Uremu3
1Áluaha numuti le bímebei tun nanigi nigabananrugu áriebu, áluaha numuti ani madari numuti.2Ábati násaarun, aba néibuguni uburugu áluahei le bímebei tun nanigi, ǘmada luma mágidurugu. Áluaha numuti, ani madari numuti.3Aba nálügüdüniña ha óunigirubaña áriebu uburugu, marihin humagili san númari?4Málügili lúmagiñe nígiruniña, ligía nadunragun luma númari. Aba nárügüdüni lúhabu, mígiragüdünganei, aba nanügüni tirumunrugun núguchu.5Füramase humá nun hiñaruñu Herusalénna, hawagu usari ha dabíararugubaña, madüraagun hubéi lan lidabagu númari. Ígira huméi lun larumugun darí lásaarun!
Lǘrüwan uremu
6Ka san le ñǘbuinbei lídangiñe fulasu mageirawati labadinagua lugumulelin mira luma kupali, luma sun luwuyeri ibiñein?7Ariha humá, lagei Salomón! Añate ǘrüwa wein súdara hádangiñe ha ganigitimabaña Ísüraeli geyegu lau;8sun hagía gageindaguaditiña buidu tau eféin, ani wuriburuguna buítiña hagía; anuhein lefeinte kada aban lóubawagu, aranseñu lubá furumiñeguarügü denchaü áriebu.9Adügagüdaali urúei aban lagei lautu wewe fínuti le Líwanuna.10Lauti pülata tebu, lauti golu tabalachagüle; tau gamisa funatu lafurarúa tálana; würiña Herusalénna adügübalin tuenden múnadagiñe lau ínsiñeni.11Würiña lílana Sión, furí humá arihei urúei Salomón! Lauñein liridin le tadügübei lúguchu lun lubá lamarieidun, lubá weyu le gúndaatimabei lidan libagari.Bible Society of Honduras