Sálumu42
Lídanñein Bungiu nemenigin
1Ítara kei láluahani usari duna lidan lumagürabu, ítara liña giñe náluahanibu Nubungiute.2Mágürabutina lun Bungiu le íchugubei ibagari. Ídaayame funa san narufudagua nungua ligibugiñe Bungiu?3Náguira néiginbei áriebu wéyuagu, ani súnwandan nálügüdüniwa: “Hagéi san Bubungiute?”4Dan le nasaminarun luagu burí katei le, aba nígiraguagüdün nungua lun nigarigu; haritagua numuti dan meha nidin adundeheina gürigia lúbiñoun Bungiu agúaraheina wagía lau ugundani luma eteingiruni. Ma meha lanarime fedu!5Kaba san uagu lárügüdana maguraasuni? Kaba san uagu nadiherida? Ru naali nemenigin luagu Bungiu, ani nalawahamémebei. Ligía Nubungiutebei Nesefuragüle!6Sandí numutu nanigi lau maguraasuni, Ligía lérebei naritagun luagun Bungiu. Ítara kei lararirun duna luéigiñe wübü Erümón luma Misarü, aba lidin lau anarimeni lidoun duna Hordán, ítara liña lueirin íruni le lóunahabei Bungiu nuagun.8Wéyuagu, óunaha lumuti Nabureme línsiñehabu nun, áriebu, meredeti neremuhan ni nafurieidun lun Lubungiute nibagari.9Nariñaga lun Bungiu, le óunigirubalina: “Ka san uagu babulieidana? Ka san uagu mosu lubéi hasufuriragüdünina náganiñu?”10Íbini burí nabu gáriti lárigi hanabagunina náganiñu, súnwandan hálügüdüñadina: “Hagéi san Bubungiute?”11Kaba san uagu lárügüdana maguraasuni? Kaba san uagu nadiherida? Ru naali nemenigin luagu Bungiu, ani nalawahamémebei. Ligía Nubungiutebei Nesefuragüle!Bible Society of Honduras