Sofoníasi3
Lifigoun luma lesefurún Herusalén
1Fugiabu Herusalén, uburugu mabuchahati, dáseiwaali, le éibaahabaliña lílana!2Meteniti lun lumalali Wabureme, maha ligía lererehóun lun; mafiñeti luagu Wabureme; máluahan lumuti Lubungiute.3Ítara haña lábutigu kei liñún ha áünhatiña, aguseragüdütiña ítara haña kei ounli áraabuna lidan fulasu mageirawati ha mígirunbaña ni aban abun lubá larugan binaafin.4Marasualugutiña profetagu ani barügua hagía houngua, magunfuliruntiña lau hererun; wíyeda hamutu fádirigu ténpulu, dürügua hamuti lilurudun Wabureme.5Gama lumoun anihein Wabureme uburugu, le buídubei ladügübei, mama le wuribabei. Sagü binaafin ladügüni laguseragüdün. Ánheinti le wuribabei, ibidiñegubéiti busiganu lun.6Lariñahare Wabureme: «Günringuaadina néchanigu, chagá naali lubarieirun, ígira naali lémeri málouga, úouga gürigia ásügürütiña luéigiñe. Úaali ni aban aganóuti lidan burí luburugute!7Nariñaga núnguarügü: “Ítara luba inebe nan lun Herusalén, ábame lánharun lun narufudahan lun; ítara luba magünrinchawagun tan luban lau nabeichuni”. Gama lumoun aba hóufudahan adüga sun luwuyeri wuribani.8Aguraba humana lubeiti lídanme weyu násaarun adimureha huagu. Nariñahare au, le Aburemei: Aransedina lun nóundaraguniña néchanigu luma arúeihani lun narariraguagüdüni lanarime nigañi hawagun. Lagünrinchagubei lanarime nigañi sun múa.9«Danme lasuseredun katei le, nadügüba lun máhuduragun hamá lílana fulasu houn guáriuagu lun núnrügü lan háhuduragua, au, le Aburemei Suntigabafu nadügüba giñe lun gaganbadi hamá súngubei nun.10Hayabiba numutuniña ha chagagubaña loubafurugu Etiopía, ayumuragua nun barüina hagíame idewesei nun.11Lídanme dan ligía, huguya numutuniña, masandihadünme busiganu luagu ni aban lídangiñe katei le aubei hawügürihóua nun, ladüga nagidarubaña barügua tungua hídangiñe, marufudunhaadünme anaaguni unguaü luagu nuwübüri le sándubei.12Nígiruba gürigia ǘnabugubutiña hidan, ha lúnbaña híchuguni hafiñen nuagu.13Hame erederutiña hádangiñe Ísüraelina, Madügünbaña marichaü, mariñagunbaña iyeeni, mabuinchagüdün habéi hayuma lau marasualugu. Gayaraabei heigin ani emeraagua hagíame manufudeuga»Uremu lánina ugundani luagu Herusalén
14Beremuha, uburugu Sión! Hagúaraha lau ugundani, lumutuniña Ísüraeli! Gundaabá, Herusalén, gundaabá tau sun banigi!15Gidala Wabureme siadi buéi, bugá laaña báganiñu. Anihein Wabureme, le lurúeite Ísüraeli buma: Manufudedunhadibume ni ka uei.16Lariñawagúba lun Herusalén lidan dan ligía: «Manufudedabá Sión, mígirun buguyame lun leferidiruni búhabu lere!»17Anihein Wabureme le Bubungiute buma; gabafuti ani lesefurubadibu! Gúndaabei Wabureme bau. Líchuguba iseri ibagari bun lau línsiñehabu; leremuhaba lau ugundani18kei lidan luéyuri fedu.Lariñahare Wabureme: «Nesefurubadibu luéi wuribani le ayawadagutibu, luma luéi busiganu le ábürühati buagun.19Lídanme dan ligía, nabeichagubaña ha amudiragubalibu. Níderaguboun mudún to adamahaboun, budanóunme to ayuridaguboun; sun mebereseni le ichugúbei hun, nadügübei lun uéirigunime luma inebesei.20Lídanme dan ligía, nanügübadün, nóundarubadün; nasansirubei hubunurun, níchuguba uéiriguni hun haganagua sun gürigia ha ubouagubaña. Au, le Aburemei, ariñagubalin».
Bible Society of Honduras