Uremu4
1Magadiñetibu númari, wéiriti bumagadiñen! Ámirihati bagu lau ínsiñeni aramudañu tábugiñe belu ítara liña bídiburi kei harahüñü gábara dan le háhurerun hámagua luagu luwübüri Galaadü.2Wéndeburiti sun bari, ítara liña kei mudún ha sun liña hagoun, ha aranseñabaña lun hasarúniwa.3Funati biyumaaru kei fuluri funati, ani bímeburiti bererun. Ítara liña bubuyubu kei bián tagu güranáda tábugiñe bubelun.4Ítara liña bigiina kei luayelesin Dawidi. Anihein milu idaüdinaü lauti gürabu dibiñu luagu, idaüdinaü le hani ganigitiña.5Ítara liña baniguagu kei bián usari mádounu ha éigitiña sagadi labadinagua fuluri.6Sun arugadeina lan agumuchagueina ligía luburiga, nídiba luagun luwübüri mira, luagun luwübüri kupali.7Mama lanarime bumagadiñen númari, lúmagiñe bugudi darí bábulugu! Úati mégeiti buagu.8Rariba numa Líwanurugugiñe, nadari; rariba numa Líwanurugugiñe. Ariaguabéi fulasu wayati lábulugugiñe Amaná, lábulugugiñe Senirü luma Erümón; lúmagiñe hábiñegiñe liñún, luéigiñe hawübüri leoparüdu.9Íweruhaba nanigi, nitu, nadari; íweruhaba nanigi láurügü barihin nuagun, lau aban lídangiñe lifilun biñari.10Lisemén san basupahan, nitu, nadari! Bímeti sügǘ tau diwéin, semeetima ligía bibiñe sügǘ lau sun luwuyeri ibiñein.11Ítara liña lisemén biyumaaru kei sírudu. Anihein sírudu luma míligi tábugiñe biñeñe! Ítara liña tíhemen badaüragun kei líhemen wübü Líwanu.12Buguya, nitu, nadari, fuluri-agei baríeiruati buguya, lagei duna daruguti, lísensen duna daruguti;13fuluri-agei le ñein lubéi táhücha güranáda to semeeboun in; fuluri-agei le ñein lumuti fuluri le alühéña,14nárüdosu luma asafürán, maburu le buiti líhemen luma kanela, luma sun luwuyeri lídibu kupali, mira luma áloe; Sun lubuidun-agei katei le buiti líhemen!15Buguya lísensenbei lidunari nufulurin-agei, le ñéingiñe lubéi léseha duna bímeti, duna le ararirubei luéigiñe wübü Líwanu.16Garabali luéigiñeti nórute iñuraguabá! Garabali luéigiñeti suru higabu nun! Háfuha luagun nufulurin-agei lun lehemougadun. Tuguya: Higabu lidoun bufulurin-agei númari lun beigin lídangiñe lin le semeebei.
Bible Society of Honduras