Sálumu32
Gufesei luma ferudun
1Fuleseiwatiña gürigia ha ferudunawaalibei hadurun luma hafigoun.2Fuleseiwatiña gürigia ha buídubaña isaminan, ha giñe madurunhañabaña ligibugiñe Aburemei luagu ni kata.3Sun meha dan le naubei magufeserunga nifigoun, aba meha nayahuahan sagü weyu.4Bei bumutina meha áriebu wéyuagu, ábati agumuchagueina lan nere kei lamabeidun serenu lau lara weyu.5Gama lumoun aba nagufeseruni nifigoun luma sun nuriban, maramudunga ni kata; aba naranserun lun nagufeseruni nifigoun burí bun, buguyati, Nabureme, aba ferudunabánina.6Ligía háwaruba lubéi gúnfulitiña buagu lidan idiheri, ani íbini burí labouchagun liyuma duna lau lere, machülübei hawagun.7Buguya naramudaguagülebei; areida bumutina luéi wuribani, efeduha numuti besefuhan lau uremu, ladüga góunigi bumutina.8Lariñahare Aburemei: «Buágunñein narihin. Narufudahaba bun; níchuguba dimurei buíduti bun; narufudubei üma le lunbei bafalaruni bun.9Mítaranba kei gabayu ni kei mile, ha siñabei gunfuranda hamá, ha gásubei hararamúniwa lau furenu luma agürügaü; ladüga mayarafadunbaña bun lau amu luwuyeri».10Hasandiruba wuribatiña saragu burí gáriti, gama lumoun ha hemenigibaña luagun Aburemei hóuburagua lumutiña línsiñehabu.11Gunda humá lidan Aburemei, gürigia buítiña ha buídubaña aritagun gunda humá, hagúaraha lau ugundani!Bible Society of Honduras