.
The Seed Company