Sálumu62
Búngiurügüñein aramudaguagülei
1Lídanrügüñein Bungiu nadarira darangilaü; lúmagiñerügüñein liabin nesefurun.2Ligíarügüñein esefurana aramudalana giñe; méiguadunbadina lubeiti ladüga Bungiu lan naramudaguagülebei.3Ídaame san hígirei hañawarihan nun áluaha hágurunina ǘnabun kamá hamuga aban touba muna le ábürühati odi aban lan baríeiru le héiguamemeeli múarugun?4Luágurügüñein hábürügüdünina haritagua; iyeeni ligía lueirin-ágeibei hagundan: Buiti hadimurehan nuagu lau hayuma, gama lumoun íñaragua hamutina lau haritagun.5Lúmarügüñein Bungiu nadarira darangilaü; ani lúmagiñe liabin nemenigin.6Ligíarügüñein esefurana ani góunigilana; méiguadunbadina, ladüga ligía naramudaguagülebei.7Lúmagiñe Bungiu liabin nesefurun luma ninebese; ligía óunigirubalina aramudalana.8Numutuniña, afiñe humá luagu Bungiu súnwandan! Hadimureha lidan furíeigi lau sun hemenigin! Bungiu waramudaguagülebei!9Ni kata gürigia, dandu ha gudemebaña kei ha rísibaña ni kátañanu; ánhaña amisurahóua biángubei hagía lidan aban balansu úara, huálibaña sügǘ lau ni kata.10Míchiga huméi hafiñen luagu anarimeni; manaagua humá hungua lau íweruhani! Anhaün arisida, míchiga huméi hemenigin luagun seinsu.11Aganba naali katei le ariñaga láalibei Bungiu sügǘ lau aban wéiyaasu: Luagu lani lan Bungiu ubafu luma ínsiñeni, ani fayei lániña sun gürigia úaragua luma katei le hadügübei.Bible Society of Honduras