Sálumu33
Lalawahóuniwa luma leteingiruniwa Aburemei
1Gunda humá luagu le adüga láalibei Aburemei huguya gürigia buítiña; wéndeti eremuhani le lídangiñeti iyumaü harumati.2Ru humá seremei lun Aburemei lau tamuri árüpa, wa humá uremu lun lau tamuri gidara.3Wa humá iseri uremu lun, háfara lun buidu buidu lau agúarahani lánina ugundani.4Inarüniti lererun Aburemei; lau katei le burí ladügübei arufuda lumuti luagu gúnfuli lan.5Hínsiñeti katei le richabei luma le úaraguabei lun Aburemei; buíngüda lumuti sun ubóu lau línsiñehabu!6Lau lererun Aburemei ladügǘwa sielu lau láfurun liyumulugugiñe ladügǘwa weyu hama waruguma.7Óundaraguagüda lumuti lidunarina lilulin-agei barana areidalei lidan aban.8Sun gürigia ubouagu ru hamá inebesei lun Aburemei; sun lílana ubóu ru hamá inebesei lun.9Ladüga adimurehati, aba lasaliragun sun katei; ru lumuti lererun, aba lederebugudun sun katei.10Günringua lumuti Aburemei sun le hasaminarubei gibe tubungiutegu hadügün,11ánheinti laransehan Aburemei, derebuguti súnwandan.12Fuleseiwatiña néchani ha Búngiubei Habungiute, gürigia ha anúadira láañabaña kei lánigu.13Arihati Aburemei lúmagiñe siélugiñe, aríaguliña houn sun gürigia;14ariha lumutiña lílana sun fulasu lídangiñe fulasu le ñein lubéi laganawa;15ligía adügübarun hanigi ligía giñe aríaahabalin sun le hadügübei.16Úati urúei esefuruti ladüga hiibe lisudaranigu, mesefuruntiña giñe ha ganigibaña ladüga lanarime here;17meseriwíntiña gabayu lun hesefurun ni aban; lau sun weiri lan here, siñati hesefuhan.18Ánheinti Aburemei góunigi lumutiña ha íchugubaña inebesei lun ani afiñe hagía luagu línsiñehabu súnwandan,19lun lesefuruniña lídangiñe óunweni, luma lun líchugun ibagari houn lidan lidaani ilamaü.20Wagía hemenigitiwa luagu Aburemei, íderagua lumutiwa, ani góunigilawa!21Gúndaatu wanigi lidan Aburemei; hemenigitiwa le gumuti luagu liri le sándubei.22Wamalá bínsiñehabu Aburemei, ítara kei wagurabuni búmagiñe!Bible Society of Honduras