Sálumu44
Afurieiduni amuriahei lídehan Bungiu
1Bungiu, aganba wamaali lau warigei abahüdagua haméi wagübürigu woun katei le burí meha badügübei lidan dan le sügühalibei:2Bugagua bumutiña gürigia ha gibe tubungiutegu lau búhabu guánarügü beigua bumutiña néchanigu hagía aba bíchuguniña wagübürigu ñein.3Mama harüna tuma hefeinte agañeiragüdübaliña; mama hagía agañeirubalin múa. Lagañeirun bubafu luma bere! Lagañeirun larugoungadüna biñuarü, ladüga buga hínsiñe bun!4Nurúeite! Nubungiute! Buguya agañeiragüdübaliña bumutuniña;5seremei buguya wagañeirubaliña wáganiñu; lidan biri waburechaguaaña ha ageindagubaña wama!6Memenigidúnbadina hamuga tuagu tebu nigimaran, magañeiragüdün tubadina hamuga giñe nefeinte.7Buguya agañeiragüdübaliwa hawagu wáganiñu, buguya íchugubaliña ha iyereehabúbaña woun lidoun busiganu.8Wapantahaba bau súnwandan, Bungiu, weremuhaba giñe lun biri súnwandan!9Gama lumoun ígira báadiwa; buíngüda báadiwa lau busiganu. Máfuridunhadibu ageindagua úara hama wasudaranigu.10Gararaguagüda báadiwa hawéi wáganiñu; íweruha hamutiwa ha iyereehabúbaña woun, barǘ haméi le habusenrun.11Derege báadiwa kei mudún ha lúntiña hafarúniwa, chagagua báadiwa haganagua gibe tubungiutegu;12alugura baaña bánigu maserunga ani magañeirúntibu ni kata lau baluguruniña.13Adüga báadiwa lébuname anabúni; anabagua hamutiwa wabesinanigu ru hamawa lidoun busiganu.14Adügaadibu lun héheraagüle wamá gibe tubungiutegu; dan harihiniwa aba hánhinhani hachügü éheraha wau.15Súnwandan láuñadina busiganu, sanditina kamá hamuga léiguada nigibu lau busiganu.16Ladüga lanarime ladimurehan nágani ásurana anaba.17Mama ladüga wabulieidunibu lasusereda katei le woun. Mama luéigiñe magunfulirun wamani bidaradun!18Maritaguntiwa wígirunibu, mígirun waméi bémeri.19Lau sun lira ígira bumutiwa haganagua animaalu áraabuna. Daruguagüdaadibu lanarime luburiga wau!20Anhein hamuga bulíei wamutibu Bungiu, lun hamuga huduguatiwa lun aban bungiu terencha lidan bilugaarun,21gefentibu hamuga luagu, ladüga subudi bumuti sun katei, íbini le aramudaguabei.22Gama lumoun yarafatiwa lun wounwen buéigiñe súnwandan óusera hamutiwa keisi mudún anügǘtiña lun háfarawagun.23Ka san uagu barumuga, Nabureme? Agaguduabá, agaguduabá! Mágurabawa lun sun dan!24Ka san uagu baramudagua wawéi? Ka uagu babulieidawa wagía le asufurirubei saragu?25Bucharuadiwa, héiguañu waña múarugu, aduruuheina wágubu múarugu!26Saraba, higabu bíderaguawa, sefubáwa luagu bínsiñehabu.Bible Society of Honduras